छत्रपती संभाजीनगर (औरंगाबाद) : औरंगाबाद शहराचे नाव छत्रपती संभाजीनगर करण्याची आमची मागणी पूर्ण झाली आहे. महाविकास आघाडी सरकार असताना तात्कालीन मुख्यमंत्री उद्धव ठाकरे यांनी प्रस्ताव केंद्राकडे पाठवला होता. त्यानंतर केंद्राने तो मंजूर केला. त्यामुळे आम्ही राज्य आणि केंद्र सरकारचे अभिनंदन देखील केलेले आहे. सध्या शहरात सुरू असलेल्या परिस्थितीबाबत आंदोलन करणाऱ्या पक्षांना जनतेशी देणे घेणे नाही. मात्र लोकांनाही यांच्याशी घेणे देणे राहिलेले नाही. तू मारल्यासारखे कर मी रडल्यासारखे करतो, अशी भाजप आणि एमआयएमची भूमिका आहे. एकाने आंदोलन केले की, लगेच त्यावर दुसरा आंदोलन करत आहे, अशी टीका अंबादास दानवे यांनी केली.
बच्चू कडू यांची भूमिका संधिग्ध : सध्या सरकारमध्ये असलेले बच्चू कडू यांची भूमिका नेहमी सांधिग्ध राहिली आहे. त्यांना नेमके काय करायचे आहे, हे त्यांनाच माहिती नाही. खरे तर त्यांच्या पाठिंब्याने काहीही फरक पडत नाही. त्यांचा स्वतंत्र पक्ष आहे, त्यांच्या पक्षातील आमदारांच्या मनात तीव्र भावना आहेत. फुटून गेलेल्या आमदारांमध्ये समाधानाची भूमिका राहिली नाही, पुलावरून पाणी गेले आहे. त्यामुळे आता पाठिंब्याबाबत प्रश्न उपस्थित होत नाही, अशी टीका अंबादास दानवे यांनी केली.
सरकार संवेदनशील नाही : होळी झाल्यानंतर अवकाळी पावसाने राज्यात थैमान आहे. मागील आठवड्याभरात अनेक ठिकाणी गारपीट झाली. त्यामुळे पिकांचे मोठे नुकसान झाले आहे. मात्र शेतकऱ्यांना अद्याप दिलासा देण्यात आलेला नाही. इतकेच काय शेतकऱ्यांच्या पाठीवर हात फिरवण्याचे कामही सरकार करू शकले नाही. कृषिमंत्री म्हणून कृषी विभाग कसा उध्वस्त होईल? असे काम कृषिमंत्री करत आहेत. मुख्यमंत्री, उपमुख्यमंत्री आणि कृषिमंत्री असंवेदनशील आहेत. सगळ्या पिकांचे नुकसान झालेले आहे, शेतकरी मेटाकुटीला आला आहे. जुनी मदत अद्याप मिळालेली नाही त्यात, नवीन मदतीची अपेक्षा शेतकऱ्यांना आहे. मात्र अद्याप साधी घोषणा देखील सरकारने केलेली नाही, अशी टीका विरोधी पक्षनेते अंबादास दानवे यांनी केली.
