ദളപതി വിജയ് ചിത്രം ബീസ്റ്റിന്‍റെതായി പുറത്തിറങ്ങിയ പാട്ടുകളെല്ലാം സോഷ്യല്‍ മീഡിയയില്‍ തരംഗമായിരുന്നു. അനിരുദ്ധ് രവിചന്ദര്‍ ഒരുക്കിയ അറബിക് കുത്ത് ഉള്‍പ്പെടെയുളള ഗാനങ്ങളെല്ലാം ഹിറ്റ് ചാര്‍ട്ടുകളില്‍ ഇടംപിടിച്ചു. നെല്‍സണ്‍ ദിലീപ് കുമാര്‍ സംവിധാനം ചെയ്ത സിനിമ എപ്രില്‍ 13നാണ് ലോകമെമ്പാടുമുളള തിയേറ്ററുകളില്‍ എത്തിയത്.
ആരാധകര്‍ വലിയ പ്രതീക്ഷകളോടെ കാത്തിരുന്ന ചിത്രം ബോക്സോഫീസില്‍ സമ്മിശ്ര പ്രതികരണമാണ് നേടിയത്. തെന്നിന്ത്യന്‍ താരസുന്ദരി പൂജ ഹെഗ്ഡെയാണ് വിജയുടെ നായികയായത്. ഇവര്‍ക്കൊപ്പം യോഗി ബാബു, റെഡിന്‍ കിംഗ്‌സ്‌ലി, അപര്‍ണ ദാസ്, സെല്‍വരാഘവന്‍ എന്നീ താരങ്ങളും മറ്റു പ്രധാന വേഷങ്ങളില്‍ അഭിനയിച്ചു.
സണ്‍ പിക്ചേഴ്‌സിന്‍റെ ബാനറില്‍ കലാനിധി മാരനാണ് ബീസ്റ്റ് നിര്‍മ്മിച്ചത്. വിജയ് ചിത്രത്തിന്‍റെതായി തരംഗമായ അറബിക്ക് കുത്ത് പാട്ടിന്‍റെ വീഡിയോ ഒടുവില്‍ യൂടൂബില്‍ പുറത്തിറങ്ങിയിരിക്കുകയാണ്. റിലീസ് ചെയ്ത് മണിക്കൂറുകള്‍ക്കുളളില്‍ ലക്ഷക്കണക്കിന് പേരാണ് ദളപതി ചിത്രത്തിലെ ഗാനരംഗം കണ്ടുകഴിഞ്ഞിരിക്കുന്നത്.
- " class="align-text-top noRightClick twitterSection" data="">
ഡോക്‌ടര്‍ സിനിമയിലെ ചെല്ലമ്മ പാട്ടിന് ശേഷം അനിരുദ്ധും ജോനിത ഗാന്ധിയും ചേര്‍ന്നാണ് അറബിക് കുത്ത് പാടിയിരിക്കുന്നത്. ശിവകാര്‍ത്തികേയനാണ് വരികള്‍ എഴുതിയത്. വിജയുടെ കിടിലന്‍ ഡാന്‍സ് തന്നെയാണ് അറബിക് കുത്ത് ഗാനരംഗത്തിലെ മുഖ്യ ആകര്‍ഷണം.
മലയാളി താരം ഷൈന്‍ ടോം ചാക്കോയും ബീസ്റ്റില്‍ ഒരു പ്രാധാന്യമുളള റോളില്‍ എത്തുന്നുണ്ട്. വിജയ് ചിത്രം 250 കോടിയിലധികം കലക്ഷനാണ് ഇതുവരെ ബോക്സോഫീസില്‍ നിന്നായി നേടിയത്. യഷ് ചിത്രം കെജിഎഫ് 2വുമായി ക്ലാഷ് റിലീസ് വെച്ചാണ് ബീസ്റ്റ് പ്രദര്‍ശനത്തിന് എത്തിയത്. എന്നാല്‍ ബീസ്റ്റിനെ മലര്‍ത്തിയടിച്ച് കെജിഎഫ് ചാപ്‌റ്റര്‍ 2 ബോക്സോഫീസില്‍ തരംഗമായി.
