അധികം താമസിയാതെ നിയന്ത്രിച്ചില്ലെങ്കില്‍ ഇന്ത്യന്‍ കര്‍ഷകരുടെ വിളകള്‍ നശിപ്പിക്കുകയും അവരുടെ ജീവനോപാധിയെ തന്നെ അപകടത്തിലാക്കുകയും ചെയ്യും അതിര്‍ത്തി കടന്ന് വന്നെത്തി കൊണ്ടിരിക്കുന്ന ലക്ഷകണക്കിന് വെട്ടുകിളികള്‍. ചെടികളെ തിന്ന് നശിപ്പിക്കുന്ന ഈ വെട്ടുകിളി ശല്യം തുടര്‍ന്നും ഇന്ത്യന്‍ കര്‍ഷകരെ വലച്ചു കൊണ്ടിരിക്കും. അധികൃതര്‍ ഡ്രോണുകളും ട്രാക്‌ടറുകള്‍ക്ക് മുകളില്‍ ഘടിപ്പിച്ച സ്‌പ്രേയറുകളും ഉപയോഗിച്ച് രാത്രി നേരങ്ങളില്‍ ഇവ കൂട്ടത്തോടെ വിശ്രമിക്കുമ്പോള്‍ നിയന്ത്രിക്കുന്ന നടപടികള്‍ എടുത്തു കൊണ്ടിരിക്കുകയാണ് എന്നാണ് കേന്ദ്ര സര്‍ക്കാരിലെ വെട്ടുകിളി മുന്നറിയിപ്പ് ഓഫീസിലെ ഒരു ഉന്നത ഉദ്യോഗസ്ഥന്‍ ഇടിവി ഭാരതിനോട് പറഞ്ഞത്.
ഏതാണ്ട് ഒരു മാസത്തോളമായി ചെടികളെയും മറ്റും തിന്ന് നശിപ്പിക്കുന്ന ഈ വെട്ടുകിളികള്‍ ഇന്ത്യയിലേക്ക് വന്‍തോതില്‍ വരാന്‍ തുടങ്ങിയിട്ട്. ഒരൊറ്റ കൂട്ടത്തില്‍ ഏതാണ്ട് 10 ലക്ഷം മുതല്‍ 15 ലക്ഷം വരെ വെട്ടുകിളികളാണ് ഇങ്ങനെ വന്നെത്തുന്നത്. ഈ വെട്ടുകിളി കൂട്ടങ്ങള്‍ രാജസ്ഥാനിലെ നഗരങ്ങളിലും പട്ടണങ്ങളിലുമാണ് തുടക്കത്തില്‍ കൂട്ടമായി എത്തിച്ചേര്‍ന്നത്. പിന്നീട് അവ മധ്യപ്രദേശിലേക്ക് തിരിയാന്‍ തുടങ്ങി. രാജസ്ഥാന്‍ കഴിഞ്ഞാല്‍ ഏറ്റവും കൂടുതല്‍ വെട്ടുകിളി ശല്യം അനുഭവിച്ചു കൊണ്ടിരിക്കുന്ന സംസ്ഥാനമായി മാറിയിരിക്കുന്നു മധ്യപ്രദേശ്. പുല്‍ച്ചാടികളുടെ കുടുംബത്തില്‍ പെട്ട ചെടികള്‍ തിന്നു നശിപ്പിക്കുന്ന ഈ വെട്ടുകിളികള്‍ ഗുജറാത്ത്, പഞ്ചാബ്, ഉത്തര്‍പ്രദേശിന്റെ ചില ഭാഗങ്ങള്‍ എന്നിവിടങ്ങളിലെയും വിളകള്‍ തിന്ന് നശിപ്പിച്ചിട്ടുണ്ട്. ഏപ്രില്‍ 30 മുതല്‍ ഈ വെട്ടുകിളികള്‍ ഇന്ത്യയില്‍ വരാന്‍ ആരംഭിച്ചു. ഇതുവരെയായി 23 വെട്ടുകിളി കൂട്ടങ്ങള്‍ രാജ്യത്ത് പ്രവേശിച്ചിട്ടുണ്ടെന്ന് കാര്‍ഷിക, കര്‍ഷക ക്ഷേമ മന്ത്രാലയത്തിലെ വെട്ടുകിളി മുന്നറിയിപ്പ് ഓഫീസ് ഡെപ്യൂട്ടി ഡയറക്‌ടറായ ഡോക്‌ടര്‍ കെ എല്‍ ഗുര്‍ജാര്‍ പറഞ്ഞു.
