हैदराबाद : तरुण आणि वृद्ध व्यापाऱ्यांपासून ते फेरीवाल्यांपर्यंत सर्वच वर्ग आजकाल युपीआयने पेमेंट करत आहेत. आता प्रत्येकजण खिशात नाही तर मोबाईल फोनमध्ये पैसे बाळगत आहे. तुम्ही फक्त कोड स्कॅन करा किंवा तुमचा मोबाइल नंबर टाका आणि एका क्षणात पेमेंट करा. मात्र आता असे करताना सावधानता बाळगा. जर तुम्ही एक छोटीशी जरी चूक केली तर तुम्ही तुमचे कष्टाने कमावलेले पैसे गमावून बसाल. त्यामुळे फसवणूक करणाऱ्यांना दूर ठेवण्यासाठी हे उपाय करा.
क्युआर स्कॅन केल्यानंतर पुष्टी करा : युनिफाइड पेमेंट्स इंटरफेस (UPI) ने आता रोख व्यवहार पूर्णपणे डिजिटल झाले आहेत. मात्र जर तुम्ही युपीआय पेमेंट करताना निष्काळजी असाल तर तुम्हाला अनपेक्षित अडचणींना सामोरे जावे लागेल. आपण जेव्हा एखादी वस्तू खरेदी करतो तेव्हा आपण क्युआर (QR) कोडने पेमेंट करतो. एकदा हे स्कॅन झाल्यानंतर, दुकानदाराला तपशीलांची पुष्टी करण्यास सांगा. पुष्टीकरणानंतर, तुम्ही तुमचे पैसे ट्रान्सफर करायला हवेत.
युपीआय पेमेंटसाठी सहा अंकी पिन वापरा : अधिक सुरक्षेसाठी युपीआय पेमेंट करताना शक्यतो सहा अंकी पिन वापरा. अनेक लोक सहज आठवण रहावा म्हणून चार अंकी पिन वापरतात. अ‍ॅप उघडण्यासाठी तुम्हाला एक विशेष पिन तयार करावा लागेल किंवा फिंगरप्रिंट बायोमेट्रिक्स वापरावे लागतील. फसवणूक करणाऱ्यांना तुमची आर्थिक माहिती चोरण्यापासून रोखण्यासाठी तुम्ही किती अतिरिक्त काळजी घेत आहात हे खूप महत्त्वाचे आहे.
ऑनलाईन फसवणूकीपासून सावध रहा : अनेक वेळा ऑनलाईन फसवणूक करणारे तुम्हाला मेसेज पाठवतात की, ते तुम्हाला पैसे पाठवत आहेत. ते तुम्हाला एक कोड स्कॅन करून तुमचा पिन टाकण्यास सांगतात. हे कधीही करू नका. हे नेहमी लक्षात ठेवा की जेव्हा तुम्ही एखाद्याला पैसे पाठवताना किंवा खरेदी करताना क्युआर कोड स्कॅन करता तेव्हाच तुम्हाला युपीआय पिन टाकावा लागतो. पेमेंट प्राप्त करण्यासाठी कोणताही पिन टाकण्याची आवश्यकता नाही.
थर्ड पार्टी अ‍ॅप्स वापरणे टाळा : बँका थेट युपीआय पेमेंटला देखील परवानगी देतात, म्हणून पेमेंटसाठी ते शक्य तितके वापरण्याचा प्रयत्न करा. थर्ड पार्टी अ‍ॅप्स वापरणे शक्यतो टाळा. तुमच्या मोबाईलमध्ये एकापेक्षा अधिक यपीआय अ‍ॅप्स शक्यतो ठेवू नका. युपीआय व्यवहार पूर्ण केल्यानंतर बँकेकडून आलेला एसएमएस काळजीपूर्वक तपासा. युपीआयशी जोडलेल्या क्रेडिट कार्डद्वारे पेमेंट करण्याची सुविधा बँका देत आहेत. या सुविधेचा लाभ घेणाऱ्यांना ते अशा पेमेंटसाठी कोणते बचत खाते आणि क्रेडिट कार्ड वापरत आहेत हे स्पष्टपणे माहित असले पाहिजे.
हेही वाचा : Tips For Women : महिलांनो आर्थिकदृष्ट्या स्वावलंबी व्हा, या आहेत खास टिप्स
