पुणे - पुण्यातील 'फॅशन स्ट्रीट'ला शुक्रवारी रात्री भीषण आग लागली होती. या आगीत येथील पाचशेहून अधिक दुकाने जळून नष्ट झाली आहेत. यामध्ये येथील व्यापाऱ्यांचे कोट्यवधी रुपयांचे नुकसान झाले आहे. आगीत नष्ट झालेल्या या 'फॅशन स्ट्रीट'ची उपमुख्यमंत्री अजित पवार यांनी सोमवारी सायंकाळच्या सुमारास पाहणी केली. तसेच या ठिकाणी लागलेल्या आगीत झालेल्या नुकसानीचा अहवाल तीन दिवसात सादर करण्याचे आदेश त्यांनी प्रशासनाला दिले आहेत.
अजित पवारांकडून आगीत नष्ट झालेल्या 'फॅशन स्ट्रीट'ची पाहणी अजित पवार यांनी आज सायंकाळच्या सुमारास या ठिकाणी भेट दिली. त्यांच्यासोबत जिल्हाधिकारी देशमुख आणि इतर प्रशासकीय अधिकारी उपस्थित होते. अजित पवार यांनी आगीत नष्ट झालेल्या दुकानांची पाहणी करताना नुकसान झालेल्या व्यापाऱ्यांशी संवाद साधला. व्यापाऱ्यांनी अजित पवारांसमोर आपली कैफियत मांडली. व्यापाऱ्यांचे म्हणणे ऐकून घेतल्यानंतर तीन दिवसात या घटनेचा अहवाल सादर करण्याचे आदेश त्यांनी जिल्हाधिकाऱ्यांना दिले. तसेच हा अहवाल आल्यानंतर या आगीविषयी बैठक घेऊ, असेही त्यांनी यावेळी स्पष्ट केले. पुणे शहरातील कॅम्प परिसरातील 'फॅशन स्ट्रीट'ला शुक्रवारी मध्यरात्री आग लागली होती. या आगीत 500पेक्षा जास्त दुकाने जळून खाक झाली आहेत. कॅम्प परिसरातील हा फॅशन स्ट्रीट पुणेकरांचे खरेदीसाठी आवडते ठिकाण होते. या भागात मोठ्या प्रमाणात कपड्यांची दुकाने असल्याने आग मोठ्या प्रमाणात भडकली. एक-एक करत शेकडो दुकाने आगीच्या भक्ष्यस्थानी पडले. या आगीत सुदैवाने कुठलीही जीवितहानी झालेली नाही. मात्र, व्यावसायिकांचे लाखो रुपयांचे नुकसान झाले आहे.
