ಈ 3 ಕಾರಣಗಳಿಗಾಗಿ ವಿಲ್​ ಜಾಕ್ಸ್​ರನ್ನು ತಂಡದಿಂದ ಕೈಬಿಟ್ಟು ಮತ್ತೊಬ್ಬ ಯುವ ಬ್ಯಾಟರ್​ ಖರೀದಿಸಿದ RCB!

ಐಪಿಎಲ್​ ಮೆಗಾ ಹರಾಜಿನಲ್ಲಿ ಆರ್​ಸಿಬಿ ತಂಡ ವಿಲ್​ ಜಾಕ್ಸ್ ಅವರನ್ನು ಬಿಟ್ಟು ಯುವ ಬ್ಯಾಟರ್​ ಖರೀದಿಸಲು ಮೂರು ಪ್ರಮುಖ ಕಾರಣಗಳಿವೆ.​

RCB Team: ಈ ಬಾರಿ ನಡೆದ ಐಪಿಎಲ್​ ಮೆಗಾ ಹರಾಜಿನಲ್ಲಿ ಆರ್​ಸಿಬಿ ಖರೀದಿಸಿದ ಕೆಲ ಆಟಗಾರರ ಬಗ್ಗೆ ಭಾರೀ ಟೀಕೆಗಳು ವ್ಯಕ್ತವಾಗಿವೆ. ಸಾಮಾಜಿಕ ಜಾಲತಾಣಗಳಲ್ಲಿ ಮ್ಯಾನೆಜ್ಮೆಂಟ್​ ವಿರುದ್ದ ಟ್ರೋಲ್​ ಕೂಡ ಮಾಡಲಾಗುತ್ತಿದೆ. ಕನ್ನಡಿಗ ಕೆಎಲ್​ ರಾಹುಲ್​ ಅವರನ್ನೂ ಖರೀದಿಸಲಿಲ್ಲ. ಕನಿಷ್ಠ ಪಕ್ಷ ವಿಲ್​ ಜಾಕ್ಸ್​ ಅವರನ್ನಾದರೂ ಹಿಂದಕ್ಕೆ ಕರೆದುಕೊಳ್ಳಬಹುದಿತ್ತು ಎಂಬ ಮಾತುಗಳು ಕೇಳಿ ಬಂದಿವೆ. ಅಲ್ಲದೇ ವಿಲ್​ ಜಾಕ್ಸ್​ ಬದಲಿಗೆ ಜಾಕೋಬ್ ಬೆತೆಲ್‌ ಅವರನ್ನು ಏಕೆ ಖರೀದಿಸಿದೆ ಎಂಬ ಪ್ರಶ್ನೆಗಳು ಉದ್ಭವಿಸಿವೆ.

