ഇടുക്കി: വിനോദ സഞ്ചാര മേഖലയായ ആമപ്പാറയിലേക്ക് കൂടുതൽ സഞ്ചാരികളെ ആകർഷിക്കാൻ ടൂറിസം വികസന പദ്ധതികൾ ഒരുക്കി ഇടുക്കി ജില്ല പഞ്ചായത്ത്. ഡി.ടി.പി.സിക്കു പുറമെയാണ് ജില്ല പഞ്ചായത്തിന്‍റെ ടൂറിസ വികസന പദ്ധതികൾ നടപ്പിലാക്കുന്നത്. രാമക്കൽമേട്ടിലും കാറ്റാടിപ്പാറയിലും എത്തുന്ന സഞ്ചാരികളെ മാടിവിളിക്കുന്ന ആമയുടെ ആകൃതിയിലുള്ള പാറയും പാറയുടെ അടിയിലൂടെ ഉള്ള സഞ്ചാരവുമൊക്കെയാണ് ആമപ്പാറയെ വിത്യസ്‌തമാക്കുന്നത്.
സാഹസിക സഞ്ചാരികളെ തേടി ആമപ്പാറ
പരന്നു കിടക്കുന്ന തമിഴ്‌നാടൻ ഗ്രാമങ്ങളുടെ കാഴ്‌ചയും, മറുവശത്ത് സഹ്യാദ്രി മലനിരകളുടെ കണ്ണെത്താദൂരത്തോളം ഉള്ള വശ്യതയും സഞ്ചാരികൾക്ക് നവ്യ അനുഭവമാണ് പകരുന്നത്. സാഹസിക സഞ്ചാരികളെ ഏറെ ആകർഷിക്കുന്നതാണിവിടം. സാഹസികത നിറഞ്ഞ ഓഫ് റോഡ് യാത്രയാണ് ആമപ്പാറയിലേക്ക് എത്താനുള്ള ഏകമാർഗം.
