മുംബൈ: കൊലപാതക കേസില്‍ മാനസിക രോഗമുള്ള 17കാരന്‍ അറസ്‌റ്റിലായതായി പൊലീസ്. ഉദ്യോഗസ്ഥൻ പറയുന്നതനുസരിച്ച് ഇരയെ ഒരു പൊതു ടോയ്‌ലറ്റിൽ നിന്ന് വീട്ടിലേക്ക് മടങ്ങുമ്പോൾ കൗമാരക്കാരൻ ഒരു കാരണവുമില്ലാതെ മൂർച്ചയുള്ള ആയുധം ഉപയോഗിച്ച് കുത്തുകയും പരിക്കേൽപ്പിക്കുകയുമായിരുന്നു. തുടര്‍ന്ന്‌ ഇയാള്‍ ഓടി രക്ഷപ്പെട്ടു.
ALSO READ: മോഷണമുതൽ തിരികെ നൽകി കള്ളൻ; ഒപ്പം മാപ്പപേക്ഷയും
സബർബൻ കുർളയിലെ സഹകർ നഗർ പ്രദേശത്താണ്‌ ആക്രമണം നടന്നത്‌. പ്രദേശവാസികൾ പരിക്കേറ്റയാളെ അടുത്തുള്ള ആശുപത്രിയിൽ എത്തിച്ചെങ്കിലും മരണപ്പെടുകയായിരുന്നു. പ്രദേശത്തെ സിസിടിവി ദൃശ്യങ്ങൾ പരിശോധിച്ച ശേഷം അക്രമിയെക്കുറിച്ചുള്ള വിശദാംശങ്ങൾ ശേഖരിക്കുകയും ഇയാൾക്കായി തിരച്ചിൽ ആരംഭിച്ചതായും പൊലീസ് പറഞ്ഞു.
പിന്നീട് രഹസ്യവിവരത്തിന്റെ അടിസ്ഥാനത്തിൽ പ്രതിയെ അയാള്‍ താമസിച്ചിരുന്ന സബർബൻ ചെമ്പൂരിൽ നിന്ന് പിടികൂടിയതായി പൊലീസ് ഉദ്യോഗസ്ഥർ അറിയിച്ചു. അന്വേഷണത്തിൽ പ്രതി പ്രായപൂർത്തിയാകാത്ത ആളാണെന്നും മാനസിക അസ്വാസ്ഥ്യമുള്ളയാളാണെന്നും പൊലീസ് കണ്ടെത്തി. കൗമാരക്കാരനെ കസ്‌റ്റഡിയിലെടുത്ത് ഐപിസി സെക്ഷൻ 302 (കൊലപാതകം) പ്രകാരം കേസെടുത്തു. ഡോംഗ്രിയിലെ കുട്ടികളുടെ റിമാൻഡ് ഹോമിലേക്ക് അയക്കുമെന്ന് ഉദ്യോഗസ്ഥർ പറഞ്ഞു.
