गेल्या काही वर्षांत ‘रियुनियन’ हा शब्द प्रत्येकाच्या कानावर पडतंच असेल. काही दशकांपूर्वी ‘बिछडलेले’ मित्र-मैत्रिणी सोशल मीडियामुळे सापडताहेत आणि जुन्या आठवणींना उजाळा देण्यासाठी ‘रियुनियन’ घडवून आणताहेत. ‘गेले ते दिवस ....’ म्हणत आताचे वय विसरून त्या दिवसांच्या आठवणीत रमताना अनेकांचे आजारही बरे होतात. तर ‘रियुनियन’ फक्त इथेच घडत नसून हॉलिवूडमधेही घडताना दिसतेय. साधारणतः दहाएक वर्षे जगभरातील प्रेक्षकांच्या हृदयावर राज्य केलेली मालिका ‘फ्रेंड्स’ आता २५ वर्षे पूर्ण करीत आहे. तब्बल १७ वर्षांपूर्वी मे महिन्यातच या मालिकेचा शेवटचा एपिसोड प्रसारित झाला होता. आणि आता फ्रेंड्स’ मधील फ्रेंड्सचं रियुनियन होत असून ते ‘फ्रेंड्स : द रियुनियन’ मधून प्रेक्षकांच्या भेटीला येणार आहेत.
रेचल, रॉस, मोनिका, फिबी, चॅन्डलर आणि जोई ही निरनिराळ्या स्वभावाच्या तरुण-तरुणी न्यूयॉर्क मध्ये वेगवेगळ्या कारणास्तव एकत्र येऊन एकत्र राहू लागतात. अमेरिकेतल्या तरुणाईचे रोजचे प्रॉब्लेम्स, आशा आकांशा, हेवेदावे, प्रेम प्रकरणं आणि सर्वात महत्वाची म्हणजे मैत्री यात ते कसे वागतात याचे अत्यंत मार्मिकतेने आणि विनोदी पद्धतीने केलेल्या मांडणीमुळे ही सिरीज प्रेक्षकांनी अक्षरशः डोक्यावर घेतली होती. आजही याचे एपिसोड्स जुनी पिढी नवीन पिढी सोबत डिजिटल प्लॅटफॉर्मवर पाहून रोजच्या धकाधकीच्या जीवनात विरंगुळा शोधतात.
जेव्हा ही मालिका सुरु झाली तेव्हा रेचल, रॉस, मोनिका, फिबी, चॅन्डलर आणि जोई यांच्या भूमिका करणारे अनुक्रमे जेनिफर ॲनिस्टन, डेविड स्क्वीमर, कर्टनी कॉक्स, लिझा कुरदोव, मॅथ्यू पेरी आणि मॅट लिब्लॅंक हे स्ट्रगलिंग ऍक्टर्स होते परंतु जसजशी ही मालिका फेमस होऊ लागले तसतसे हे सर्व हॉलिवूडमधील मोठे स्टार्स बनले होते. इतकी लोकप्रिय मालिका पुनरुज्जीवित व्हावी अशी प्रेक्षकांची इच्छा होती परंतु हे सर्वजण आपापल्या कामात अत्यंत व्यस्त असल्याकारणाने ते शक्य होत नव्हते. परंतु दोनेक वर्षांपूर्वी या सर्वांनाच वाटू लागले की आपण प्रेक्षकांच्या, ज्यांनी आपल्याला इतके मोठे स्टार्स केले, विनंतीला मान द्यायला हवा आणि ही सर्व मंडळी ‘फ्रेंड्स : द रियुनियन’ मधून पुन्हा प्रेक्षकांच्या भेटीला येत आहेत.
‘फ्रेंड्स : द रियुनियन’ हा ‘अनस्क्रिप्टेड’ शो असणार असून जेनिफर ॲनिस्टन, डेविड स्क्वीमर, कर्टनी कॉक्स, लिझा कुरदोव, मॅथ्यू पेरी आणि मॅट लिब्लॅंक ही सर्व स्वतःच्याच अवतारात असतील. ते त्यांच्या लोकप्रिय व्यक्तिरेखांमध्ये नसणारेत. नुकताच याचा ट्रेलर प्रदर्शित झाला आणि ही मालिका देखील प्रेक्षकांना खळखळून हसवेल याची शाश्वती मिळते. यात २० टॉप सेलिब्रिटी पाहुणेदेखील (लेडी गागा, जस्टिन बिबर ई.) हजेरी लावणार आहेत आणि या मालिकेत दुर्लभ ‘बीटीएस’ म्हणजेच ‘बिहाइंड द सीन्स’ दाखविण्यात येणार असून त्यावर सर्वांच्या गमतीदार प्रतिक्रिया आणि अजूनही मजेदार कन्टेन्ट प्रेक्षकांना बघायला मिळेल.
‘फ्रेंड्स : द रियुनियन’ येत्या २७ मे २०२१ ला एचबीओ मॅक्स वर स्ट्रीम होणार आहे.
हेही वाचा - जीव झाला येडा पिसा’ मालिकेतील हेमंत जोशी यांचे कोरोनामुळे निधन
