തിരുവനന്തപുരം: കഴിഞ്ഞ ഒന്‍പത് മാസമായി ജയിലില്‍ കഴിയുന്ന മയക്കുമരുന്ന് വില്‍പനക്കാരന് ജാമ്യം നിഷേധിച്ച് കോടതി. കേശവദാസപുരം സ്വദേശി സജിയുടെ ജാമ്യമാണ് ആറാം അഡിഷണല്‍ സെഷന്‍സ് കോടതി നിഷേധിച്ചത്. ജയിലില്‍ വച്ച് ഇയാള്‍ മയക്കുമരുന്ന് ഉപയോഗിച്ചതിന് ഇയാള്‍ക്കെതിരെ പൊലീസ് കേസെടുത്ത സംഭവം ചൂണ്ടിക്കാട്ടിയാണ് കോടതി നടപടി.
കേസ് പരിഗണിച്ച ജഡ്‌ജി കെ.വിഷ്‌ണുവാണ് ജാമ്യം നിഷേധിച്ചത്. മയക്കുമരുന്ന് വില്‍പ്പന കേസിലെ പ്രതിക്ക് ജാമ്യം നല്‍കിയാല്‍ അത് പൊതു സമൂഹത്തോട് ചെയ്യുന്ന അനീതിയാകുമെന്നും ഇത്രയധികം സുരക്ഷയുള്ള ജയിലില്‍ വച്ച് പോലും പ്രതി മയക്കുമരുന്ന് ഉപയോഗിച്ചത് നിസാരമായി കാണാനാകില്ലെന്നും കോടതി വ്യക്തമാക്കി. കേസില്‍ ജയിലിലായിട്ടും പ്രതിയുടെ മയക്കുമരുന്ന് ശൃംഖലയുടെ കണ്ണികള്‍ മുറിഞ്ഞിട്ടില്ലെന്നും പറഞ്ഞാണ് കോടതി ഇയാളുടെ ജാമ്യം നിഷേധിച്ചത്.
കേസില്‍ പ്രതിയായ സജിക്ക് ജാമ്യം അനുവദിക്കണമെന്നാവശ്യപ്പെട്ട് നേരത്തെ ജില്ല ലീഗല്‍ സര്‍വീസ് അതോറിറ്റി നിയമിച്ച ചീഫ് ഡിഫന്‍സ് കൗണ്‍സില്‍ കോടതിയില്‍ നേരിട്ടെത്തി വാദിച്ചിരുന്നു. കഴിഞ്ഞ ഒന്‍പത് മാസമായി തടവിലാണെന്നും പ്രതിക്ക് അയാളുടേതായ അവകാശമുണ്ടെന്നും കേസ് കെട്ടി ചമച്ചതാണെന്നും ഡിഫന്‍സ് കൗണ്‍സില്‍ കോടതിയില്‍ പറഞ്ഞു. അതേ സമയം പ്രോസിക്യൂഷന്‍ വാദം അംഗീകരിച്ച കോടതി ചീഫ് ഡിഫന്‍സ് കൗണ്‍സിലിന്‍റെ വാദം തളളിയാണ് പ്രതിയുടെ ജാമ്യം നിഷേധിച്ചത്.
ലഹരിയുടെ പിടിയിലമരുന്ന കൗമാര യവനങ്ങള്‍: കേരളം ഉള്‍പ്പെടെയുളള ഇന്ത്യയിലെ വിവിധ സംസ്ഥാനങ്ങളില്‍ മയക്കുമരുന്നിന്‍റെ ഉപയോഗവും വില്‍പനയും വര്‍ധിച്ച് വരികയാണ്. തിരിച്ചറിവിന്‍റെ പ്രായമെത്തും മുമ്പ് കൗമാര പ്രായത്തില്‍ തന്നെ ആണ്‍ പെണ്‍ വ്യത്യാസമില്ലാതെ കുട്ടികളെ മയക്കുമരുന്ന് സംഘങ്ങള്‍ വേട്ടയാടി കൊണ്ടിരിക്കുകയാണ്. ചെറു പ്രായം മുതല്‍ ലഹരി ഉപയോഗിച്ച് വരുമ്പോള്‍ ആരോഗ്യ സ്ഥിതിയും അതിന് അനുസരിച്ച് മോശമായി കൊണ്ടിരിക്കും. മദ്യം അടക്കമുള്ള ലഹരി വസ്‌തുക്കളെല്ലാം ആരോഗ്യ പ്രശ്‌നക്കാര്‍ തന്നെയാണ്.
ലഹരി ഉപയോഗിക്കുന്നവരിലെ ആരോഗ്യ പ്രശ്‌നങ്ങള്‍: മദ്യത്തില്‍ അടങ്ങിയിരിക്കുന്ന പ്രധാന ഘടകം ഈതൈല്‍ ആല്‍ക്കഹോളാണ്. ഓരോ മദ്യത്തിലും ഇതിന്‍റെ അളവ് കൂടിയും കുറഞ്ഞുമിരിക്കും. പ്രശ്‌നമില്ലെന്ന് പറഞ്ഞ് എല്ലാവരും കഴിക്കുന്ന വൈനില്‍ പോലും 8 ശതമാനം ആല്‍ക്കഹോള്‍ അടങ്ങിയിട്ടുണ്ട്.
സ്ഥിരമായി മദ്യം, മയക്ക് മരുന്ന് എന്നിവ ഉപയോഗിക്കുന്നവരില്‍ മാനസിക പ്രശ്‌നങ്ങള്‍ക്ക് കാരണമാകുന്നു. ഇത് തലച്ചോറിന്‍റെ പ്രവര്‍ത്തനങ്ങളെ മന്ദഗതിയിലാക്കുന്നു. മൂഡ് ചെയ്‌ഞ്ച് പോലുള്ള മാനസിക പ്രയാസങ്ങളിലേക്ക് നയിക്കുകയും ചെയ്യും.
ലഹരി ഉപയോഗിച്ചാല്‍ ഉറക്കമില്ലായ്‌മയും അനുഭവപ്പെടും. പിന്നീട് ലഹരിയും മദ്യവുമില്ലാതെ ഉറങ്ങാന്‍ കഴിയാത്ത അവസ്ഥയുണ്ടാകും. ദഹന പ്രക്രിയകളെയും ഇത് പ്രതികൂലമായി ബാധിക്കുന്നു. ആമാശയത്തിലെ മ്യൂക്കസ് പാളികളില്‍ മുറിവുണ്ടാകാന്‍ ലഹരിയുടെയും മദ്യത്തിന്‍റെയും അമിത ഉപയോഗം കാരണമാകുന്നു.
ദഹന കുറവിനും സാധ്യത. ഹൃദയത്തിന്‍റെ പ്രവര്‍ത്തനങ്ങളെ ഇത് താളം തെറ്റിക്കുന്നു. രക്ത സമ്മര്‍ദ്ദം വര്‍ധിക്കും. കാര്‍ഡിയോ മയോപ്പതിയെന്ന (ഹൃദയപേശികളുടെ ശക്തി കുറയുന്നു) അവസ്ഥയിലേക്ക് അമിത ലഹരി, മദ്യ ഉപയോഗം നയിക്കും. കൂടാതെ പേശികളുടെ ശ്വാസകേശത്തിന്‍റെയും നാഡീവ്യവസ്ഥയുടെ പ്രക്രിയകളെ ഇത് പ്രതികൂലമായി ബാധിക്കുന്നു.
