എറണാകുളം : റോഡ് സുരക്ഷ ഉറപ്പാക്കുന്നതിന്‍റെ ഭാഗമായി സംസ്ഥാനത്ത് എഐ കാമറ ഡ്രോണില്‍ (Ai Drone Camera) ഉപയോഗിക്കുമെന്ന് ട്രാന്‍സ്‌പോര്‍ട്ട് കമ്മിഷണര്‍ എസ് ശ്രീജിത്ത് (S Sreejith). ഒരു ജില്ലയില്‍ കുറഞ്ഞത് 10 എഐ കാമറകള്‍ ഡ്രോണില്‍ സ്ഥാപിച്ച് നിരീക്ഷണം നടത്തുന്നതിനാണ് ലക്ഷ്യമിടുന്നതെന്ന് എസ്. ശ്രീജിത്ത് വ്യക്തമാക്കി. ഗതാഗത വകുപ്പ് (Transport Department) നടപ്പിലാക്കുന്ന റോഡ് സുരക്ഷ പ്രവർത്തനങ്ങളെക്കുറിച്ച് കൊച്ചിയിൽ സംസാരിക്കുകയായിരുന്നു അദ്ദേഹം.
എഐ കാമറകള്‍ക്കായി പ്രത്യേക ഡ്രോണുകള്‍ നിര്‍മിക്കുന്നതിനെക്കുറിച്ച് വിവിധ ഏജന്‍സികളുമായി ചര്‍ച്ച നടത്തിക്കൊണ്ടിരിക്കുകയാണെന്നും അദ്ദേഹം വ്യക്തമാക്കി. സംസ്ഥാനത്ത് നിലവില്‍ 720 എഐ കാമറകളാണ് സ്ഥാപിച്ചിരിക്കുന്നത്. എഐ കാമറ സ്ഥാപിച്ചതോടെ ഭൂരിഭാഗം ബൈക്ക് യാത്രക്കാരും ഹെല്‍മറ്റ് ഉപയോഗിക്കുന്നുണ്ട്. കാര്‍ യാത്രക്കാര്‍ സീറ്റ് ബെല്‍റ്റും ധരിക്കുന്നുണ്ട്.
റോഡ് അപകടങ്ങള്‍ കുറച്ച് പരമാവധി പേരുടെ ജീവന്‍ സംരക്ഷിക്കുക എന്നതാണ് നിലപാട്. വാഹനാപകടങ്ങളില്‍ മരിക്കുന്നവരില്‍ 65 ശതമാനം പേരും ബൈക്കില്‍ യാത്ര ചെയ്യുന്നവരാണ്. അതില്‍ ഭൂരിഭാഗവും ബൈക്കിന് പിന്നില്‍ യാത്ര ചെയ്യുന്നവരായിരുന്നു. ഹെല്‍മറ്റ് നിര്‍ബന്ധമാക്കിയതോടെ തലയ്ക്ക് പരിക്കേറ്റ് മരിക്കുന്നവരുടെ എണ്ണത്തില്‍ കുറവുണ്ടായി. ഇന്ത്യയില്‍ ഹെല്‍മറ്റ് ഉപയോഗിക്കുന്ന കാര്യത്തില്‍ കേരളമാണ് മുന്നിലെന്നും ഗതാഗത കമ്മിഷണര്‍ പറഞ്ഞു.
റോഡപകടങ്ങൾ കുറയുന്നു : എഐ കാമറകളില്‍ കണ്ടെത്തിയ നിയമ ലംഘനവുമായി ബന്ധപ്പെട്ട കേസുകളില്‍ അപ്പീലിനായി പോര്‍ട്ടല്‍ ആരംഭിക്കും. കഴിഞ്ഞ മൂന്ന് മാസത്തിനിടെ സംസ്ഥാനത്തെ റോഡപകട മരണങ്ങളില്‍ 10 ശതമാനം കുറവുണ്ടായി. ഗതാഗത നിയമ ലംഘനങ്ങള്‍ക്കെതിരെ കര്‍ശന നടപടികള്‍ സ്വീകരിക്കുന്നതില്‍ ഫലം കാണുന്നു എന്നതിന്‍റെ സൂചനയാണിത്.
റോഡപകടത്തില്‍ ഒരാള്‍ പോലും മരിക്കരുത് എന്നതാണ് മുന്നിലുള്ള ലക്ഷ്യം. പ്രതിവര്‍ഷം 4000 പേരാണ് സംസ്ഥാനത്ത് റോഡപകടങ്ങളില്‍ മരിക്കുന്നത്. ഇരുപതിനായിരത്തോളം പേര്‍ക്ക് ഗുരുതര പരിക്കുകളും ഉണ്ടാകുന്നു. ഇത് പരമാവധി കുറയ്ക്കണം. അലക്ഷ്യമായി വാഹനമോടിച്ച് അപകടം ഉണ്ടാക്കുന്നവരുടെ ഡ്രൈവിങ് ലൈസന്‍സ് മൂന്ന് മാസത്തേക്ക് റദ്ദാക്കും.
