कोरोनाचा राज्याला विळखा होतो घट्ट; 'आकडा' ऐकून काळजात भरेल धडकी

राज्यभरात कोरोना संसर्ग वेगाने फैलावत असल्याचे आकडेवारीवरुन उघड झाले आहे. कुठे हा वेग दुप्पट आहे, तर कुठे हा वेग तिप्पटीने वाढल्याचे स्पष्ट झाले आहे. सोलापूर, यवतमाळ या जिल्ह्यात हा वेग तिपटीने वाढल्याने प्रशासनाची डोकेदुखी वाढली आहे.

मुंबई - कोरोना संसर्गाने देशभरात संचारबंदी लागू करण्यात आली आहे. मात्र तरीही नागरिक घराबाहेर पडून गर्दी करत आहेत. त्यामुळे कोरोना संसर्गाचा फैलाव वेगाने होत आहे. त्यामुळे प्रशासनाची डोकेदुखी वाढली आहे. राज्यातील मुंबई, पुणे, यवतमाळ, सोलापूर आदी ठिकाणी प्रचंड प्रमाणात रुग्ण वाढले आहेत. या जिल्ह्यांमध्ये रुग्णवाढीचा वेग धडकी भरवणारा आहे.

राज्य नियंत्रण कक्षाने १९ एप्रिलला जाहीर केलेल्या आकडेवारीनुसार, राज्यात 4200 कोव्हीड 19 विषाणुचे पॉझिटीव्ह रुग्ण होते. तर, 223 रुग्णांचा मृत्यू झाला होता. आठवडाभरात यामध्ये मोठी वाढ झाली. 26 एप्रिलला जाहीर करण्यात आलेल्या आकडेवारीनुसार राज्यात 8068 पॉझिटीव्ह रुग्णांची नोंद झाली. तर, 342 जणांचा मृत्यू झाला. राज्यात जवळपास दुप्पटीने रुग्ण वाढले आहेत. हे आकडे राज्य सरकारची चिंता वाढवणारे आहेत. केंद्रीय आरोग्य विभागाच्या पत्रकार परिषदेत पुण्यातील परिस्थितीबाबत चिंता व्यक्त करण्यात आली. पुण्यात 9 चाचण्यांमागे 1 रुग्णाचा अहवाल पॉझिटीव्ह निघत आहे. तर देशात हेच प्रमाण 23 मागे 1 रुग्ण असे आहे.

राज्याच्या एकूण‍ स्थितीचा विचार केल्यास पुणे, ठाणे, सोलापूर आणि यवतमाळ जिल्ह्यांमध्ये परिस्थिती चिंताजनक आहे. पुणे आणि ठाण्यात रुग्णसंख्या दुप्पट झाली आहे. तर यातुलनेत सोलापूर आणि यवतमाळ जिल्ह्यांमध्ये रुग्णसंख्या तिप्पटीने वाढली आहे. ज्या जिल्ह्यांमध्ये एकही रुग्ण नव्हता, तिथेही रुग्ण आढळू लागले आहेत. नांदेड आणि भंडारा हे जिल्हे ग्रीन झोनमधून बाहेर निघाले आहेत. त्यामुळे कोरोना विषाणू राज्याला झपाट्याने विळखा घालत असल्याचे दिसून येत आहे.

राज्यात 19 एप्रिलला 87 हजार 254 नागरिकांना होम क्वारंटाईन करण्यात आले होते. 6 हजार 743 नागरिकांना संस्थात्मक क्वारंटाईन करण्यात आले होते. कोरोना रुग्ण सापडलेल्या राज्यातील 368 भागाला कंटेनमेंट जाहीर करण्यात आले होते. तर, 19 एप्रिलला जाहीर केलेल्या आकडेवारीनुसार 1 लाख 36 हजार 926 जणांना होम क्वारंटाईन करण्यात आले असून 9 हजार 160 जणांना संस्थात्मक क्वारंटाईन करण्यात आले आहे.

राज्यात कोरोनामुळे झालेले मृत्यू

19 एप्रिलला राज्यात 12 रुग्णांचा मृत्यू झाला होता. यात मुंबईतील 6 आणि मालेगाव येथील 4 तर सोलापूर आणि जामखेड येथील प्रत्येकी एका रुग्णांचा समावेश होता. मृतात 4 पुरुष तर 8 महिलांचा समावेश होता. त्यातील 8 रुग्णांना मधुमेह, उच्च रक्तदाब, हृदयरोग असे आजार असल्याचेही पुढे आहे आहे. 19 एप्रिलला राज्यात झालेल्या मृतांची संख्या 223 झाली होती.

