ഹൈദരാബാദ് : ഏകദിന ക്രിക്കറ്റില്‍ സ്ഥിരതയാര്‍ന്ന പ്രകടനം നടത്തി ഇന്ത്യന്‍ ടീമില്‍ തന്‍റേതായ സ്ഥാനം നേടിയെടുത്ത താരമാണ് ശുഭ്‌മാന്‍ ഗില്‍. ഇന്ത്യ-ശ്രീലങ്ക ഏകദിന പരമ്പരയിലെ അവസാന മത്സരത്തില്‍ താരം സെഞ്ച്വറിയടിച്ചിരുന്നു. തുടര്‍ന്ന് കിവീസിനെതിരായ പരമ്പരയിലെ ആദ്യ മത്സരത്തില്‍ തന്നെ നൂറും കടന്ന് ഇരുന്നൂറ് റണ്‍സാണ് ഗില്‍ ഒറ്റയ്‌ക്ക് അടിച്ചെടുത്തത്.
ഹൈദരാബാദില്‍ 149 പന്ത് നേരിട്ട ഗില്‍ 208 റണ്‍സ് അടിച്ചുകൂട്ടി. 19 ഫോറുകളും 9 സിക്‌സുകളും അടങ്ങുന്നതായിരുന്നു ഗില്ലിന്‍റെ തകര്‍പ്പന്‍ ഇന്നിങ്‌സ്. ഏകദിനത്തില്‍ ഒരു ഇന്ത്യന്‍ താരം നേടുന്ന ഏഴാമത്തെ ഇരട്ട സെഞ്ച്വറിയായിരുന്നു ഇന്നലെ പിറന്നത്.
എന്നാല്‍ മത്സരത്തില്‍ ഇരട്ടസെഞ്ച്വറി നേടുന്നതിനെ കുറിച്ച് താന്‍ ചിന്തിച്ചിരുന്നില്ലെന്ന് മത്സരശേഷം ഗില്‍ പറഞ്ഞു. "ഇരട്ട സെഞ്ച്വറി നേടുന്നതിനെ കുറിച്ച് യഥാര്‍ഥത്തില്‍ ഞാന്‍ ചിന്തിച്ചിരുന്നത് പോലുമില്ല. 47ാം ഓവറില്‍ സിക്‌സറുകള്‍ നേടിയപ്പോഴാണ് എനിക്ക് അത് കഴിയുമെന്നുള്ള തോന്നലുണ്ടായത്.
ആ സമയത്തിന് മുന്‍പ് വരെ എന്നിലേക്ക് വന്നിരുന്ന പന്തുകളില്‍ നിന്ന് മാത്രമാണ് ഞാന്‍ റണ്‍സ് കണ്ടെത്താന്‍ ശ്രമിച്ചത്. ഫ്രീയായി കളിക്കുക എന്നത് മാത്രമായിരുന്നു എന്‍റെ ലക്ഷ്യം. പക്ഷേ മറുവശത്ത് വിക്കറ്റുകള്‍ വീണുകൊണ്ടിരുന്നപ്പോഴും എന്‍റെ സ്വതസിദ്ധമായ ശൈലിയില്‍ തന്നെ ഞാന്‍ കളിച്ചു.
