मुंबई - कोरोना संक्रमणावर नियंत्रण मिळवण्यासाठी देशाची आर्थिक राजधानी मुंबई अनलॉकच्या दिशेने जात आहे. अशात मुंबई शहरात महिलांवरील अत्याचाराच्या घटना वाढल्या असल्याचे समोर आले आहे. सप्टेंबर महिन्यात अल्पवयीन मुली व महिलांवर बलात्कार, अपहरण आणि विनयभंगाच्या गुन्ह्यात वाढ झाल्याचे समोर आले आहे. यासंदर्भात 'ईटीव्ही भारत'चा हा विशेष रिपोर्ट.
लॉकडाऊन काळात मुंबईत सप्टेंबर महिन्यात तब्बल ४५९ गुन्हे घडले आहे. यात बलात्काराचे ७८ गुन्हे आहेत. यापैकी अल्पवयीन मुलींवरील बलात्काराचे ३६ गुन्हे, महिलांवरील बलात्काराचे ४२ गुन्हे आहेत. ऑगस्ट महिन्यात ३३६ गुन्हे हे महिलांच्या बाबत घडले होते. ३३ अल्पवयीन मुलींवर आणि २२ महिलांवर बलात्कार झाले होते. सप्टेंबर महिन्यात मुंबई शहरात अल्पवयीन मुलींच्या अपहरणाच्या ७७ घटना घडल्या. यामध्ये ४२ अल्पवयीन मुलींची सुखरूप सुटका पोलिसांनी केली आहे. विनयभंगाचे १९९ गुन्हे, हुंडाबळीमुळे आत्महत्या होण्याचे २ गुन्हे, हुंड्यासाठी शारीरिक व मानसिक छळवणूकसंदर्भात ४६ गुन्हे, असे एकूण ४५९ गुन्हे नोंदण्यात आले. तर, २६९ प्रकरणांचा पोलिसांनी तपास पूर्ण केला आहे.
जानेवारी ते सप्टेंबर या काळात महिलांवरील अत्याचाराचे ३ हजार ३७ गुन्हे मुंबईतील ९४ पोलीस ठाण्यांत नोंदविण्यात आले आहेत. गेल्या 9 महिन्यांत मुंबईत 309 अल्पवयीन मुलींवर बलात्कार झाले आहे. तसेच 218 महिलांवरील बलात्काराच्या घटना घडल्या आहेत. अल्पवयीन मुलींच्या अपहरणाचे 540 गुन्हे आतापर्यंत दाखल झाले आहे.
राज्य महिला आयोगाकडे तक्रारी वाढल्या
राज्य महिला आयोगाकडे सप्टेंबर महिन्यापर्यंत राज्यभरातून एकूण १९८ तक्रारी प्राप्त झाल्या. यात औरंगाबाद विभागातून ११ , अमरावती विभागातून १४, नाशिक ०९ , पुणे विभागातून ३६ , कोकण विभागातून २५ , नागपूर विभागातून ०८ तर मुंबईतून ६३ घरगुती हिंसाचाराच्या तक्रारी राज्य महिला आयोगाकडे प्राप्त झाल्या आहेत. त्याचबरोबर राज्य महिला आयोगाकडे ३२ अशा तक्रारी प्राप्त झाल्या आहेत. यामध्ये जिल्हा किंवा विभागाचा उल्लेख करण्यात आलेला नाही.
