धुळे - जिल्ह्यातील शिरपूरजवळील वाघाडे गावाजवळ केमिकल कंपनीत भीषण स्फोट झाला. यामध्ये आतापर्यंत १५ जणांचा मृत्यू झाला, तर ५० पेक्षा अधिकजण जखमी झाले आहेत. याबाबत घटनास्थळावरून अधिक माहिती देताना ईटीव्ही भारतचे प्रतिनिधी...
गेल्या काही दिवसांपूर्वी नाशिकमधील रोमीत कंपनीने ही कंपनी विकत घेतली होती. मात्र, आज वाघाडे गावाजवळ असलेल्या एमआयडीसीमधील या केमिकल कंपनीत स्फोट झाला. त्यामुळे संपूर्ण शिरपूर तालुका हादरला आहे. या स्फोटामुळे धुराचे लोट उंचच-उंच जात होते. हा स्फोट इतका भीषण होता की, कंपनीच्या आजूबाजूच्या गावांनाही त्याचा हादरा बसला आहे.
कंपनीजवळील शेतातील काही जनावरेही या स्फोटामुळे दगावली आहेत. संपूर्ण कंपनी जळून खाक झाली आहे. याठिकाणी सकाळपासून बचावकार्य मोठ्या प्रमाणात सुरू आहे. यामधील जखमींना शिरपूर ग्रामीण रुग्णालयात हलवण्यात आले आहे. मात्र, अद्याप स्फोटाचे कारण स्पष्ट होऊ शकले नाही.
