धुळे - मोबाईलमध्ये 'पबजी' हा गेम खेळणाऱ्या युवकांच्या दोन गटात वाद होऊन तुफान मारहाण झाली. ही घटना शहरातील साक्री रोडवरील जोरावली सोसायटी परिसरात घडली आहे. या मारहाणीत एक तरुण गंभीर जखमी झाला आहे.
शहरातील साक्री रोड परिसरातील जोरावरअली सोसायटी परिसरात सोशल मीडियात ऑनलाईन खेळला जाणारा पबजी हा गेम काही तरुण मोबाईलवर खेळत होते. यावेळी दक्षता सोसायटीतील काही तरुण याठिकाणी गर्दी करुन होते. दरम्यान गेम खेळत असताना युवकांमध्ये शाब्दिक वाद झाल्याने वादाचे पर्यावसान मारहाणीत झाले. यावेळी काही तरुणांनी थेट हातात धारदार शस्त्र व लाकडी दांडक्यासह दगडांनी हल्ला केल्याने या हल्ल्यात एक तरुण रक्तबंबाळ झाला. तर काही नागरिकांनी जखमी तरुणाला जिल्हा वैद्यकीय सर्वोपचार रुग्णालयात दाखल केले. याप्रकरणी शहर पोलीस ठाण्यात गुन्हा दाखल करण्यात आला आहे.