ಎರಡನೇ ದಿನ ನಡೆದ ಹರಾಜಿನಲ್ಲಿ ಆರ್​ಸಿಬಿ ತಂಡ ವಿಲ್​ ಜಾಕ್ಸ್​ ಬದಲಿಗೆ ₹2.60 ಕೋಟಿ ನೀಡಿ ಇಂಗ್ಲೆಂಡ್​ನ ಜಾಕೋಬ್​ ಬೆತೆಲ್​ ಅವರನ್ನು ಖರೀದಿ ಮಾಡಿತು. ಜಾಕ್ಸ್​ ಅವರನ್ನು ಮುಂಬೈ ಇಂಡಿಯನ್ಸ್​ 5.20 ಕೋಟಿಗೆ ಖರೀದಿ ಮಾಡಿತು. ಇದರ ಬೆನ್ನಲ್ಲೇ RCB ವಿರುದ್ಧ ಭಾರೀ ಟೀಕೆಗಳು ವ್ಯಕ್ತವಾದವು. RTM ಕಾರ್ಡ್​ ಬಳಕೆ ಮಾಡಿ ಜಾಕ್ಸ್​ ಅವರನ್ನು ತಂಡಕ್ಕೆ ತಂದಿದ್ದೇ ಆರ್​ಸಿಬಿ ಮತ್ತಷ್ಟು ಬಲಿಷ್ಟವಾಗುತಿತ್ತು ಎಂಬ ಮಾತಗುಳು ಹರಿದಾಡಿದ್ದವು. ಆದರೆ, ಆರ್​ಸಿಬಿ ಮಾತ್ರ ತಮ್ಮ ತಂಡಕ್ಕೆ ಅಗತ್ಯ ಇರುವ ಬ್ಯಾಟ್ಸ್‌ಮನ್ ಅನ್ನೇ ಖರೀದಿ ಮಾಡಬೇಕೆಂದು ಬೆತೆಲ್‌ನೊಂದಿಗೆ ಒಪ್ಪಂದಕ್ಕೆ ಸಹಿ ಹಾಕಿತು. ಜೇಕಬ್ ಬೆತೆಲ್ ಅವರನ್ನು ಆಯ್ಕೆ ಮಾಡಲು ಆರ್​ಸಿಬಿ ಮೂರು ಪ್ರಮುಖ ಕಾರಣಗಳನ್ನೂ ಹೊಂದಿದೆ. ಅದೇನು ಎಂದು ಇದೀಗ ತಿಳಿಯೋಣ.

ವಿಲ್​ ಜಾಕ್ಸ್​ (IANS)

ಮೊದಲ ಕಾರಣ ಎಂದರೆ RCBಗೆ ಎಡಗೈ ಬ್ಯಾಟರ್​ಗಳ ಅಗತ್ಯವಿತ್ತು. ಪ್ರಸ್ತುತ 4 ಅಗ್ರ ಕ್ರಮಾಂಕದಲ್ಲಿ ಬಲಗೈ ಬ್ಯಾಟರ್​ಗಳಾದ ವಿರಾಟ್ ಕೊಹ್ಲಿ, ಫಿಲ್ ಸಾಲ್ಟ್, ರಜತ್ ಪಾಟಿದಾರ್ ಅವರನ್ನು ತಂಡದಲ್ಲಿರಿಸಿದೆ. ಬಲಗೈ ಜೊತೆಗೆ ಎಡಗೈ ಆಟಗಾರರನ್ನು ತಂಡಕ್ಕೆ ಸೇರಿಸಿಕೊಂಡು ಸಮತೋಲನ ವಾಗಿರಿಸಲು ಯೋಚಿಸಿದ ಆರ್​ಸಿಬಿ ಲಿಯಾಮ್ ಲಿವಿಂಗ್‌ಸ್ಟೋನ್ ಮತ್ತು ಜಿತೇಶ್ ಶರ್ಮಾ ಜೊತೆಗೆ ಬೆತೆಲ್ ಅವರನ್ನು ಆಯ್ಕೆ ಮಾಡಿ ತಂಡದಲ್ಲಿ ಎಡಗೈ ಮತ್ತು ಬಲಗೈ ಬ್ಯಾಟರ್​ಗಳ ಕಾಂಬಿನೇಶನ್ ​ನೊಂದಿಗೆ ಕಣಕ್ಕಿಳಿಸಲು ಯೋಜನೆ ರೂಪಿಸಿದೆ.

