ಸ್ಯಾನ್ ಫ್ರಾನ್ಸಿಸ್ಕೋ: ಚಾಟ್ ಜಿಪಿಟಿ ನಿರ್ಮಿಸುವ ಉದ್ದೇಶದಿಂದ ಸ್ಥಾಪನೆಯಾದ ಓಪನ್ ಎಐ ಕಂಪನಿ ವಿಫಲಾಗುತ್ತದೆ ಎಂದು ಟೆಸ್ಲಾ ಮತ್ತು ಸ್ಪೇಸ್ ಎಕ್ಸ್ ಸಿಇಒ ಎಲೋನ್ ಮಸ್ಕ್ ಅವರು ಭಾವಿಸಿದ್ದರು ಮತ್ತು ಅದೇ ಕಾರಣದಿಂದ ಅವರು ಕಂಪನಿಯಿಂದ ದೂರ ಸರಿದರು ಎಂದು ಓಪನ್ ಎಐ ಸಿಇಒ ಸ್ಯಾಮ್ ಆಲ್ಟ್ ಮ್ಯಾನ್ ಹೇಳಿದ್ದಾರೆ.
ಪಾಡ್ ಕಾಸ್ಟರ್ ಲೆಕ್ಸ್ ಫ್ರಿಡ್ಮನ್ ಅವರೊಂದಿಗಿನ ಸಂದರ್ಶನದಲ್ಲಿ ಮಾತನಾಡಿದ ಆಲ್ಟ್ ಮ್ಯಾನ್, "ಓಪನ್ಎಐ ವಿಫಲವಾಗಲಿದೆ ಎಂದು ಮಸ್ಕ್ ಭಾವಿಸಿದ್ದರು. ಕಂಪನಿಯ ಮೇಲೆ ಅವರು ಸಂಪೂರ್ಣ ನಿಯಂತ್ರಣ ಸಾಧಿಸಲು ಬಯಸಿದ್ದರು. ಪ್ರಸ್ತುತ ಯಶಸ್ವಿ ಕಂಪನಿಯಾಗಿರುವ ಓಪನ್ ಎಐ ಅನ್ನು ಅದೇ ದಿಕ್ಕಿನಲ್ಲಿ ಮುಂದುವರಿಸಲು ನಾವು ಬಯಸಿದ್ದೇವೆ" ಎಂದು ಹೇಳಿದರು.
"ವಿವಿಧ ಸಮಯಗಳಲ್ಲಿ ಅವರು ಓಪನ್ಎಐ ಅನ್ನು ಲಾಭರಹಿತ ಕಂಪನಿಯನ್ನಾಗಿ ಮಾಡಲು ಬಯಸಿದ್ದರು. ಅಲ್ಲದೆ ಅದರ ಮೇಲೆ ಅವರು ಸಂಪೂರ್ಣ ನಿಯಂತ್ರಣ ಸಾಧಿಸುವ ಅಥವಾ ಟೆಸ್ಲಾದೊಂದಿಗೆ ಅದನ್ನು ವಿಲೀನಗೊಳಿಸುವ ಅಧಿಕಾರ ಹೊಂದಲು ಬಯಸಿದ್ದರು. ಆದರೆ ಅದಕ್ಕೆ ನಾವು ಒಪ್ಪಲಿಲ್ಲವಾದ್ದರಿಂದ ಅವರು ಕಂಪನಿಯಿಂದ ದೂರವಾಗಲು ಬಯಸಿದರು. ಆಗಿದ್ದೆಲ್ಲ ಒಳ್ಳೆಯದೇ ಆಯಿತು" ಎಂದು ಅವರು ನುಡಿದರು.
