मुंबई - रणबीर कपूर आणि आलिया भट्ट यांची भूमिका असलेला चित्रपट 'ब्रह्मास्त्र' यावर्षी 9 सप्टेंबर रोजी रिलीज होणार आहे. या चित्रपटाचा ट्रेलर आणि आता या चित्रपटातील पहिले गाणे 'केसरिया' रिलीज करण्यात आले आहे. चित्रपटाचा ट्रेलर आणि गाणेही चाहत्यांना आवडले आहे. यासोबतच चित्रपट रिलीज होण्यापूर्वीच एक मोठी बातमी समोर येत आहे. चित्रपटाचा दिग्दर्शक अयान मुखर्जीनेही 'ब्रह्मास्त्र 2' वर काम सुरू केले आहे. सर्वात मोठी बातमी म्हणजे दीपिका पदुकोणची भूमिका या चित्रपटाच्या दुसऱ्या भागात असणार आहे.
मीडियानुसार, चित्रपटाच्या दुसऱ्या भागात महादेव आणि पार्वती ही दोन नवीन पात्रं दिसणार आहेत. आता दीपिका पदुकोणच्या चाहत्यांसाठी आनंदाची बातमी म्हणजे पार्वतीच्या भूमिकेसाठी तिला अप्रोच करण्यात आले आहे. चित्रपटाच्या पहिल्या भागातही दीपिका पदुकोणचा दमदार कॅमिओ असणार असल्याचे सांगण्यात येत आहे. चित्रपटातील महादेवच्या भूमिकेसाठी तयारी सुरू असून त्यासाठी चांगल्या आणि सशक्त अभिनेत्याचा शोध सुरू आहे.
चित्रपटाच्या पहिल्या भागाची कथा शिवा (रणबीर कपूर) आणि ईशा (आलिया भट्ट) भोवती असेल. पण यावर्षी ९ सप्टेंबरला प्रदर्शित होणाऱ्या ब्रह्मास्त्र चित्रपटाच्या पहिल्या भागाला बॉक्स ऑफिसवर कसा प्रतिसाद मिळतो, या आधारावर 'ब्रह्मास्त्र-2'ची कथा तयार करण्यात येणार आहे.
चित्रपटाची स्टारकास्ट - रणबीर कपूर आणि आलिया भट्ट यांच्याशिवाय अमिताभ बच्चन, दक्षिणेतील अभिनेता नागार्जुन आणि टीव्ही अभिनेत्री मौनी रॉय चित्रपटाच्या पहिल्या भागात दिसणार आहेत. चित्रपटाचा ट्रेलर दमदार असून प्रत्येकाची पात्रेही जबरदस्त तयार करण्यात आली आहेत.
हेही वाचा - सुश्मिताचा एक्स विक्रम भट्ट म्हणाला, 'ती गोल्ड नाही लव्ह डिगर आहे'