ಎರಡನೇ ಕಾರಣ ಎಂದರೆ ಜೇಕಬ್ ಬೆಥೆಲ್ ಮಧ್ಯಮ ಓವರ್‌ಗಳಲ್ಲಿ ಬಲಿಷ್ಠ ಆಟಗಾರನಾಗಿ ಗುರುತಿಸಿಕೊಂಡಿದ್ದಾರೆ. ಮಧ್ಯಮ ಕ್ರಮಾಂಕದಲ್ಲಿ 140.40ರ ಸ್ಟ್ರೈಕ್ ರೇಟ್​ನಲ್ಲಿ ಬ್ಯಾಟ್​ ಬೀಸುವ ಸಾಮರ್ಥ ಹೊಂದಿದ್ದಾರೆ. ಅದರಲ್ಲೂ ಈ ವರ್ಷ ಟಿ20 ಪಂದ್ಯಗಳಲ್ಲಿ ಅವರು ಲೆಗ್-ಸ್ಪಿನ್ ಬೌಲಿಂಗ್‌ನ ವಿರುದ್ದ 151.51 ಸ್ಟ್ರೈಕ್ ರೇಟ್‌ನಲ್ಲಿ 200 ರನ್ ಕಲೆ ಹಾಕಿದ್ದು, ಸ್ಪಿನ್​ ಬೌಲಿಂಗ್​ ಸಮರ್ಥವಾಗಿ ಎದುರಿಸುವ ಸಾಮರ್ಥ್ಯ ಹೊಂದಿದ್ದಾರೆ.

ಮೂರನೇ ಕಾರಣ ಎಂದರೆ ಬೆತೆಲ್ ಅಗ್ಗದ ಬೆಲೆಯಲ್ಲಿ ಉತ್ತಮ ಇನ್-ಫಾರ್ಮ್ ಪ್ಲೇಯರ್‌ ಆಗಿದ್ದಾರೆ. ವಿಲ್ ಜ್ಯಾಕ್ಸ್ ಈ ವರ್ಷ ನಡೆದ ಐಪಿಎಲ್​ನಲ್ಲಿ 8 ಪಂದ್ಯಗಳಲ್ಲಿ 32.86ರ ಸಾರಸರಿಯಲ್ಲಿ 230ರನ್​ ಮಾತ್ರ ಗಳಿಸಿದ್ದರು. ಅಲ್ಲದೇ ಜಾಕ್ಸ್​ ಈ ವರೆಗೂ 23 ಅಂತಾರಾಷ್ಟ್ರೀಯ ಟಿ20 ಪಂದ್ಯಗಳನ್ನು ಆಡಿ ಈ ಅವಧಿಯಲ್ಲಿ 18ರ ಸಾರಸರಿಯಲ್ಲಿ 383 ರನ್​ ಮಾತ್ರ ಗಳಿಸಿದ್ದಾರೆ. ಆದ್ರೆ ಬೆತೆಲ್​ 3 ಪಂದ್ಯಗಳಲ್ಲಿ 57.67ರ ಸರಾಸರಿಯಲ್ಲಿ 167.96ರ ಸ್ಟ್ರೈಕ್​ ರೇಟ್​ನೊಂದಿಗೆ 173 ರನ್​ ಗಳಿಸಿದ್ದಾರೆ. 62 ಹೈಸ್ಕೋರ್​ ಆಗಿದೆ. ಹಾಗಾಗಿ ಬೆತೆಲ್​ ಕಡಿಮೆ ಬೆಲೆಯಲ್ಲಿ ಹೆಚ್ಚು ಸ್ಥಿರ ಪ್ರದರ್ಶನ ನೀಡುವ ಆಟಗಾರ ಎನಿಸಿಕೊಂಡಿದ್ದ ಆರ್‌ಸಿಬಿ ಆಯ್ಕೆ ಮಾಡಿದೆ. ಅಲ್ಲದೇ ಬೆತೆಲ್​ ಆಲ್​ರೌಂಡರ್ ಕೂಡ ಆಗಿರುವುದು ಆರ್​ಸಿಬಿಗೆ ಹೆಚ್ಚಿನ ಪ್ರಯೋಜನವಾಗಲಿದೆ.

ಇದನ್ನೂ ಓದಿ: IPL ಹರಾಜಿನಲ್ಲಿ ಕಾಣಿಸಿಕೊಂಡ 24 ಕನ್ನಡಿಗರಲ್ಲಿ ಸೋಲ್ಡ್​ - ಅನ್​ಸೋಲ್ಡ್​ ಆದ ಆಟಗಾರರು ಇವರೇ ನೋಡಿ!