सोलापूर - कोरोना महामारी सुरू झाली आणि लॉकडाऊन सुरू झाले. कोरोना विषाणूने संपूर्ण जग थांबवले. पण सोनू सूद न थकता अखंडपणे लोकांच्या मदतीसाठी धडपड करत आहे. सोनूला भेटण्यासाठी त्याचा एक चाहता तेलंगणाहून मुंबईकडे पायी निघाला आहे. हा चाहता आज सोलापुरात आला. व्यंकटेश हरिजन, असे त्याचे नाव आहे.
हेही वाचा - सोलापूरमध्ये 18 ते 44 वयोगटातील नागरिकांसाठी दुसऱ्या लसीकरणाचे आयोजन
व्यंकटेश हा तेलंगणा राज्यातील विकाराबाद जिल्ह्यातून पायी आला आहे. तो मुंबईकडे जाणार असल्याची माहिती त्याने दिली. व्यंकटेश हा विकाराबाद जिल्ह्यातील दोरनालपल्ली गावचा रहिवासी आहे. इंटरमीडिएटच्या दुसऱ्या वर्गात शिकणारा २० वर्षीय व्यंकटेश आज दुपारी सोलापूर शहरात पोहचला. शहरात ठिकठिकाणी त्याचे स्वागत करण्यात आले. व्यंकटेश सोनू सूदच्या कोरोना काळतील समाजसेवेने प्रभावित झाला आहे. त्याचे वडील ऑटो रिक्षा चालवतात, तर आईचे निधन झाले. मदत मागण्यासाठी तो हातात अभिनेता सोनू सूदचा भलामोठा फोटो घेऊन तेलंगणाहून मुंबईकडे चक्क पायी निघाला आहे.
व्यंकटेश 800 किमी प्रवास चालत करणार आहे
व्यंकटेशने १ जून रोजी तेलंगणा राज्यातील विकाराबाद या जिल्ह्यांतून मुंबईकडे आपला प्रवास सुरू केला आहे. आतापर्यंत त्याने जवळपास ४०० किलोमीटरचे अंतर आठ दिवसांत पूर्ण केले आहे. आणखीन ४०० किलोमीटरचा प्रवास त्याला करायचा आहे. यासाठी आणखीन त्याला आठ ते दहा दिवसांचा कालावधी लागणार आहे. तो रोज १४ किलोमीटरचा प्रवास पायी करत आहे. दिवसभर पायी चालून थकल्यावर तो रात्रीचा मुक्काम लॉज अथवा धर्मशाळेत करत आहे.
सोनू सूद मदत करेल या अपेक्षेने व्यंकटेश पाई निघाला
व्यंकटेश हरिजन हा एक गरीब कुटुंबातील मुलगा आहे. त्याचे वडील ऑटोरिक्षा चालवितात. काही दिवसांपूर्वी त्याच्या वडिलांनी फायनान्समधून रिक्षा घेतली होती. फायनान्सवाले हप्ते न भरल्याने त्यांची रिक्षा घेऊन गेले. त्यामुळे, व्यंकटेश प्रचंड निराश झाला आहे. याबाबत सोनू सूद काहीतरी मदत करेल, या आशेने तो मुंबईकडे निघाला आहे.
हेही वाचा - आरक्षणासाठी आता सोलापुरात उग्र आंदोलन करणार - मराठा क्रांती मोर्चा
