बुलडाणा - सांगली, कोल्हापूर येथील पूरग्रस्तांसाठी बुलडाणेकरांनी मदतीचा हात पुढे केला आहे. आज(10ऑगस्ट) रोजी स्थानिक विश्रामगृहात पूरग्रस्तांच्या मदतीसाठी निधी जमा करण्यासंबंधात बुलडाण्यातील नागरिकांनी एक बैठक आयोजित केली होती. रविवारी शहरातून रॅली काढून पूरग्रस्तांच्या मदतीसाठी निधी जमा करणार असल्याचे या बैठकीत सर्वानुमते ठरवण्यात आले.
रॅलीदरम्यान जमा झालेला निधी सांगली, कोल्हापूर येथील पूरग्रस्तांच्या मदतीसाठी खर्च करण्यात येणार आहे. बुलडाणेकरांनी या पूरग्रस्तांना सढळ हाताने मदत करावी असे आवाहन 'बुलडाणेकर पूरग्रस्त मदत समिती'ने यावेळी केले. बैठकीत उपस्थित काही मंडळींनी मदत म्हणून रोख रक्कमही जमा केली.
