തിരുവനന്തപുരം: കേരള ചലച്ചിത്ര അക്കാദമി അധപതിച്ചെന്ന കെബി ഗണേഷ്‌കുമാര്‍ എംഎല്‍എയുടെ വിമര്‍ശനത്തിന് മറുപടിയുമായി അക്കാദമി ചെയര്‍മാന്‍ രഞ്ജിത്ത്. കാര്യങ്ങള്‍ നേരിട്ട് ബോധ്യപ്പെടാന്‍ ഗണേഷിന് അക്കാദമി ഓഫിസ് സന്ദര്‍ശിക്കാമെന്നും പറയാന്‍ പാടില്ലാത്ത പരാമര്‍ശമാണ് ഗണേഷ് നടത്തിയതെന്നും രഞ്ജിത്ത് പറഞ്ഞു. ഗണേഷിനെതിരെ അക്കാദമിയുടെ പ്രവര്‍ത്തനങ്ങള്‍ എണ്ണിപ്പറഞ്ഞായിരുന്നു രഞ്ജിത്തിന്‍റെ മറുപടി.
ഗണേഷിന് അറിവില്ലാത്തത് കൊണ്ടോ ആരോ തെറ്റിദ്ധരിപ്പിച്ചതോ ആകാം. കാര്യങ്ങള്‍ നേരിട്ട് ബോധ്യപ്പെടാന്‍ അക്കാദമി ഓഫിസ് സന്ദര്‍ശിക്കാമെന്നും രഞ്ജിത്ത് പറഞ്ഞു. ഇന്നലെ നിയമസഭ പുസ്‌തക മേളയിലെ സിനിമയെ കുറിച്ചുള്ള ചര്‍ച്ചയിലാണ് മുന്‍ സിനിമ മന്ത്രി കൂടിയായ ഗണേഷ് കുമാര്‍ ചലച്ചിത്ര അക്കാദമിയെ രൂക്ഷമായി വിമര്‍ശിച്ചത്.
ഫെസ്‌റ്റിവല്‍ നടത്താനും ഫിലിം അവാര്‍ഡ് കൊടുക്കാനുമുള്ള ഓഫിസ് ആയി ചലച്ചിത്ര അക്കാദമി അധപതിച്ചു. സിനിമയെ അടുത്തറിയാനും സിനിമയുടെ പാഠം ഉള്‍ക്കൊള്ളാനും സഹായിക്കുന്നതാകണം അക്കാദമിയുടെ പ്രവര്‍ത്തനം. അടുത്ത തലമുറക്ക് സിനിമയെ പഠിക്കാനും റിസര്‍ച്ച് ചെയ്യാനുമുള്ള സെന്‍ററായി അക്കാദമി നിലനില്‍ക്കണമെന്നും ഗണേഷ് കുമാര്‍ ചൂണ്ടിക്കാട്ടി.
27-ാമത് ഐഎഫ്എഫ്‌കെ അവസാനിച്ചപ്പോള്‍ വളരെയധികം വിമര്‍ശനം ഏറ്റുവാങ്ങിയ ആളായിരുന്നു രഞ്ജിത്ത്. ഐഎഫ്എഫ്‌കെ സമാപന വേദിയില്‍ രഞ്ജിത്തിനെ കൂവി വിളിച്ച് പ്രതിഷേധിച്ച പ്രതിനിധികളെ നായ്ക്കളോട് ഉപമിച്ചത് വലിയ പ്രതിഷേധത്തിന് ഇടയാക്കിയിരുന്നു. ഇതിന് പിന്നാലെയാണ് ഗണേഷ് കുമാറിന്‍റെ വിമര്‍ശനം.