“ ഇപ്പോള്‍ ഈ വെട്ടുകിളി കൂട്ടങ്ങള്‍ രാജസ്ഥാനില്‍ നിന്നും മധ്യപ്രദേശിലേക്കും ഉത്തര്‍പ്രദേശിലേക്കും നീങ്ങി കഴിഞ്ഞു.'' അവയുടെ നീക്കത്തെ കുറിച്ച് ഇ ടി വി ഭാരതിനോട് വിശദീകരിക്കവെ ഡോ കെ എല്‍ ഗുര്‍ജാര്‍ പറഞ്ഞു. വടക്കു പടിഞ്ഞാറന്‍ ഇന്ത്യയിലെ നിരവധി ഗ്രാമങ്ങളും പട്ടണങ്ങളിലും ആകാശം നിറയെ വെട്ടുകിളി കൂട്ടങ്ങളാണിപ്പോള്‍. 'രാത്രി കാലങ്ങളില്‍ എവിടെയൊക്കെയാണോ അവ വിശ്രമിക്കാനിരിക്കുന്നത് അവിടെയൊക്കെ ഞങ്ങള്‍ അവയെ പിന്തുടര്‍ന്ന് നിയന്ത്രിക്കുന്നതിനുള്ള നടപടികള്‍ എടുക്കുന്നു.'' ഡോ ഗുര്‍ജാര്‍ അറിയിച്ചു. നിലവില്‍ രാജസ്ഥാന്‍, മധ്യപ്രദേശ്, ഉത്തര്‍പ്രദേശ്, പഞ്ചാബ്, ഗുജറാത്ത് എന്നിവിടങ്ങളില്‍ നിയന്ത്രണ നടപടികള്‍ കൈകൊണ്ടു വരുന്നുണ്ട്. ഗുജറാത്തില്‍ നേരത്തെ വെട്ടുകിളി ശല്യം റിപ്പോര്‍ട്ട് ചെയ്യപ്പെട്ടിരുന്നുവെങ്കിലും ഇപ്പോള്‍ അവിടെ നിന്നും അത്തരം വാര്‍ത്തകള്‍ ഒന്നും വരുന്നില്ലെന്നും ഡോ കെ എല്‍ ഗുര്‍ജാര്‍ കൂട്ടിച്ചേര്‍ത്തു. ഇപ്പോള്‍ അധികൃതര്‍ വെട്ടുകിളി നിയന്ത്രണ പ്രവര്‍ത്തനങ്ങള്‍ രാജസ്ഥാന്‍, മധ്യപ്രദേശ്, ഉത്തര്‍പ്രദേശിലെ ഒരു ജില്ല എന്നിങ്ങനെ മൂന്ന് സ്ഥലങ്ങളില്‍ മാത്രമായി കേന്ദ്രീകരിച്ചിരിക്കുകയാണ്.
ഉദ്യോഗസ്ഥര്‍ നല്‍കുന്ന റിപ്പോര്‍ട്ട് പ്രകാരം കഴിഞ്ഞ നാല് ആഴ്‌ചകളിലായി 23 വെട്ടുകിളി കൂട്ടങ്ങള്‍ രാജ്യത്ത് പ്രവേശിച്ചിട്ടുണ്ട്. അതിനര്‍ത്ഥം 15 ലക്ഷം വെട്ടുകിളികള്‍ വീതം വരുന്ന ശരാശരി 5 വെട്ടുകിളി കൂട്ടങ്ങള്‍ ഒരാഴ്‌ചയില്‍ രാജ്യത്തേക്ക് എത്തുന്നുവെന്നാണ്. വെട്ടുകിളികളെ നിയന്ത്രിക്കുന്നതിനായി ഡ്രോണുകളെ നിയോഗിച്ചിട്ടുണ്ട്. കേന്ദ്ര സംസ്ഥാന സര്‍ക്കാരുകള്‍ ഒരുപോലെ ഈ വെട്ടുകിളി കൂട്ട നിയന്ത്രണ നടപടികളില്‍ പങ്കാളികളാകുന്നു. കേന്ദ്ര കാര്‍ഷിക മന്ത്രാലയ വകുപ്പിലെ ഉദ്യോഗസ്ഥര്‍ പറയുന്നത് വെട്ടുകിളി മുന്നറിയിപ്പ് ഓഫീസില്‍ നിന്നുള്ള 200ലധികം ആളുകളെ വെട്ടുകിളി നിയന്ത്രണ നടപടികള്‍ക്കായി വിന്യസിച്ചിട്ടുണ്ടെന്നും, ഇവയെ കണ്ടെത്തി അവയ്ക്കുമേല്‍ കീടനാശിനികള്‍ തളിക്കുവാനായി 47 സംഘങ്ങള്‍ക്ക് രൂപം നല്‍കിയിട്ടുണ്ടെന്നുമാണ്. ഈ സംഘങ്ങള്‍ പ്രാദേശിക, സംസ്ഥാന അധികൃതരുടെ സഹായവും സ്വീകരിക്കുന്നുണ്ട്.
