ಟಿ20 ವಿಶ್ವಕಪ್: ಓಮನ್ ವಿರುದ್ಧ 3.1 ಓವರ್​ಗಳಲ್ಲೇ ಗೆದ್ದು ಬೀಗಿದ ಇಂಗ್ಲೆಂಡ್​ - England Defeats Oman

ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ಓಮನ್ ವಿರುದ್ಧ 8 ವಿಕೆಟ್​ಗಳ ಅಮೋಘ ಜಯ ಸಾಧಿಸಿದ ಇಂಗ್ಲೆಂಡ್​ ತಂಡವು ಸೂಪರ್​ - 8 ಹಂತಕ್ಕೇರುವ ಕನಸನ್ನು ಉಳಿಸಿಕೊಂಡಿದೆ.

ನಾರ್ತ್ ಸೌಂಡ್ (ಆಂಟಿಗುವಾ): ಇಲ್ಲಿನ ಸರ್ ವಿವಿಯನ್ ರಿಚರ್ಡ್ಸ್ ಮೈದಾನದಲ್ಲಿ ಗುರುವಾರ ನಡೆದ ಟಿ20 ವಿಶ್ವಕಪ್​ ಟೂರ್ನಿಯ ಪಂದ್ಯದಲ್ಲಿ ಜೋಸ್ ಬಟ್ಲರ್ ನೇತೃತ್ವದ ಇಂಗ್ಲೆಂಡ್ ತಂಡವು ಓಮನ್ ವಿರುದ್ಧ 8 ವಿಕೆಟ್​ಗಳ ಭರ್ಜರಿ ಜಯ ದಾಖಲಿಸಿತು. ಓಮನ್​ ನೀಡಿದ 48 ರನ್​ ಅಲ್ಪಮೊತ್ತವನ್ನು ಬೆನ್ನಟ್ಟಿದ ಆಂಗ್ಲರು 3.1 ಓವರ್​ಗಳಲ್ಲೇ ತಲುಪುವ ಮೂಲಕ ಗೆಲುವಿನ ನಗೆ ಬೀರಿದರು.

• England get it done in Antigua 🇦🇬#T20WorldCup | #ENGvOMA | 📝 https://t.co/hrhtHZS64T pic.twitter.com/Jz4FbkIIvE

  — ICC (@ICC) June 13, 2024

ಮಹತ್ವದ ಪಂದ್ಯದಲ್ಲಿ ಓಮನ್ ವಿರುದ್ಧ ಟಾಸ್ ಗೆದ್ದ ಇಂಗ್ಲೆಂಡ್, ಮೊದಲು ಬೌಲಿಂಗ್ ಮಾಡಲು ನಿರ್ಧರಿಸಿತು. ನಾಯಕನ ನಿರ್ಧಾರಕ್ಕೆ ತಕ್ಕಂತೆ ಆಂಗ್ಲ ಬೌಲರ್​ಗಳು ಓಮನ್​ ಬ್ಯಾಟರ್​ಗಳ ಮೇಲೆ ಸವಾರಿ ನಡೆಸಿದರು. ಇಂಗ್ಲೆಂಡ್ ಬೌಲಿಂಗ್ ದಾಳಿಗೆ ತತ್ತರಿಸಿದ ಓಮನ್​ ಕೇವಲ 13.2 ಓವರ್​ಗಳಲ್ಲೇ 47 ರನ್​ಗೆ ಆಲೌಟ್​ ಆಯಿತು. ತಂಡದ ಪರ ಶೋಯಬ್​ ಖಾನ್ (11) ಮಾತ್ರ ಎರಡಂಕಿ ಮೊತ್ತ ತಲುಪಿದರು.

ದ್ವಿತೀಯ ಓವರ್​ನಿಂದಲೇ ಓಮನ್​ ವಿಕೆಟ್​ ಬೀಳುವ ಸರಣಿ ಆರಂಭವಾಯಿತು. ಕಶ್ಯಪ್ ಪ್ರಜಾಪತಿ 9, ವಿಕೆಟ್ ಕೀಪರ್​ ಪ್ರತೀಕ್ ಅಠವಳೆ 5, ನಾಯಕ ಅಕಿಬ್ ಇಲ್ಯಾಸ್ 8, ಜೀಶನ್ ಮಕ್ಸೂದ್ 1, ಖಾಲಿದ್ ಕೈಲ್ 1, ಅಯಾನ್ ಖಾನ್ 1, ಮೆಹ್ರಾನ್ ಖಾನ್ 0, ಫಯಾಜ್ ಬಟ್ 2 ಕಲೀಮುಲ್ಲಾ 5 ಹಾಗೂ ಬಿಲಾಲ್ ಖಾನ್ 0* ರನ್​ ಗಳಿಸಿದರು. ಇಂಗ್ಲೆಂಡ್​ ಪರ ಜೋಫ್ರಾ ಆರ್ಚರ್​ 12ಕ್ಕೆ3, ಮಾರ್ಕ್​ ವುಡ್​ 12ಕ್ಕೆ 3 ಹಾಗೂ ಆದಿಲ್​ ರಶಿದ್ 11 ರನ್​ಗೆ 4 ವಿಕೆಟ್ ಕಬಳಿಸಿ ಭಾರಿ ಮೇಲುಗೈ ಒದಗಿಸಿದರು.

