ಮುಂಬೈ: ಟಿ20 ವಿಶ್ವಕಪ್ನಲ್ಲಿ ತನ್ನ ಬಲವನ್ನು ತೋರಿಸುವೆ ಎಂದಿದ್ದ ರೋಹಿತ್ ಶರ್ಮಾ ಅದರ ಟ್ರೈಲರ್ ಎಂಬಂತೆ ಆಡಿದ, ಅದ್ಭುತ ಶತಕದ ಇನಿಂಗ್ಸ್ ಹೊರತಾಗಿಯೂ ಭಾನುವಾರ ಇಲ್ಲಿ ನಡೆದ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ಸೋಲು ಕಂಡಿದೆ.
ಚೆನ್ನೈ ಮತ್ತು ಮುಂಬೈ ತಂಡದ ಇಬ್ಬರೂ ಮಾಜಿ ನಾಯಕರಾದ ಎಂಎಸ್ ದೋನಿ ಮತ್ತು ರೋಹಿತ್ ಶರ್ಮಾ ಪಂದ್ಯದಲ್ಲಿ ತಮ್ಮ ತೋಳ್ಬಲ ಪ್ರದರ್ಶಿಸಿದರು. ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದ ನಿವೃತ್ತರಾದರೂ ದೋನಿ ಸತತ 3 ಸಿಕ್ಸರ್ ಸಿಡಿಸಿ ಅಭಿಮಾನಿಗಳನ್ನು ರಂಜಿಸಿದರು. ಇತ್ತ, ರೋಹಿತ್ ತಮ್ಮ ಹೆಸರಿನ ಮುಂದಿನ 'ಹಿಟ್ಮ್ಯಾನ್' ಗುಣವಾಚಕಕ್ಕೆ ಸಮನಾಗಿ ಬ್ಯಾಟ್ ಮಾಡಿ ವಾಂಖೆಡೆ ಕ್ರೀಡಾಂಗಣದಲ್ಲಿ ಅಲೆ ಎಬ್ಬಿಸಿದರು.
ಮುಂಬೈ ಬೆಂಬಿಡದ ಸೋಲು: ಭಾನುವಾರ ಇಲ್ಲಿ ನಡೆದ ಇಂಡಿಯನ್ ಪ್ರೀಮಿಯರ್ ಲೀಗ್ ಪಂದ್ಯದಲ್ಲಿ ರೋಹಿತ್ ಶರ್ಮಾ ಅಜೇಯ 105 ರನ್ ಗಳಿಸಿದ ಹೊರತಾಗಿಯೂ. ಮಹೇಶ್ ಪತಿರಾನ ದಾಳಿಗೆ ಸಿಲುಕಿ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಮುಂಬೈ ಇಂಡಿಯನ್ಸ್ 20 ರನ್‌ಗಳಿಂದ ಪರಾಜಯ ಕಂಡಿತು. ಸಿಎಸ್ಕೆ ನೀಡಿದ 206 ರನ್ಗಳ ಗುರಿಯನ್ನು ದಾಟುವಾಗ ಕೊನೆಯಲ್ಲಿ ಎಡವಿದ ಮುಂಬೈ 186 ರನ್ ಗಳಿಸಿತು. ಜೊತೆಗೆ ಟೂರ್ನಿಯಲ್ಲಿ 4ನೇ ಸೋಲು ಕಂಡಿತು. ಸಿಎಸ್ಕೆ 4ನೇ ಗೆಲುವಿನೊಂದಿಗೆ ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೇರಿತು.
