കോഴിക്കോട്: കൊടുവള്ളിയിൽ ടാങ്കർ ലോറി മറിഞ്ഞ് ഗതാഗതം തടസപ്പെട്ടു(Tanker Lorry Accident ). ടര്‍പ്പന്‍റൈന്‍ ഓയില്‍ കയറ്റി വന്ന ടാങ്കർ ലോറിയാണ് മറിഞ്ഞത്. വൈകുന്നേരം മൂന്നരയോടെയായിരുന്നു അപകടം. കോഴിക്കോട് വയനാട് ദേശീയപാതയിൽ താഴെ കൊടുവള്ളിയിൽ വച്ചാണ് അപകടം നടന്നത്. അപകടത്തെ തുടർന്ന് ടാങ്കർ ലോറിയിൽ ഉണ്ടായിരുന്ന ടര്‍പ്പന്‍റൈന്‍ ഓയിൽ റോഡിലാകെ പരന്നൊഴുകി.
കൊടുവള്ളി പോലീസ് സ്ഥലത്തെത്തി ഇതുവഴി വന്ന വാഹനങ്ങളെ വൺവേ അടിസ്ഥാനത്തിൽ കടത്തിവിട്ടു. നരിക്കുനിയിൽ നിന്നും എത്തിയ അഗ്നി ശമനസേന യൂണിറ്റ് അംഗങ്ങൾ ക്രെയിൻ ഉപയോഗിച്ച് റോഡിൽ മറിഞ്ഞു കിടക്കുന്ന ടാങ്കർ നീക്കം ചെയ്യാനുള്ള ശ്രമം തുടങ്ങി.കൂടാതെ റോഡിൽ പരന്നു കിടക്കുന്ന ഓയിൽ നീക്കം ചെയ്യാനുള്ള ശ്രമങ്ങളും അഗ്നിശമനസേന യൂണിറ്റ് അംഗങ്ങൾ ആരംഭിച്ചു.
