മുഖ്യമന്ത്രിയുടെ നിലപാട് ദൗർഭാഗ്യകരം: പി.എസ്.ശ്രീധരൻപിള്ള

കേന്ദ്രത്തിന്‍റെ പണം വാങ്ങി ഹൈവേ വികസനം സിപിഎം - കോൺഗ്രസ് സർക്കാറുകൾ അട്ടിമറിക്കുകയാണെന്ന് ശ്രീധരന്‍ പിള്ള

കണ്ണൂർ: ദേശീയ പാതയുടെ വീതി 30 മീറ്ററാക്കാൻ ഡൽഹിയിൽ അച്യുതാനന്ദൻ ഉൾപ്പെടെയുള്ള സർവകക്ഷി സംഘം നൽകിയ നിവേദനം സിപിഎം ഓർക്കണമെന്ന് ബിജെപി സംസ്ഥാന അധ്യക്ഷൻ അഡ്വ. പി.എസ്.ശ്രീധരൻപിള്ള. 19 കൊല്ലമായി കേന്ദ്രത്തിന്‍റെ പണം വാങ്ങി, ദേശീയ പാത വികസനം സിപിഎം-കോൺഗ്രസ് സർക്കാറുകൾ അട്ടിമറിക്കുകയാണെന്ന് പി.എസ്.ശ്രീധരൻപിള്ള കുറ്റപ്പെടുത്തി. വിഷയത്തിൽ മുഖ്യമന്ത്രിയുടെ നിലപാട് ദൗർഭാഗ്യകരമാണെന്നും അദ്ദേഹം തലശ്ശേരിയിൽ മാധ്യമങ്ങളോട് പറഞ്ഞു.

പ്രളയത്തിന്‍റെ പേരു പറഞ്ഞ് ദേശീയ പാത വികസനത്തിനുള്ള സ്ഥലമേറ്റെടുപ്പ് നിര്‍ത്തി വയ്ക്കണമെന്നാവശ്യപ്പെട്ട് പിഎസ് ശ്രീധരൻ പിള്ള കേന്ദ്രത്തിന് അയച്ച കത്ത് ധനമന്ത്രി തോമസ് ഐസക്ക് കഴിഞ്ഞ ദിവസം പുറത്തുവിട്ടിരുന്നു. എന്നാൽ പ്രളയ ദുരിതം അനുഭവിക്കുന്നവരുടെ ഭൂമി ദേശീയ പാത വികസനത്തിന് തൽക്കാലം ഏറ്റെടുക്കരുതെന്നാണ് താൻ കത്തിൽ ആവശ്യപ്പെട്ടതെന്ന അദ്ദേഹം പ്രതികരിച്ചിരുന്നു. ഇതിന് പിന്നാലെയാണ് പി.എസ്.ശ്രീധരൻപിള്ളയുടെ പ്രസ്താവന.