गोंदिया - आमगाव तालुक्यात घाटटेमणी गावात लग्न समारंभ आटोपल्यानंतर स्वागत समारंभाचे आयोजन करण्यात आले होते. यासाठी तब्बल २०० लोकांच्या जेवणाची तयारी सुरू होती. याची माहिती स्थानिक प्रशासनाला मिळाली. त्यानुसार पोलीस विभागातर्फे सदर ठिकाण जाऊन पाहणी केली असता, पाहुणे लोकांसाठी जेवण तयार करण्यात आले होते. यावेळी पोलिसांनी जिल्हाधिकाऱ्यांच्या आदेशाला केराची टोपली दाखवल्यामुळे आपल्या स्टाईलने जेवण बनवणाऱ्यांना दम दिला. तसेच आयोजकांविरुद्ध गुन्हा दाखल केला आहे.
जिल्हा प्रशासनाने नागरिकांना मोठ्या संख्येने एकत्र येण्यासाठी मज्जाव केला आहे. तसेच आता महाराष्ट्रातच नव्हे तर संपूर्ण देशात लॉकडाऊन करण्यात आले आहे. असे असले तरीही लोकांना एकत्रित आणण्यासाठी असे कार्यक्रम अनेक भागात सुरू आहेत.
हेही वाचा... पुढील २१ दिवस हाताळता आले नाहीत तर देश २१ वर्षे मागे जाईल - मोदी
राज्यात कोरोना विषाणूचा वाढता प्रादुर्भाव पाहता १४४ कलम लागू करण्यात आले आहे. यामुळे चारपेक्षा जास्त लोकांनी एकत्र जमाव करू नये, असा दंडक आहे. याशिवाय विवाह समारंभ तसेच स्वागत समारंभ सारखे सामूहिक कार्यक्रम रद्द करण्याचे आदेश स्थानिक जिल्हाधिकाऱ्यांमार्फत देण्यात आले आहे. मात्र, तरीही ग्रामीण भागात याची पायमपल्ली होत असल्याचे पाहायला मिळत आहे.
