ಚೆನ್ನೈ/ಅಹಮದಾಬಾದ್: ಐಪಿಎಲ್ನಲ್ಲಿ ಇಂದು ಸೂಪರ್ ಸಂಡೆ ಧಮಾಕಾ. ಎರಡು ಪಂದ್ಯಗಳು ನಡೆಯಲಿದ್ದು, ಕ್ರಿಕೆಟ್ ಅಭಿಮಾನಿಗಳಿಗೆ ಭರಪೂರ ಮನರಂಜನೆ ಸಿಗಲಿದೆ. ಮೊದಲ ಪಂದ್ಯದಲ್ಲಿ ಗುಜರಾತ್ ಟೈಟಾನ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಎದುರಾದರೆ, ಎರಡನೇ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಸನ್ರೈಸರ್ಸ್ ಹೈದರಾಬಾದ್ ಸೆಣಸಾಡಲಿವೆ.
ಸೋಲು-ಗೆಲುವಿನ ಸುಳಿಯಲ್ಲಿ ಗುಜರಾತ್: ಶುಭ್ಮನ್ ಗಿಲ್ ನಾಯಕತ್ವದ ಗುಜರಾತ್ ಟೈಟಾನ್ಸ್ ತಂಡ ಸೋಲು ಗೆಲುವಿನ ಸುಳಿಯಲ್ಲಿದೆ. ಒಂದು ಪಂದ್ಯ ಗೆದ್ದರೆ, ಇನ್ನೊಂದು ಸೋತಿದೆ. ಆಡಿರುವ 9 ಪಂದ್ಯಗಳಲ್ಲಿ 4 ರಲ್ಲಿ ಗೆದ್ದಿದೆ. 5 ಪಂದ್ಯಗಳನ್ನು ಕೈಚೆಲ್ಲಿದೆ. ತಂಡದಲ್ಲಿ ಶುಭ್ಮನ್ ಗಿಲ್, ಡೇವಿಡ್ ಮಿಲ್ಲರ್, ಅಜ್ಮತುಲ್ಲಾ ಓಮರ್ಝಾಯಿ, ರಶೀದ್ ಖಾನ್, ಮೋಹಿತ್ ಶರ್ಮಾರಂತಹ ಆಟಗಾರರಿದ್ದರೂ ನಿರೀಕ್ಷಿತ ಫಲಿತಾಂಶ ಸಿಗುತ್ತಿಲ್ಲ.
ಅದರಲ್ಲೂ ಕಳೆದ ವರ್ಷ ರನ್ ಶಿಖರವನ್ನೇ ಕಟ್ಟಿದ್ದ ಶುಭ್ಮನ್ಗಿಲ್ ಈ ಋತುವಿನಲ್ಲಿ 2 ಅರ್ಧಶತಕ ಮಾತ್ರ ಬಾರಿಸಿದ್ದಾರೆ. ಮೂರು ಬಾರಿ ಒಂದಂಕಿಗೆ ಔಟ್ ಆಗಿದ್ದಾರೆ. ನಾಯಕನ ವೈಫಲ್ಯದ ಜೊತೆಗೆ ಉಳಿದ ಆಟಗಾರರೂ ಉತ್ತಮ ಪ್ರದರ್ಶನ ನೀಡುತ್ತಿಲ್ಲ. ಆಫ್ಘಾನಿಸ್ತಾನ ಸೆನ್ಸೇಷನ್ ರಶೀದ್ ಖಾನ್ ಸ್ಪಿನ್ ಜಾದೂ ಕೂಡ ಕೆಲಸ ಮಾಡುತ್ತಿಲ್ಲ. ಮಿಲ್ಲರ್ ಕಿಲ್ಲರ್ ಆಗಿ ಪರಿಣಾಮ ಬೀರಿಲ್ಲ. ಮಾಜಿ ಚಾಂಪಿಯನ್ ತಂಡ ಪ್ಲೇಆಫ್ಗೇರಲು ಮುಂದಿನ ಎಲ್ಲ ಪಂದ್ಯಗಳಲ್ಲಿ ಗೆಲ್ಲಬೇಕಿದೆ.
ಇನ್ನೂ, ಕಳೆದ ಪಂದ್ಯದಲ್ಲಿ ದೈತ್ಯ ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧ ಗೆಲುವು ಸಾಧಿಸುವ ಮೂಲಕ ಆತ್ಮವಿಶ್ವಾಸ ಬೆಳೆಸಿಕೊಂಡಿರುವ ಆರ್ಸಿಬಿ ಗುಜರಾತ್ ವಿರುದ್ಧ ಅಹಮದಾಬಾದ್ನಲ್ಲಿ ಗೆಲ್ಲುವ ಉತ್ಸಾಹದಲ್ಲಿದೆ. ಇದು ಇತ್ತಂಡಗಳ ಮೊದಲ ಪೈಪೋಟಿಯಾಗಿದೆ. ವಿರಾಟ್ ಕೊಹ್ಲಿ, ರಜತ್ ಪಾಟೀದಾರ್, ವಿಲ್ ಜಾಕ್ಸ್ ಮೇಲೆ ನಿರೀಕ್ಷೆಯ ಭಾರ ಹೆಚ್ಚಿದೆ.
