इस्लामाबाद - पाकिस्तानमध्ये काही दिवसांपूर्वी एका दिवसांपूर्वी जमावाने एका हिंदू मंदिराची नासधूस केली होती. पाकिस्तानमधील खैबर पख्तुनवा प्रांतातल्या करक जिल्ह्यात ही घटना घडली होती. या घटनेचा व्हिडिओ व्हायरल झाल्यानंतर खैबर पख्तुनवामधील सरकारने मंदिराची पुर्नबांधणी करण्याचे आदेश दिले आहेत. तसेच मंदिर पाडण्यामध्ये सहभागी असेलेल्या 45 जणांना अटक करण्याचे निर्देश पोलिसांना दिले आहेत. पाकिस्तानचे मानवाधिकार मंत्री शिरीन मझारी यांनी मंदिरावरील हल्ल्याचा निषेध नोंदवला होता.
पाकिस्तानमध्ये हिंदूंच्या मंदिरांना लक्ष्य करण्यात आल्याच्या अनेक घटना घडल्या आहेत. खैबर पख्तुनवा प्रांतातल्या करक जिल्ह्यात जमावाने एका मंदिराची नासधूस केली आहे. जमावाने सुरवातीला मंदिर पेटवून दिले आणि त्यानंतर तोडफोड करत नासधूस केली. कट्टर धार्मिक नेत्यांनी प्रक्षोभक भाषणं करत जमावाला मंदिर पाडण्यासाठी प्रवृत्त केले. संबधित मंदिर हे 1920 ला बांधलेले असावे, असा अंदाज आहे.
सिंध प्रदेशात हिंदू मंदिराची तोडफोड -
काही दिवसांपूर्वी पाकिस्तानच्या सिंध प्रदेशात हिंदू मंदिराची तोडफोड झाली होती. पाकिस्तानात 828 पैकी फक्त 20 मंदिरेच बाकी असल्याचे लंडनस्थित पाकिस्तानी मानवाधिकार कार्यकर्त्या अनिला गुलजार यांनी म्हटलं होतं. अल्पसंख्याक सुरक्षित नसल्यावरून पाकिस्तान नेहमीच संयुक्त राष्ट्राच्या सभेत तोंडशी पडला आहे. आता मंदिराच्या तोडफोडीनंतर पाकिस्तानातील अल्पसंख्याकाच्या सुरक्षतेचा मुद्दा पुन्हा चर्चेत आला आहे. पाकिस्तानमध्ये हिंदूंचा सर्वात मोठा अल्पसंख्याक समुदाय आहे. परंतु, हिंदू मंदिरांबद्दल तोडफोड केल्याच्या वारंवार बातम्या येत आहेत. या हल्ल्याबद्दल हिंदू समाजातून संताप व्यक्त होत आहे. फक्त मंदिराची तोडफोड करण्यात येत नाही. तर हिंदू मुलींना धर्मांतर करण्यासाठी बळजबरी केल्याच्याही घटना समोर आल्या आहेत.
