കാഠ്‌മണ്ഡു (നേപ്പാള്‍): ഇന്ത്യ- നേപ്പാള്‍ അതിര്‍ത്തിത്തര്‍ക്കം ചര്‍ച്ചയിലൂടെ പരിഹരിക്കണമെന്ന് നേപ്പാളിലെ മുതിര്‍ന്ന രാഷ്‌ട്രീയ നേതാക്കള്‍. നേപ്പാള്‍ പ്രധാനമന്ത്രി കെ.പി ശര്‍മ ഒലിയോടാണ് നേതാക്കള്‍ അവശ്യമുന്നയിച്ചത്. കഴിഞ്ഞ ശനിയാഴ്‌ചയാണ് ജമ്മു കശ്‌മിരിനെ രണ്ട് കേന്ദ്രഭരണ പ്രദേശങ്ങളായി പ്രഖ്യാപിച്ചതിന്‍റെ പശ്ചാത്തലത്തില്‍ ഇന്ത്യയുടെ പുതിയ ഔദ്യോഗിക ഭൂപടം കേന്ദ്ര സർക്കാർ പുറത്തിറക്കിയത്.
ഇന്ത്യ പുറത്തിറക്കിയ ഭൂപടത്തില്‍ ഉത്തരാഖണ്ഡിലെ പിത്തോറഗഡ് ജില്ലയിൽ കാണിച്ചിട്ടുള്ള കാലാപാനിയെന്ന സ്ഥലം തങ്ങളുടേതാണെന്നാണ് നേപ്പാളിന്‍റെ അവകാശവാദം. നേപ്പാളിലെ ഡർച്ചുല ജില്ലയിലെ പ്രദേശമാണ് കാലാപാനിയെന്ന് നേപ്പാള്‍ മാധ്യമങ്ങൾ റിപ്പോർട്ട് ചെയ്തിരുന്നു. ഇതിന് പിന്നാലെയാണ് തര്‍ക്കം ഉടലെടുത്ത്.
നേപ്പാളിലെ മുന്‍ പ്രധാനമന്ത്രി ബാബുറാം ഭട്ടറായ് അടക്കമുള്ള നേതാക്കളാണ് വിഷയം ഉഭയകക്ഷി ചര്‍ച്ചകളിലൂടെ പരിഹരിക്കണമെന്ന ആവശ്യവുമായി രംഗത്തെത്തിയിരിക്കുന്നത്. പ്രശ്‌നപരിഹാരത്തിനായി ഇന്ത്യന്‍ പ്രധാനമന്ത്രി നരേന്ദ്രമോദിയുമായി കൂടിക്കാഴ്‌ച നടത്തണമെന്നും ചരിത്രരേഖകള്‍ പരിശോധിച്ച് അതിര്‍ത്തി തര്‍ക്കം പരിഹരിക്കണമെന്നും നേതാക്കള്‍ കൂട്ടിച്ചേര്‍ത്തു.
എന്നാല്‍ ആരോപണമുയര്‍ന്നതിന് തൊട്ടുപിന്നാലെ നേപ്പാളിന്‍റെ അവകാശവാദം തള്ളി ഇന്ത്യൻ വിദേശകാര്യ മന്ത്രാലയം രംഗത്തെത്തിയിരുന്നു. ഇന്ത്യയ്‌ക്ക് അവകാശപ്പെട്ട ഭൂമിയിലെ അതിര്‍ത്തിയിലാണ് മാറ്റങ്ങള്‍ വരുത്തിയതെന്നും, അതിര്‍ത്തികളില്‍ യാതൊരു മാറ്റവും വരുത്തിയിട്ടില്ലെന്നും ഇന്ത്യന്‍ വിദേശകാര്യ വക്താവ് രവീഷ് കുമാര്‍ വ്യക്‌തമാക്കിയിരുന്നു.