48 ರನ್​ ಮೊತ್ತ ಬೆನ್ನತ್ತಿದ ಇಂಗ್ಲೆಂಡ್​ 3.1 ಓವರ್​ಗಳಲ್ಲೇ ಗುರಿ ತಲುಪಿತು. ಫಿಲಿಪ್​ ಸಾಲ್ಟ್​ 3 ಎಸೆತಗಳಲ್ಲಿ 2 ಸಿಕ್ಸರ್​ ಸಹಿತ 12 ರನ್​ ಬಾರಿಸಿ ಔಟಾದರೆ, ವಿಲ್​ ಜಾಕ್ಸ್​ 5 ರನ್​ಗೆ ಪೆವಿಲಿಯನ್​ಗೆ ಮರಳಿದರು. ಬಳಿಕ ನಾಯಕ ಜೋಸ್​ ಬಟ್ಲರ್​ ಅಜೇಯ 24 ಹಾಗೂ ಜಾನಿ ಬೈರ್​​ಸ್ಟೋ 8* ರನ್​ ಬಾರಿಸಿ ಇಂಗ್ಲೆಂಡ್​ಗೆ ಗೆಲುವು ತಂದಿದ್ದರು.

ಇದನ್ನೂ ಓದಿ: ​ಟಿ20 ವಿಶ್ವಕಪ್​ಗಾಗಿ ₹250 ಕೋಟಿ ವೆಚ್ಚದಲ್ಲಿ ನಿರ್ಮಿಸಿದ್ದ ನ್ಯೂಯಾರ್ಕ್​ ಕ್ರೀಡಾಂಗಣ ನೆಲಸಮ! - Nassau Cricket Stadium

ಸೂಪರ್​-8ಗೆ ಪೈಪೋಟಿ: ಅಬ್ಬರದ ಗೆಲುವಿನೊಂದಿಗೆ ಬಿ ಗ್ರೂಪ್​ನಲ್ಲಿ ಇಂಗ್ಲೆಂಡ್​ ಅತ್ಯಮೂಲ್ಯ ರನ್​ರೇಟ್​ ಏರಿಕೆ ಮಾಡಿಕೊಂಡಿತು. 3 ಪಂದ್ಯಗಳಲ್ಲಿ ತಲಾ ಒಂದರಲ್ಲಿ ಸೋಲು ಹಾಗೂ ಗೆಲುವು ಕಂಡಿರುವ ತಂಡವು 3 ಅಂಕಗಳೊಂದಿಗೆ +3.081 ರನ್​ ದರ ಹೊಂದಿದೆ. ಇನ್ನೊಂದೆಡೆ, ಮೂರು ಪಂದ್ಯಗಳಲ್ಲಿ 2ರಲ್ಲಿ ಗೆದ್ದು 5 ಅಂಕ ಹೊಂದಿರುವ ಸ್ಕಾಟ್ಲೆಂಡ್​ +2.164 ರನ್​ರೇಟ್​ನೊಂದಿಗೆ ಮುಂದಿನ ಹಂತಕ್ಕೇರಲು ಆಂಗ್ಲರಿಗೆ ಸವಾಲೊಡ್ಡಿದೆ. ಇವೆರಡೂ ತಂಡಗಳ ನಡುವಿನ ಪಂದ್ಯವು ಮಳೆಯಿಂದ ರದ್ದಾಗಿದ್ದರಿಂದ ತಲಾ 1 ಅಂಕ ಪಡೆದಿದ್ದವು.

ಮುಂದಿನ ಪಂದ್ಯಗಳಲ್ಲಿ ಜೂನ್​ 15ರಂದು ಇಂಗ್ಲೆಂಡ್ ತಂಡವು ನಮೀಬಿಯಾ ವಿರುದ್ಧ ಆಡಲಿದ್ದು, ಸ್ಕಾಟ್ಲೆಂಡ್ ತಂಡ ಆಸ್ಟ್ರೇಲಿಯಾ ಜೊತೆ ಸೆಣಸಲಿದೆ. ಈ ಪಂದ್ಯಗಳ ಫಲಿತಾಂಶದ ಮೇಲೆ ಮುಂದಿನ ಹಂತವು ನಿರ್ಧಾರವಾಗಲಿದೆ. ಈಗಾಗಲೇ ಆಡಿದ ಮೂರು ಪಂದ್ಯಗಳನ್ನು ಜಯಿಸಿರುವ ಕಾಂಗರೂಪಡೆ ಬಿ ಗ್ರೂಪ್​ನ ಅಗ್ರ ತಂಡವಾಗಿ ಸೂಪರ್​-8 ಹಂತಕ್ಕೆ ತಲುಪಿದೆ.

ಇದನ್ನೂ ಓದಿ: ​'ವಿರಾಟ್​ ಕೊಹ್ಲಿಗೆ ಏನಾಗಿದೆ?': ಬ್ಯಾಟಿಂಗ್​ ಕಿಂಗ್​ ಕಳಪೆ ಪ್ರದರ್ಶನಕ್ಕೆ ಅಭಿಮಾನಿಗಳು ಬೇಸರ - virat kohli