ಸಾರ್ವಜನಿಕ ಹಿತದೃಷ್ಟಿಯಿಂದ ಶಕ್ತಿಶಾಲಿ ತಂತ್ರಜ್ಞಾನವನ್ನು ಉಚಿತವಾಗಿ ಜನರಿಗೆ ನೀಡುತ್ತಿರುವುದರಿಂದ ಕಂಪನಿಯು ತನ್ನ ಮೂಲ ಉದ್ದೇಶಕ್ಕೆ ಇನ್ನೂ ಬದ್ಧವಾಗಿದೆ ಎಂದು ಸಿಇಒ ಆಲ್ಟ್ ಮ್ಯಾನ್ ಹೇಳಿದರು.
"ನಾವು ನಮ್ಮ ಉಚಿತ ಚಾಟ್ ಜಿಪಿಟಿ ಆವೃತ್ತಿಯಲ್ಲಿ ಜಾಹೀರಾತುಗಳನ್ನು ತೋರಿಸುವುದಿಲ್ಲ. ಅಲ್ಲದೆ ಬೇರಾವುದೋ ರೀತಿಯಿಂದ ಹಣ ಗಳಿಸಲು ನಾವು ಯತ್ನಿಸುತ್ತಿಲ್ಲ. ಇದು ನಮ್ಮ ಯೋಜನೆಯ ಭಾಗವಾಗಿದೆ. ನಾವು ಇನ್ನೂ ಹೆಚ್ಚು ಶಕ್ತಿಶಾಲಿ ಸಾಧನಗಳನ್ನು ಜನರಿಗೆ ತಲುಪಿಸಲು ಬಯಸುತ್ತೇವೆ" ಎಂದು ಆಲ್ಟ್ ಮ್ಯಾನ್ ತಿಳಿಸಿದರು.
ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನ ತಯಾರಿಸುವ ಮೂಲ ಒಪ್ಪಂದಗಳನ್ನು ಓಪನ್ ಎಐ ಉಲ್ಲಂಘಿಸಿದೆ ಎಂದು ಆರೋಪಿಸಿ ಎಲೋನ್ ಮಸ್ಕ್ ಇತ್ತೀಚೆಗೆ ಓಪನ್ ಎಐ ಮತ್ತು ಆಲ್ಟ್ ಮ್ಯಾನ್ ವಿರುದ್ಧ ಮೊಕದ್ದಮೆ ಹೂಡಿದ್ದಾರೆ.
ಓಪನ್ಎಐ ಇದೊಂದು ಎಐ ಸಂಶೋಧನಾ ಪ್ರಯೋಗಾಲಯ ಮತ್ತು ಕಂಪನಿಯಾಗಿದ್ದು, ಎಐ ಅನ್ನು ಅಭಿವೃದ್ಧಿಪಡಿಸುವ ಮತ್ತು ಇಡೀ ಮಾನವಕುಲಕ್ಕೆ ಪ್ರಯೋಜನಕಾರಿಯಾಗುವ ರೀತಿಯಲ್ಲಿ ಅದನ್ನು ನಿರ್ವಹಿಸುವ ಗುರಿಯನ್ನು ಹೊಂದಿದೆ. ವಿವಿಧ ಚಟುವಟಿಕೆಗಳಿಗೆ ಎಐ ಮತ್ತು ಯಂತ್ರ ಕಲಿಕೆ ಸಾಧನಗಳನ್ನು ಅಭಿವೃದ್ಧಿಪಡಿಸುವ ಉದ್ದೇಶದಿಂದ 2015 ರಲ್ಲಿ ಓಪನ್ ಎಐ ಅನ್ನು ಸ್ಥಾಪಿಸಲಾಯಿತು.
ಇದನ್ನೂ ಓದಿ : ಚಂದ್ರಯಾನ-3 ನೌಕೆ ಇಳಿದ ಸ್ಥಳಕ್ಕೆ 'ಶಿವ ಶಕ್ತಿ' ಹೆಸರಿಡಲು ಖಗೋಳ ಒಕ್ಕೂಟ ಅಸ್ತು - Chandrayaan Landing Site
