मुंबई - यंदाची आयपीएल स्पर्धा २३ मार्चपासून सुरू होत आहे. मात्र, यंदा या स्पर्धेचे वैशिष्ट्य म्हणजे पहिल्यांदाच या स्पर्धेतील सामन्यांचा थरार स्टार प्रवाह वाहिनीवर संपूर्णपणे मराठीत अनुभवण्याची संधी क्रिकेट रसिकांना मिळणार आहे. यात फक्त क्रिकेट समालोचन नव्हे तर सामन्याची सारांश आणि ग्राफिक्सही मराठीमधून पाहायला मिळणार आहेत.
आर. जे. आशुतोष, कुणाल दाते, सुनील वैद्य हे या सामन्याचे मराठीमधून समालोचन करणार आहेत. तर संदिप पाटील, दिलीप वेंगसरकर, चंद्रकांत पंडित, हृषीकेश कानिटकर आणि आविष्कार साळवी हे तज्ज्ञ क्रिकेटपटू या सामन्याचे मराठीतून विश्लेषण करतील. याशिवाय या सामन्यांची रंगत अजून वाढविण्यासाठी क्रिकेट कट्टा हा खास कार्यक्रम यावेळी मॅचआधी सादर केला जाईल. अभिनेते अतुल परचुरे, पुष्कर श्रोत्री, विजय केंकरे, विजय पटवर्धन आणि खुशबू तावडे हे कलाकार या कार्यक्रमात अनोखे रंग भरतील.
खरी मजा आपल्या भाषेत आहे, असं म्हणत या मराठी सादरीकरणाची जाहिरात लवकरच सुरू करण्यात येईल. मात्र, या सामन्यांचा आणि मराठी समालोचनाचा अनुभव फक्त दर रविवारी होणाऱ्या मॅचच्या वेळीच आपल्याला अनुभवायला मिळेल. दर रविवारी पहिला सामना सुरू होण्यापूर्वी संध्याकाळी ७ वाजल्यापासून हे सादरीकरण सुरू होईल. तेव्हा आता मातृभाषेतून आयपीएलचा थरार अनुभवण्यासाठी सज्ज रहा.