ಸನ್- ಕಿಂಗ್ ಚಾಲೆಂಜ್: ಎರಡನೇ ಪಂದ್ಯದಲ್ಲಿ, ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಈ ಋತುವಿನ ಡೇಂಜರಸ್ ತಂಡವಾಗಿರುವ ಸನ್ರೈಸರ್ಸ್ ಹೈದರಾಬಾದ್ ತಂಡವನ್ನು ಚೆನ್ನೈನಲ್ಲಿ ಎದುರಿಸಲಿದೆ. ಟ್ರಾವಿಸ್ ಹೆಡ್, ಅಭಿಷೇಕ್ ಶರ್ಮಾ ಪವರ್ಪ್ಲೇನಲ್ಲಿ ಅಬ್ಬರಿಸುತ್ತಿದ್ದಾರೆ. ಹೆನ್ರಿಕ್ ಕ್ಲಾಸಿನ್, ನಿತೀಶ್ರೆಡ್ಡಿ, ಆ್ಯಡಂ ಮಾರ್ಕ್ರಮ್, ಶಹಬಾಜ್ ಅಹ್ಮದ್ ಮಧ್ಯಮ ಕ್ರಮಾಂಕದಲ್ಲಿ ನೆಲೆಯೂರಿದ್ದಾರೆ. ಬೌಲಿಂಗ್ನಲ್ಲಿ ನಟರಾಜನ್, ನಾಯಕ ಪ್ಯಾಟ್ ಕಮಿನ್ಸ್, ಮಯಾಂಕ್ ಮಾರ್ಕಂಡೆ ರನ್ ಬಿಟ್ಟುಕೊಡುತ್ತಿಲ್ಲ. ತಂಡ ಆಡಿರುವ 8 ಪಂದ್ಯಗಳಲ್ಲಿ 5 ರಲ್ಲಿ ಗೆದ್ದು, ಮೂರನೇ ಕ್ರಮಾಂಕದಲ್ಲಿದೆ.
ಆರಂಭದಲ್ಲಿ ಉತ್ತಮ ಆಟವಾಡಿದ ಚೆನ್ನೈ ಬಳಿಕ ಲಯ ಕಳೆದುಕೊಂಡು ಪಾಯಿಂಟ್ ಪಟ್ಟಿಯಲ್ಲಿ 6ನೇ ಸ್ಥಾನಕ್ಕೆ ಕುಸಿದಿದೆ. ನಾಯಕ ಋತುರಾಜ್ ಗಾಯಕ್ವಾಡ್, ಶಿವಂ ದುಬೆ, ರವೀಂದ್ರ ಜಡೇಜಾ, ಎಂ.ಎಸ್.ಧೋನಿ ಮಿಂಚುತ್ತಿದ್ದಾರೆ. ಬೌಲಿಂಗ್ನಲ್ಲಿ ಮುಸ್ತಾಫಿಜರ್ ರೆಹಮಾನ್, ಮತೀಶ್ ಪತಿರಾನ, ತುಷಾರ್ ದೇಶಪಾಂಡೆ ಮತ್ತಷ್ಟು ಪ್ರಭಾವಿಯಾಗಬೇಕಿದೆ. ತಂಡ ಆಡಿರುವ 8 ರಲ್ಲಿ 4 ಗೆದ್ದು, 4 ಸೋತಿದೆ.
ಪಂದ್ಯ ಎಲ್ಲಿ, ಯಾವಾಗ: ಆರ್ಸಿಬಿ ಮತ್ತು ಗುಜರಾತ್, ಮಧ್ಯಾಹ್ನ 3.30ಕ್ಕೆ, ಅಹಮದಾಬಾದ್
ಸಿಎಸ್ಕೆ ಮತ್ತು ಎಸ್ಆರ್ಹೆಚ್, ಸಂಜೆ 7.30ಕ್ಕೆ, ಚೆನ್ನೈ
ಇದನ್ನೂ ಓದಿ: ಸಂಜು ಸ್ಯಾಮ್ಸನ್, ಧ್ರುವ್ ಜುರೆಲ್ ಜೊತೆಯಾಟದಿಂದ ರಾಜಸ್ಥಾನಕ್ಕೆ ಗೆಲುವು - IPL 2024 RR Beat LSG
