കുറ്റ്യാടിയിലെ പ്രതിഷേധം; പ്രാദേശിക നേതാക്കൾക്കെതിരെയും നടപടി

കുറ്റ്യാടിയിലെ വിമത നീക്കത്തിന് ഒത്താശ നൽകിയെന്നാരോപിച്ച് കുറ്റ്യാടി എംഎൽഎ കുഞ്ഞമ്മദ് കുട്ടിയെ ജില്ലാ സെക്രട്ടേറിയറ്റിൽ നിന്നും തരംതാഴ്‌ത്തിയിരുന്നു. ഇതിന് പിന്നാലെയാണ് പ്രാദേശിക നേതാക്കൾക്കെതിരെയും നടപടി വരുന്നത്.

കോഴിക്കോട്: നിയമസഭ തെരഞ്ഞെടുപ്പ് വേളയിലെ പരസ്യ പ്രതിഷേധത്തിൽ കുറ്റ്യാടിയിലെ പ്രാദേശിക നേതാക്കൾക്കെതിരെയും സിപിഎം നടപടി വരുന്നു. മൂന്ന് ഏരിയ കമ്മിറ്റി അംഗങ്ങളോട് പാർട്ടി വിഷയത്തിൽ വിശദീകരണം തേടി. ഏരിയ കമ്മറ്റി അംഗങ്ങളായ ടി കെ മോഹൻദാസ്, കെ പി ചന്ദ്രൻ, കുന്നുമ്മൽ കണാരൻ എന്നിവരോടാണ് പാർട്ടി വിശദീകരണം തേടിയത്.

രണ്ടു ലോക്കൽ കമ്മിറ്റികളിലെ നേതാക്കൾക്കെതിരെയും അച്ചടക്ക നടപടിക്ക് സാധ്യതയുണ്ട്. കെ.പി കുഞ്ഞമ്മദ് കുട്ടി എംഎൽഎയെ തരംതാഴ്‌ത്തിയതിന് പിന്നാലെയാണ് കീഴ്ഘടകങ്ങളിലെ നേതാക്കൾക്കെതിരെയും നടപടി വരുന്നത്. കുറ്റ്യാടി സീറ്റ് കേരള കോൺഗ്രസിന് നൽകിയതിൽ പ്രതിഷേധിച്ചു നടന്ന പരസ്യപ്രകടനമാണ് നടപടികളിലേക്ക് നയിച്ചത്.

സിപിഎം എംഎൽഎയെ പാർട്ടി തരംതാഴ്‌ത്തി

കുറ്റ്യാടിയിലെ വിമത നീക്കം സിപിഎം ജില്ലാ കമ്മിറ്റിയുടെ തെരഞ്ഞെടുപ്പ് അവലോകന യോഗം ചേരുകയും ചർച്ചക്കൊടുവിൽ കുഞ്ഞമ്മദ് കുട്ടി ജില്ലാ സെക്രട്ടേറിയറ്റിൽ നിന്നും ഒഴിവാക്കാൻ പാർട്ടി തീരുമാനിക്കുകയുമായിരുന്നു. എന്നാൽ പാ‍ർട്ടി തീരുമാനത്തിനെതിരെ കുഞ്ഞമ്മദ് കുട്ടി അപ്പീൽ നൽകി.

പാർട്ടി നയത്തിന് വിരുദ്ധമായുള്ള അച്ചടക്ക ലംഘനത്തിൽ പാർട്ടി കമ്മിഷനെ വച്ച് അന്വേഷണം നടത്തിയ ശേഷമാണ് സിപിഎം സാധാരണ നടപടിയെടുക്കാറുള്ളത്. എന്നാൽ അന്വേഷണ കമ്മിഷനോ മറ്റു റിപ്പോർട്ടുകളോ ഇല്ലാതെയാണ് കുഞ്ഞമ്മദ് കുട്ടി എംഎൽഎയെ സിപിഎം ജില്ലാ നേതൃത്വം സെക്രട്ടേറിയറ്റിൽ നിന്നും ഒഴിവാക്കിയത്.

കുറ്റ്യാടി സീറ്റിലുണ്ടായ സീറ്റ് പ്രശ്‌നം

നിയമസഭാ തെരഞ്ഞെടുപ്പിൽ മണ്ഡലത്തിൽ വേരോട്ടമില്ലാത്ത കേരള കോൺ​ഗ്രസ് മാണി വിഭാ​ഗത്തിന് കുറ്റ്യാടി സീറ്റ് മത്സരിക്കാനായി വിട്ടു നൽകിയതിൽ പ്രതിഷേധിച്ചാണ് കുറ്റ്യാടിയിൽ ആയിരങ്ങൾ റോഡിലിറങ്ങിയത്. ഒടുവിൽ സിപിഎം ഏറ്റെടുത്ത സീറ്റിൽ കുഞ്ഞമ്മദ് കുട്ടി മാസ്റ്ററെ തന്നെ മത്സരിപ്പിക്കാൻ തീരുമാനിക്കുകയായിരുന്നു.