अकोला - रामदास पेठ पोलीस ठाण्यांतर्गत त्रिवनेश्वर कॉम्प्लेक्समध्ये कचरा वेचणाऱ्या अल्पवयीन मुलीवर(वय १२) तिघांनी सामूहिक अत्याचार केला होता. या तिन्ही आरोपींना शुक्रवारी जिल्हा व सत्र न्यायालयाने मरेपर्यंत जन्मठेपेची शिक्षा सुनावली, तसेच दंडही ठोठावला. पीडित मुलीला सरकारकडून १० लाख रुपये मोबदला देण्याचे आदेशही दिले. गोविंद साखरे, शेख मुश्तकीम आणि मोहम्मद मोहसीन अशी या आरोपींची नावे आहेत.
रामदास पेठ पोलीस ठाण्यांतर्गत त्रिवनेश्वर कॉम्प्लेक्सजवळ १५ एप्रिल २०१७ ला सायंकाळी ५ दरम्यान एक अल्पवयीन मुलगी(वय १२) कचरा वेचत होती. दरम्यान, कॉम्प्लेक्सजवळ बसलेल्या गोविंद परशराम साखरेने तिला पैशांचे आमिष दाखविले. तसेच या कॉम्प्लेक्सच्या तिसऱ्या मजल्यावर जा, तिथे दोघेजण बसलेले आहेत. ते तुला आणखी पैसे देतील, असे आमिष दाखवले. पैशांच्या लालसेपोटी ती अल्पवयीन मुलगी कॉम्प्लेक्सच्या तिसऱ्या मजल्यावर गेली. यावेळी बसलेल्या शेख मुश्तकीम अब्दुल जाकीर तथा मोहम्मद मोहसीन मोहम्मद अनवर कुरैशी यांनी तिच्यावर अनैसर्गिक अत्याचार केला. त्यांनतर हे तिघे तिथून पळून गेले.
याबाबत माहिती मिळताच रामदास पेठ पोलीस महिला उपनिरीक्षक विद्या लांडे यांनी घटनास्थळ गाठून पीडित मुलीला उपचारासाठी सर्वोपचार रुग्णालयात दाखल केले. पोलिसांनी याप्रकरणी पोक्सो, ऑट्रासिटीसह विविध कलमांनुसार गुन्हा दाखल केला. शहर उपविभागीय पोलीस अधिकारी उमेश माने पाटील यांच्या मार्गदर्शनाखाली ठाणेदार प्रकाश सावकार, महिला पोलीस उपनिरीक्षक विद्या लांडे, दिलीप पोटभरे यांनी तपास पूर्ण करून दोषारोप पत्र दाखल केले.
हेही वाचा - अकोल्यातील चतारी गाव मूत्रपिंड विकारग्रस्त; आरोग्य यंत्रणा ठरतेय निष्फळ
हे प्रकरण प्रथम जिल्हा व सत्र न्यायाधीश एम. आय. आरलैंड यांच्या न्यायालयात चालले. सरकार पक्षातर्फे ११ साक्षीदार तपासण्यात आले. दोन्ही वकिलांचा युक्तिवाद ऐकल्यानंतर तिन्ही आरोपींना न्यायालयाने दोषी ठरविले आणि तिघांनाही मरेपर्यंत जन्मठेपेची शिक्षा सुनावली. सरकार पक्षातर्फे जिल्हा सरकारी वकील आरआर देशपांडे यांनी युक्तिवाद केला. तसेच न्यायालयाने पीडित अल्पवयीन मुलीला सरकारतर्फे १० लाख रुपये मोबदला देण्याचे आदेश दिले.
या प्रकरणी महिला पोलीस उपनिरीक्षक लांडे यांची साक्ष महत्वाची ठरली. पीडित मुलीला घटनास्थळावरून उचलून नेऊन रुग्णालयात दाखल करणाऱ्या व तिला घटनेनंतर पाहणाऱ्या त्या पहिल्या व्यक्ती होत्या.
हेही वाचा - पातुर नगरपरिषदेच्या रेकॉर्ड रुमला आग, महत्त्वाची कागदपत्रे जळून खाक
