परळी (बीड) - कोरोनाचा फैलाव रोखण्यासाठी परळीचे प्रभू वैद्यनाथ मंदिर गेल्या अनेक दिवसांपासून बंद आहे. बंदचा हा कालावधी आणखी वाढवण्यात आला असून, येत्या 4 एप्रिलपर्यंत याला मुदतवाढ देण्यात आली आहे. जिल्हाधिकाऱ्यांनी याबाबत आज नवे आदेश काढले आहेत. प्रभू वैद्यनाथांच्या दर्शनासाठी संपूर्ण राज्यातील आणि देशातील भाविक दर्शनासाठी येतात आणि त्यामुळे गर्दी होण्याची श्यक्यता लक्षात घेता महाशिवरात्रीच्या अगोदर मंदिर दर्शनासाठी बंद ठेवण्यात आले होते. मंदिर बंदचा कालावधी आणखी वाढविण्यात आला आहे. पुढील 4 एप्रिलपर्यंत मंदिर दर्शनासाठी बंद असणार आहे. मंदिर जरी बंद असले तरी दैनंदिन पूजा विधी पुजाऱ्यांच्या मार्फत चालू असणार आहे.
गेल्या वर्षापासून मोठ्या प्रमाणात कोविड-१९ साथ रोगाचा प्रादुर्भाव चालू आहे. कोरोना रोगाच्या अनुषंगाने परळी वैजनाथ तालुक्यामध्ये, शहरामध्ये गेल्या काही दिवसापासून कोरोना पॉझिटिव्ह रुग्णांची वाढत असल्याने व भाविक भक्त दर्शनाच्या निमित्ताने गर्दी करण्याची शक्यता असल्याने परळी वैजनाथ मंदिर बंद राहील. सदरील कालावधीत वैजनाथाचे प्रथेप्रमाणे पूजा व इतर बाबीं या पुजारी व विश्वस्त यांनी कोरोना विषयक नियम आहेत त्याचे पालन करुन करण्यास परवानगी असेल.
या आदेशांचे पालन न करणाऱ्या कोणतीही व्यक्ती अथवा संस्थेवर भारतीय दंड संहिता 1860 (45) च्या कलम 188, आपत्ती व्यवस्थापन अधिनियम 2005 व साथ रोग नियंत्रण कायद्यातील तरतुदीप्रमाणे फौजदारी कारवाई करण्यात येईल असे सूचित केले आहे.
वैद्यनाथ मंदिर भाविकांसाठी उघडावे - ॲड.दत्ता महाराज आंधळे
सारे नियम सहिष्णू आहेत म्हणून मंदिरांनी किती दिवस सहन करायचे. देव आणि भक्त यांच्यात कायमचा दुरावा निर्माण करायचा आणि लोकांची भावना देवधर्मावरची उडवायची हाच हेतू यातून प्रकर्षाने मंदिर बंद ठेवून प्रत्ययाला येतो आहे काय? असा सवाल ॲड. दत्ता महाराज आंधळे यांनी प्रशासनाला विचारला आहे. भाविक भक्तांना त्यांच्या उपास्य देवतेच्या आराधनेपासून कडक निर्बंध लादून अगोदरच वंचित ठेवलेले आहे. शंभर फुटावरुन बेल, फुल, गंध, अक्षता याचेवर कडक नियमावली केली आहे .
भक्तांना दूर अंतरावरुन दर्शन घेण्याची सक्ती आहेच. परंतु देवधर्माची ओळख पण बुडली जावून नास्तिकवाद आपसूकच स्विकारला जाईल या उद्देशाने हे कुटील डाव टाकण्याचे पाप तर होत नाहीये ना. अशी शंका उपस्थित करून याचा निषेध कीर्तनकार तथा संतवाङमयाचे संशोधक आणि वारकरी साहित्य परिषदेचे मराठवाडा अध्यक्ष ह.भ.प.ॲड.दत्ता महाराज आंधळे यांनी केला आहे. त्वरित वैद्यनाथ मंदिर उघडावे अशी मागणी त्यांनी केली असून मंदिर बंद असल्याने भाविकांच्या भावना दुखावल्या जात आहेत प्रशासनाने भाविकांच्या भावनांचा आदर करत प्रभू वैद्यनाथ मंदिर उघडावे अशी मागणी दत्ता महाराज आंधळे यांनी केली आहे.
प्रभू वैद्यनाथ मंदिरातील दर्शन सेवा काळजीचे उपाय करून सुरू ठेवा - चंदुलाल बियाणी
राज्यातील इतर ठिकाणची मंदिरे दर्शनासाठी खुली असतांना प्रभू वैद्यनाथ मंदिरच बंद कशामुळे? असा सवाल करत ते खुली करण्याची मागणी चंदुलाल बियाणी यांच्या वतीने करण्यात आली आहे. महाराष्ट्र राज्यात कोरोनाच्या संसर्गाची लाट सर्वत्रच आलेली आहे. या पार्श्वभूमीवर स्थानिक प्रशासनाने निर्णय घेण्याच्या सूचना मुख्यमंत्री महोदयांनी दिलेल्या आहेत. या अधिकारांत आपण महाशिवरात्रीच्या अगोदरच बारा ज्योतिर्लिंगांपैकी पाचव्या क्रमांकाचे असलेल्या प्रभू वैद्यनाथ मंदिरातील दर्शन सेवा पूर्णतः बंद करण्याचे आदेश दिले होते आणि आता आपण त्या आदेशाच्या कालावधीत दि.04 एप्रिल पर्यंत वाढ केली आहे. ही मुदतवाढ रद्द करून दर्शन सेवा योग्य ते काळजीचे उपाय करून सुरू ठेवण्यात यावी प्रभू वैद्यनाथ देवस्थान विकास कृती प्रतिष्ठानचे अध्यक्ष चंदुलाल बियाणी जिल्हाधिकारी, बीड यांना पाठविलेल्या निवेदनात म्हटले आहे. या निवेदनाची प्रत पालकमंत्री ना.धनंजय मुंडे यांनाही पाठविण्यात आली आहे.
निवेदनात पुढे म्हटले आहे की, महाराष्ट्रात सर्वत्र कमी अधिक प्रमाणांत परिस्थिती सारखीच आहे. राज्याच्या विविध भागांतील महत्वाची मंदिरे, व्यापारी संकुले (शॉपिंग मॉल), पर्यटन स्थळे आवश्यक ते काळजीचे उपाय करून सुरू ठेवण्यात आले आहेत. सर्वत्र मंदिरातील दर्शन सुविधासुद्धा भाविकांसाठी उपलब्ध आहे. अशा स्थितीत आपणही प्रभू वैद्यनाथ मंदिरात सॅनिटायझर, मास्क व योग्य सामाजिक अंतर ठेवण्यासाठी उपाययोजना करून दर्शन सुविधा भाविकांसाठी सुरू ठेऊ शकतो. ज्याच्या नावातच वैद्य आहे अशा प्रभू वैद्यनाथांवर लाखो भाविकांची अपार श्रद्धा आहे. या श्रद्धेला आणि भाविकांच्या भावना विचारात घेता वैद्यनाथ मंदिरातील दर्शन सुविधा काळजीचे सर्व उपाय करून सुरू ठेवण्यात यावी अशी मागणी चंदुलाल बियाणी यांच्यामार्फत पाठविलेल्या निवेदनाद्वारे केली आहे.