दरम्यान एका आठवड्यानंतर यात मोठी वाढ झाली आहे. यात 26 एप्रिलला राज्यात एकूण 19 कोरोना बाधित रुग्णांचा मृत्यू झाला आहे. या मृतांमध्ये मुंबईतील 12 रुग्णांचा समावेश आहे. यात 11 पुरुष तर 8 महिलांचा मृत्यू झाला आहे. 15 रुग्णापैकी 11 जणांना मधुमेह, उच्चरक्तदाब, हृदयरोग, क्षयरोग अशाप्रकारचा आजार होता. आजच्या 19 रुग्णांच्या मृत्यूने राज्यातील मृतांचा आकडा 342 इतका झाला आहे.

मुंबईमध्ये आतापर्यंत 204 जणांचा कोरोनामुळे मृत्यू झाला आहे. एका आठवड्यापूर्वी हा आकडा 132 इतका होता. तर ठाण्यात कोरोनामुळे झालेल्या मृत्यूचा आकडा एका आठवड्यापूर्वी 9 होता, तो वाढून तब्बल 14 झाला. त्यामुळे मुंबई मंडळात एकूण 223 रुग्णांना कोरोनामुळे आपला जीव गमवावा लागला आहे. पुणे मंडळात आतापर्यंत 83 नागरिकांना आपला जीव गमवावा लागला आहे. हा आकडा कितीतरी पटीने वाढला आहे. हीच स्थिती राज्यातील इतरही जिल्ह्यात आहे. 26 एप्रिलला राज्यात कोरोना बाधिताचा आकडा 8068 इतका होता, तर 342 जणांना कोरोनामुळे जीव गमवावा लागला आहे. त्यामुळे नागरिकांनी कोरोना संसर्ग टाळण्यासाठी घरातच सुरक्षित राहुन प्रशासनाला सहकार्य करणे गरजेचे आहे.

कोरोनामुळे होम क्वारंटाईन झालेले नागरिक

कोरोनामुळे होम क्वारंटाईन असलेल्या रुग्णांची संख्या 19 एप्रिलला 87 हजार 254 इतकी होती. ती एका आठवड्यानंतर वाढून तब्बल 1 लाख 36 हजार926 इतकी झाली. तर 9 हजार 160 नागरिकांना संस्थात्मक क्वारंटाईन करण्यात आले.

प्रयोगशाळा नमुने तपासण्यासाठी लागली रांग

कोरोना संसर्ग झालेल्या नागरिकांच्या सानिध्यात आल्यानंतर कोरोनाची लागण होते. मात्र कोरोनाचे लक्षण लवकर दिसत नसल्याने नागरिकांमध्ये दहशत पसरली आहे. कोरोना संसर्ग झाल्याची तपासणी करण्यासाठी बाधिताच्या स्त्राव प्रयोगशाळेत पाठवले जातात. 19 एप्रिलपर्यंत 72, 023 नमुने प्रयोगशाळेत तपासणीसाठी पाठवण्यात आले होते. त्यापैकी 67,673 नमुने निगेटिव्ह आले आहेत. तर 4200 नमुने पॉझिटिव्ह आल्याची आले आहेत.

एका आठवड्यानंतर कोरोना संसर्गाचा फैलाव दुपटीने झाल्याचे स्पष्ट झाले. 19 एप्रिलला 72, 023 नमुने प्रयोगशाळेत तपासणीसाठी पाठवण्यात आले होते, हा आकडा वाढून 1 लाख 16 हजार, 345 इतका झाला. यातील 1 लाख 07 हजार 519 जणांचे नमुने निगेटिव्ह आले आहेत. तर 8 हजार 068 रुग्णांना कोरोना संसर्गाने बाधित केल्याची धक्कादायक बाब पुढे आली आहे.

जिल्ह्यांची नावे 19 एप्रिल 26 एप्रिल

मुंबई	2724		5407
पुणे	611		1052
ठाणे	343		738
नाशिक	87		131
यवतमाळ	14		48
सोलापूर	15		47
अमरावती	6		20
सातारा	11		29
अहमदनगर	21		36
नागपूर	69		107