ഇങ്ങനെ റദ്ദാക്കപ്പെടുന്നവരുടെ ലൈസന്‍സ് പുനഃസ്ഥാപിക്കുന്നതിന് മോട്ടോര്‍ വാഹന വകുപ്പിന്‍റെ സംസ്ഥാനത്തെ പ്രൊഫഷണല്‍ ട്രെയിനിങ് സ്ഥാപനമായ ഇന്‍സ്റ്റിറ്റ്യൂട്ട് ഓഫ് ഡ്രൈവേഴ്‌സ് ട്രെയിനിങ് ആന്‍റ് റിസര്‍ച്ച് (ഐ.ഡി.ടി.ആര്‍) സെന്‍ററില്‍ കോഴ്‌സില്‍ പങ്കെടുപ്പിക്കും. കൂടാതെ റോഡപകടങ്ങളില്‍ ഗുരുതരമായി പരിക്കേറ്റ് പാലിയേറ്റീവ് കെയറില്‍ കഴിയുന്നവരെ ഇവര്‍ പരിചരിക്കുകയും വേണം.
വാഹന ഇന്‍ഷുറസിന്‍റെ കാര്യത്തില്‍ പുതിയൊരു മാറ്റത്തിനായി സര്‍ക്കാര്‍ ശ്രമം ആരംഭിച്ചിട്ടുണ്ട്. മാന്യമായ രീതിയില്‍ അപകടമുണ്ടാക്കാതെ ഉപയോഗിക്കുന്ന വാഹനങ്ങളുടെ ഇന്‍ഷുറന്‍സ് തുക കുറയ്ക്കുകയും പതിവായി നിയമ ലംഘനം നടത്തുന്ന വാഹനങ്ങളുടെ പ്രീമിയം വര്‍ധിപ്പിക്കുകയും ചെയ്യുന്നതിനുള്ള ശ്രമമാണ് നടത്തുന്നത്.
ഗുരുതരമായ കുറ്റകൃത്യങ്ങളില്‍ ഉപയോഗിക്കുന്ന വാഹനങ്ങളുടെ ആര്‍സി റദ്ദാക്കുന്നതിനെക്കുറിച്ചും ഇന്‍ഷുറന്‍സ് പുതുക്കാതിരിക്കുന്നതിനും ആലോചിക്കുന്നുണ്ട്. രണ്ടു വാഹനങ്ങളുടെ ആര്‍സി ഇതിനകം റദ്ദാക്കിയിട്ടുണ്ട്. ഗതാഗത നിയമങ്ങള്‍ കൃത്യമായി പാലിച്ചാല്‍ അപകടങ്ങള്‍ ഒഴിവാക്കാമെന്നും എസ് ശ്രീജിത്ത് പറഞ്ഞു.
വാഹനങ്ങളില്‍ തീപിടിത്തമുണ്ടാകുന്ന പല സംഭവങ്ങളും സംസ്ഥാനത്ത് റിപ്പോര്‍ട്ട് ചെയ്യപ്പെടുന്നുണ്ട്. ഇതിന്‍റെ പശ്ചാത്തലത്തില്‍ വിദഗ്‌ധ സമിതിയുടെ നേതൃത്വത്തില്‍ പ്രത്യേക പഠനം നടത്തും. കേരള മോട്ടോര്‍ വാഹന വകുപ്പും ഫസ്റ്റ് എയ്‌ഡ് സംഘടനയും എസ്‌സിഎംഎസ് ഇന്‍സ്റ്റിറ്റ്യൂട്ട് ഓഫ് റോഡ് സേഫ്റ്റി ആന്‍റ് ട്രാന്‍സ് പോര്‍ട്ടേഷനും ചലച്ചിത്ര മേഖലയിലെ സിനിമാതാരങ്ങളും സംയുക്തമായാണ് വിവിധ റോഡ് സുരക്ഷാ ബോധവത്‌ക്കരണ പരിപാടികള്‍ സംഘടിപ്പിക്കുന്നത്.
യുവജനങ്ങള്‍ക്കിടയിലെ അപകടകരമായ വാഹന ഉപയോഗം നിയന്ത്രിക്കുന്നതിനും അവരില്‍ നല്ല റോഡ് സംസ്‌കാരം വളര്‍ത്തുന്നതിനും സമഗ്രമായ പ്രവര്‍ത്തന പദ്ധതികളാണ് സംസ്ഥാന സര്‍ക്കാര്‍ ആവിഷ്‌കരിച്ച് നടപ്പിലാക്കിവരുന്നതെന്നും ഗതാഗത കമ്മിഷണർ എസ്. ശ്രീജിത്ത് പറഞ്ഞു.
