കോട്ടയം: സിനിമ മേക്കപ്പ് ആർട്ടിസ്റ്റിനെ ആക്രമിച്ച കേസിൽ മറ്റ് രണ്ട് പ്രതികള്‍ കൂടി പിടിയില്‍. വൈക്കം കാട്ടിക്കുന്ന് ചാലുതറ സി.കെ അനന്തു ( 24), ഇത്തിപ്പുഴ തൂമ്പുങ്കൽ വീട്ടിൽ അഖിൽ സന്തോഷ് (25) എന്നിവരെ തലയോലപ്പറമ്പ് പൊലീസാണ് പിടികൂടിയത്. കുലശേഖരമംഗലം ശാരദാമഠം പ്രദേശത്തെ സപ്‌തസ്വര നിവാസിൽ ധനുഷ് ഡാർവിനെ (27) തിങ്കളാഴ്‌ച(25.07.2022) തലയോലപ്പറമ്പ് പൊലീസ് അറസ്‌റ്റ് ചെയ്‌തിരുന്നു.
ജോലി കഴിഞ്ഞ് വരുന്നതിനിടെയാണ് മേക്കപ്പ് ആർട്ടിസ്റ്റ് മിഥുൻ ജിത്ത് ആക്രമണത്തിന് ഇരയായത്. ജൂലൈ 22 ന് മണിശേരിയിലുള്ള ഷൂട്ടിങ് സെറ്റിന് സമീപത്ത് വച്ചാണ് സംഭവം. പിടിയിലായവരുടെ നേതൃത്വത്തിലുള്ള സംഘം കമ്പിവടി, ഇടിക്കട്ട, പട്ടിക കഷണം, ഹെൽമെറ്റ് എന്നിവയുമായി എത്തിയാണ് മിഥുന് നേരെ തിരിഞ്ഞത്. ആക്രമണത്തിന് ശേഷം പ്രതികൾ ഒളിവിൽ പോവുകയായിരുന്നു. തുടർന്ന്, ജില്ല പൊലീസ് മേധാവി കെ കാർത്തിക്കിന്‍റെ നേതൃത്വത്തിൽ തെരച്ചിൽ ഊര്‍ജിതമാക്കിയതിനെ തുടര്‍ന്നാണ് പ്രതിയെ പിടികൂടിയത്.
