मुंबई - मालेगाव बॉम्बस्फोटातील आरोपी प्रज्ञा ठाकूरच्या उमेदवारीचे भाजपकडून समर्थन केले जात आहे. हे पाहता, नथुराम गोडसे जिवंत असता तर त्यालाही भाजपने उमेदवारी दिली असती, अशी टीका महाराष्ट्र प्रदेश काँग्रेस कमिटीचे सरचिटणीस व प्रवक्ते सचिन सावंत यांनी केली.
प्रज्ञा ठाकूरवर दहशतवादाचे गंभीर आरोप आहेत. सध्या ती केवळ जामीनावर सुटलेली आहे. तिच्यावर असलेले गुन्हे पाहता एवढ्या मोठ्या आरोपातून सुटका होऊ शकत नाही. दहशतवादाचे गंभीर गुन्हे ज्या व्यक्तीवर आहेत, त्याच्या उमेदवारीचे भाजप निर्लज्जपणे समर्थन करत आहे. शहीद हेमंत करकरे यांना देशद्रोही म्हणण्यापर्यंत या बाईची मजल गेली. परंतु शहिदांच्या बलिदानावर राजकीय पोळ्या भाजणाऱ्या भाजप, पंतप्रधान मोदी आणि मुख्यमंत्री फडणवीस यांनी देशाची माफी मागावी असे वाटले नाही.
शहीद हेमंत करकरेंना देशद्रोही म्हणून प्रज्ञा ठाकूर व भाजपने देशाचाही अपमान केला आहे. देशभरातून यावर तीव्र संताप व्यक्त झाल्यानंतर प्रज्ञा ठाकूरने माफी मागितली. मात्र, यातून भाजप सुटका करुन घेऊ इच्छित आहे. तसेच प्रज्ञा ठाकूरचे ते मत व्यक्तिगत आहे, अशी पळवाट काढून भाजपचे नेते आपले काळे झालेले तोंड झाकण्याचा प्रयत्न करत आहेत. परंतु, प्रज्ञा ठाकूरची हकालपट्टी आणि पंतप्रधान नरेंद्र मोदींनी देशाची माफी मागितल्याशिवाय या पापातून भाजपची मुक्तता होणार नाही, असे सावंत म्हणाले.
प्रज्ञा ठाकूरला दिलेल्या उमेदवारीवरून हे स्पष्ट होते की, दहशतवादाला छुपे समर्थन हे भाजपच्या कार्यपद्धतीचाच भाग आहे. प्रज्ञा ठाकूरला न्यायालयात झालेली मदत, सनातनवर कारवाई करण्यातील बोटचेपे धोरण हे भाजपची विचारधारा दर्शवते. हे सर्व पाहता नथुराम गोडसे जर जिवंत असता तर त्यालाही भाजपची उमेदवारी मिळाली असती असे वाटते. तसेच भविष्यात भाजपने डॉ. नरेंद्र दाभोलकर,गोविंद पानसरे, गौरी लंकेश आणि कलबुर्गी यांच्या मारेकऱ्यांनाही उमेदवारी दिल्याचे दिसून येईल, असेही सचिन सावंत म्हणाले.
