भोपाळ - लोकसभा निवडणुकांना केवळ १५ दिवस शिल्लक आहेत. सोमवारी पहिल्या टप्प्यातील नामांकन प्रक्रिया पार पडली. अनेक दिग्गज नेत्यांनी नामनिर्देशन पत्र भरले आहेत. मात्र, सर्वात मोठी लढत ही भोपाळ लोकसभा मतदार संघात ६व्या टप्प्यात होणार आहे. या मतदार संघात काँग्रेस नेते दिग्विजय सिंहांना भाजपकडून मोठे चॅलेंज मिळण्याची शक्यता आहे.
भोपाळच्या लोकसभा मतदार संघातून काँग्रेसने माजी मुख्यमंत्री दिग्विजय सिंहाना उमेदवारी दिली आहे. या जागेवर भाजपही मजबूत उमेदवार देणार, अशी चर्चा सुरू आहे. भाजप यासाठी मध्यप्रदेशचे माजी मुख्यमंत्री शिवराज सिंह चौहान यांना रिंगणात उतरवू शकते.
भोपाळ मतदार संघात दिग्विजय सिंहाना उमेदवारी मिळाल्यानंतर भाजपच्या पारड्यात मोठी खळबळ उठली होती. कारण दिग्विजय सिंहांना मध्यप्रदेशामध्ये निवडणूक लढवण्याचा आणि लढण्याचा मोठा अनुभव आहे. तेथील कार्यकर्त्यांवर दिग्विजय सिंहांची मोठी पकड आहे, असे म्हटले जाते. त्यामुळेच मागील ३५ वर्षांपासून भाजपच्या ताब्यात असलेल्या भोपाळच्या जागेसाठी पक्षात तारांबळ उडालेली आहे.
तर, काँग्रेसने नुकतेच मध्यप्रदेश विधानसभा निवडणुकांमध्ये मोठ्याप्रमाणात विजय संपादन केले आहे. त्यामुळे भाजप आधीच चिंतेत डुबलेली आहे. परंतु, असे असतानाही भाजप या जागेसाठी मोठी खेळी खेळणार, असे चित्र आहे. म्हणून या जागेवर भाजप शिवराज सिंहांवर डाव लावण्याची शक्यता आहे.
