ಜಗದ್ವಿಖ್ಯಾತ ಜಗನ್ನಾಥ ರಥಯಾತ್ರೆ, ಲಕ್ಷಾಂತರ ಭಕ್ತರು ಭಾಗಿ- ಪುರಿಯಿಂದ LIVE - Puri Jagannath Rath Yatra

ಪುರಿ(ಒಡಿಶಾ): ವಿಶ್ವಪ್ರಸಿದ್ಧ ಪುರಿ ಜಗನ್ನಾಥ ಮಹಾರಥೋತ್ಸವದ 2ನೇ ದಿನದ ವೈಭವದ ಯಾತ್ರೆ ಆರಂಭವಾಗಿದೆ. 12ನೇ ಶತಮಾನದ ಜಗನ್ನಾಥ ದೇವಸ್ಥಾನದಿಂದ ಸುಮಾರು 2.5 ಕಿ.ಮೀ ದೂರದಲ್ಲಿರುವ ಗುಂಡಿಚಾ ದೇವಸ್ಥಾನದವರೆಗಿನ ಅದ್ಧೂರಿ​ ರಥೋತ್ಸವದಲ್ಲಿ ಲಕ್ಷಾಂತರ ಜನರು ಪಾಲ್ಗೊಂಡಿದ್ದಾರೆ. ಭಗವಾನ್ ಜಗನ್ನಾಥ, ಭಗವಾನ್ ಬಲಭದ್ರ ಮತ್ತು ದೇವಿ ಸುಭದ್ರಾ ರಥಗಳಿಗೆ ಪೂಜೆ ಸಲ್ಲಿಸಿದ ಬಳಿಕ ರಥಯಾತ್ರೆ ಆರಂಭಿಸಲಾಗಿದೆ. ರಥ ಯಾತ್ರೆ ಭಾನುವಾರ ಆರಂಭವಾಗಿ ವೈಭವದಿಂದ ಜರುಗಿತ್ತು. ಪ್ರತಿವರ್ಷ ಒಂದು ದಿನ ಮಾತ್ರ ಇರುತ್ತಿದ್ದ ರಥಯಾತ್ರೆ ಈ ಬಾರಿ ಎರಡು ದಿನ ನೆರವೇರುತ್ತಿರುವುದು ವಿಶೇಷ.  ಭಾನುವಾರ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಪ್ರಧಾನ ಜಗನ್ನಾಥ ರಥದ ಹಗ್ಗಗಳನ್ನು ಎಳೆಯುವ ಮೂಲಕ ಸಾಂಕೇತಿಕವಾಗಿ ಮಹಾ ಯಾತ್ರೆಗೆ ಚಾಲನೆ ನೀಡಿದ್ದರು. ರಥಗಳನ್ನು ಸಾವಿರಾರು ಭಕ್ತರು ಎಳೆದು ಕೃತಾರ್ಥರಾಗಿದ್ದರು. ವರ್ಷಂಪ್ರತಿ ಈ ಭವ್ಯ ರಥ ಯಾತ್ರೆಯಲ್ಲಿ ಸುಮಾರು ಹತ್ತು ಲಕ್ಷ ಭಕ್ತರು ಸೇರುತ್ತಾರೆ ಎಂದು ಅಂದಾಜಿಸಲಾಗಿದೆ. ಹೆಚ್ಚಿನ ಭಕ್ತರು ಒಡಿಶಾ ಮತ್ತು ನೆರೆ ರಾಜ್ಯಗಳಿಂದ ಬಂದರೆ, ದೇಶ-ವಿದೇಶದಿಂದಲೂ ಅನೇಕರು ಪಾಲ್ಗೊಳ್ಳುತ್ತಾರೆ. ಜಾಗತಿಕವಾಗಿಯೂ ಅತಿದೊಡ್ಡ ಧಾರ್ಮಿಕ ಯಾತ್ರೆಗಳ ಪೈಕಿ ಪುರಿ ರಥ ಯಾತ್ರೆಯೂ ಒಂದು.