“ഞങ്ങള്‍ ട്രാക്‌ടറുകള്‍ക്ക് മുകളില്‍ ഘടിപ്പിച്ചിട്ടുള്ള സ്‌പ്രേയറുകളും പ്രാദേശിക കാര്‍ഷിക അധികൃതരില്‍ നിന്നും ലഭിച്ചിട്ടുള്ള മറ്റ് ഉപകരണങ്ങളുമാണ് നിയന്ത്രണ നടപടികള്‍ക്കുവേണ്ടി ഉപയോഗിച്ചു കൊണ്ടിരിക്കുന്നത്,'' വെട്ടുകിളി നിയന്ത്രണ ഓഫീസിലെ ഒരു ഉന്നത ഉദ്യോഗസ്ഥന്‍ ഇ ടി വി ഭാരതിനോട് പറഞ്ഞു. ട്രാക്‌ടറുകള്‍ക്ക് മുകളില്‍ ഘടിപ്പിച്ച സ്‌പ്രേയറുകള്‍ക്ക് പുറമെ ഡ്രോണുകളാണ് അധികൃതര്‍ വെട്ടുകിളി നിയന്ത്രണത്തിനായി ഉപയോഗിക്കുന്നത്. വെട്ടുകിളികളുടെ നീക്കങ്ങള്‍ നിരീക്ഷിക്കാന്‍ വേണ്ടി മാത്രമല്ല ഈ ഡ്രോണുകള്‍ ഉപയോഗിക്കുന്നത്. മറിച്ച്, അവയ്ക്കുമേല്‍ കീടനാശിനികള്‍ തളിക്കാനും ഇത് ഉപയോഗിക്കുന്നുണ്ട്. 'ഞങ്ങള്‍ രണ്ട് ഡ്രോണുകള്‍ വെച്ചാണ് ആരംഭിച്ചത്. വെള്ളിയാഴ്‌ചയോടു കൂടി നിയന്ത്രണ നടപടികള്‍ക്കായി രണ്ടെണ്ണം കൂടി നിയോഗിക്കും.'' ഡോ കെ എല്‍ ഗുര്‍ജാര്‍ പറഞ്ഞു.
അതേ സമയം ഈ കീടനാശിനികള്‍ മനുഷ്യര്‍ക്ക് ദോഷം ഒന്നും വരുത്തുന്നില്ലെന്ന് അദ്ദേഹം ചൂണ്ടി കാട്ടി. ഈ കീടനാശിനികള്‍ തളിച്ചു കഴിഞ്ഞ് 24 മണിക്കൂറിനകം നിര്‍വീര്യമാകുന്നതിനാല്‍ അത് ഒരിടത്ത് ഒന്നിച്ചു കൂടി മനുഷ്യര്‍ക്ക് ദോഷം ചെയ്യുന്ന അപകട സാധ്യത തീരെയില്ലെന്ന് ഒരു ഉദ്യോഗസ്ഥന്‍ വിശദീകരിച്ചു. മാത്രമല്ല കീടനാശിനികള്‍ ഉപയോഗിക്കുന്നത് വിളകള്‍ക്കും ദോഷം ചെയ്യുന്നില്ലെന്ന് അദ്ദേഹം കൂട്ടിച്ചേര്‍ത്തു. എന്നാല്‍ തങ്ങളുടെ മേഖലയിലുള്ള വെട്ടുകിളി കൂട്ടങ്ങള്‍ക്കു മേല്‍ കീടനാശിനി തളിക്കുമ്പോള്‍ ആളുകള്‍ മുഖവും ശരീരവുമെല്ലാം മൂടി വെക്കണം എന്ന് അദ്ദേഹം മുന്നറിയിപ്പ് നല്‍കുന്നുണ്ട്.
എങ്ങനെയാണ് വെട്ടുകിളികളെ കര്‍ഷകര്‍ക്ക് തുരത്താന്‍ കഴിയുന്നത്
വെട്ടുകിളികളെ തുരത്താനും അവയുടെ ഗമന മാര്‍ഗം മാറ്റി വിടാനും പറ്റിയ ഏറ്റവും എളുപ്പ വഴി വലിയ ശബ്‌ദമുണ്ടാക്കലാണെന്ന് വിദഗ്‌ധര്‍ പറയുന്നു. 'ഉപകരണങ്ങള്‍, പാത്രങ്ങള്‍, ചെണ്ടകള്‍ മുതലായവ ഉപയോഗിച്ച് കൊട്ടി കൊണ്ട് കര്‍ഷകരും പ്രദേശ വാസികളും വന്‍ ശബ്‌ദം ഉണ്ടാക്കിയാല്‍ വെട്ടുകിളി കൂട്ടങ്ങള്‍ ദൂരേക്ക് നീങ്ങി പോകുമെന്ന് കാര്‍ഷിക മന്ത്രാലയത്തിലെ ഒരു ഉന്നത ഉദ്യോഗസ്ഥന്‍ പറഞ്ഞു.
