नवी दिल्ली - लोकनायक रुग्णालयात मरण पावलेल्या ५० वर्षीय व्यक्तीच्या कुटुंबीयांनी रुग्णालयाने उपचारामध्ये हलगर्जीपणा केल्याचा आरोप केला आहे. मोईजुद्दीन असे मृत्यू झालेल्या रुग्णाचे नाव आहे. मृत्यूच्या चार दिवसानंतरही मृतदेह रुग्णालयाने ताब्यात दिला नाही, असा आरोपही या कुटुंबाने केला आहे.
हृदयविकाराचा रुग्ण असलेल्या मोईजुद्दीनला रक्तदाब कमी झाल्यावर सुरुवातीला जेबी पंत रुग्णालयात दाखल करण्यात आले होते. त्यानंतर प्रकृती चिंताजनक झाल्यानंतर त्याला लोकनायक रुग्णालयात रेफर करण्यात आले. लोकनायक येथे अधिकाऱ्यांनी आम्हाला सांगितले की, रुग्णाची कोविड चाचणी करण्यात येईल. रुग्णालयातील कर्मचारी उपचारात उशीर करतच राहिले आणि माझा भाऊ मरण पावला, असे त्याचा भाऊ अजाजुद्दीन यांनी सांगितले आहे.
ते पुढे म्हणाले, मृत्यूनंतर माझ्या भावाचे कोविड नमुने घेण्यात आले होते. परंतु, अधिकाऱ्यांनी आम्हाला तो मृतदेह दिला नाही. नंतर मृतदेह शवागृहात पाठवण्यात आला.
जर रुग्णालयाच्या अधिकाऱ्यांनी वेळीच उपचार सुरू केले असते. तर माझा भाऊ आज जिवंत असता. त्यांनी आम्हाला कोविड चाचणी करण्याचा आग्रह धरला आणि उपचारांना उशीर केला, असे मृताच्या भावाने सांगितले आहे.
कुटुंबियांनी असा दावा केला की, रुग्णाच्या मृत्यूनंतर 4 दिवसांनीही रुग्णालयाने मृतदेह कुटूंबियांच्या ताब्यात दिला नाही. अंत्यसंस्कार करण्यास तयार असतानाही त्यांनी मृतदेह दिला नाही.
