अमरावती - जिल्ह्यातील वरुड येथील शिक्षक कॉलनी जवळ शेतात वास्तवात असलेल्या सात वर्षीय बालकाचा मृतदेह एका भंगार कारमध्ये कुजलेल्या अवस्थेत आढळला. अजय कैलास पंधरे असे या बालकाचे नाव असून पाच दिवसापासून तो बेपत्ता झाला होता. या घटनेने शहरात एकच खळबळ उडाली आहे.
वरूडच्या शिक्षक कॉलनीलगतच्या एका शेतात मजूर कैलास पंधरे, पत्नी व मुलगा अजय हे वास्तव्यास आहेत. ५ मे रोजी सकाळी ११ वाजता अजय घराशेजारीच खेळत असताना अचानक तो बेपत्ता झाला होता. यादरम्यान कुटुंबीयांनी त्याची शोधाशोध केली. परंतु तो कुठेच आढळून न आल्याने अखेर ७ तारखेला आईने पोलीस ठाण्यात तक्रार दाखल केली होती.
याप्रकरणी पोलिसांनी गुन्हा नोंदवून त्या दिशेने तपास केला. दरम्यान, गुरुवारी वरुड पांढुरणा रस्त्यालगत असलेल्या एका साईकृपा सर्व्हिसिंग सेंटरसमोर नालीचे बांधकाम करत असलेल्या मजुरांना दुर्गंधी येत होती. त्यामुळे त्यांनी भंगारात पडलेल्या सोनेरी रंगाच्या कारजवळ पाहणी केली. यावेळी त्यांना भंगार कारमध्ये कुजलेल्या अवस्थेत चिमुकल्या अजयचा मृतदेह आढळून आला.
घटनेची माहिती मिळताच पोलीस अधिकारी कर्मचाऱ्यांसह घटनास्थळी दाखल झाले. त्यानंतर पोलीसांनी घातपाताच्या दिशेने बारकाईने निरीक्षण करुन माहिती घेतली. तसेच अमरावती येथून फॉरेन्सिक चमूला पाचारण करण्यात आले आहे.
दरम्यान, या प्रकरणात अनेक तर्कवितर्क लावले जात आहेत. पोलिसांनी घटनास्थळाची पाहणी केल्यानंतर ५ मे रोजी अजय कारचे दरवाजे उघडून आतमध्ये गेला असावा. त्यानंतर कारचा दरवाजा बंद झाला असावा. तसेच कारचे काचाही बंद असल्याने अजयकडून ते न उघडल्याने त्याचा गुदमरून मृत्यू झाला असावा, असा संशय व्यक्त केला जात आहे. या घटनेचा अधिक तपास पोलीस करीत आहेत.