ರೋ'ಹಿಟ್' ಶತಕದ ಸೊಬಗು: ದೊಡ್ಡ ಮೊತ್ತದ ಗುರಿ ಬೆಂಬತ್ತಿದ ಮುಂಬೈಗೆ ಹಿಟ್ಮ್ಯಾನ್ ರೋಹಿತ್ ಮತ್ತು ಇಶಾನ್ ಕಿಶನ್ ಭರ್ಜರಿ ಆರಂಭ ನೀಡಿದರು. 7 ಓವರ್ಗಳಲ್ಲಿ 70 ರನ್ ಗಳಿಸಿದರು. ಕಿಶನ್ ಔಟಾದ ಬಳಿಕ ತಂಡ ರನ್ ಗಳಿಸಲು ಪರದಾಡಿತು. ಶತಕ ಬಾರಿಸಿದ ರೋಹಿತ್ಗೆ ಇನ್ನೊಂದು ತುದಿಯಲ್ಲಿ ಉತ್ತಮ ಬೆಂಬಲ ಸಿಗಲಿಲ್ಲ. ತಿಲಕ್ ವರ್ಮಾ 31 ರನ್ ಕಾಣಿಕೆ ನೀಡಿದರು.
ಪತಿರಾನ ಬೆಂಕಿ ಯಾರ್ಕರ್: ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಕಣಕ್ಕಿಳಿದ ಯುವ ವೇಗಿ ಮಹೇಶ್ ಪತಿರಾನ ತನಗೆ ಕೊಟ್ಟ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದರು. ಮೊದಲ ಎಸೆತದಲ್ಲೇ ಕಿಶನ್ ವಿಕೆಟ್ ಪಡೆದು ಮುಂಬೈ ಸೋಲಿಗೆ ನಾಂದಿ ಹಾಡಿದರು. ಇದಾದ ಬಳಿಕ ವಿಶ್ವದ ನಂಬರ್ 1 ಟಿ20 ಬ್ಯಾಟರ್ ಸೂರ್ಯಕುಮಾರ್ ಯಾದವ್ (0), ತಿಲಕ್ ವರ್ಮಾ (31), ರೊಮಾರಿಯೊ ಶೆಫರ್ಡ್ (1)ರನ್ನ ಕ್ಲೀನ್ಬೌಲ್ಡ್ ಮಾಡಿ 4 ವಿಕೆಟ್ ಪಡೆಯುವ ಮೂಲಕ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.
ಗಾಯಕ್ವಾಡ್ - ದುಬೆ ಫಿಫ್ಟಿ: ಇದಕ್ಕೂ ಮೊದಲು ಬ್ಯಾಟ್ ಮಾಡಿದ ಸಿಎಸ್ಕೆ ಆರಂಭಿಕ ಸ್ಥಾನದಲ್ಲಿ ಬದಲಾವಣೆ ಮಾಡಿದರೂ ಯಶಸ್ಸು ಸಾಧಿಸಲಿಲ್ಲ. ನಾಯಕ ಋತುರಾಜ್ ಗಾಯಕ್ವಾಡ್ ಬದಲಿಗೆ ಅಜಿಂಕ್ಯಾ ರಹಾನೆ ಕಣಕ್ಕಿಳಿದರು. 5 ರನ್ಗೆ ರಹಾನೆ ಔಟಾದರೆ, ರಚಿನ್ ರವೀಂದ್ರ 21 ರನ್ಗೆ ವಿಕೆಟ್ ನೀಡಿದರು. ಇದಾದ ಬಳಿಕ ಜೊತೆಯಾದ ಗಾಯಕ್ವಾಡ್ ಮತ್ತು ಶಿವಂ ದುಬೆ ಭರ್ಜರಿ ಬ್ಯಾಟ್ ಮಾಡಿದರು. ಗಾಯಕ್ವಾಡ್ 40 ಎಸೆತಗಳಲ್ಲಿ 69 ರನ್, ದುಬೆ 38 ಬಾಲ್ನಲ್ಲಿ 66 ರನ್ ಗಳಿಸಿದರು.
ಧೋನಿ 'ಸಿಕ್ಸರ್ಸ್' ಅಲೆ: ವಾಂಖೆಡೆ ಸ್ಟೇಡಿಯಂನಲ್ಲಿ ನಿಜಕ್ಕೂ ಅಲೆ ಎಬ್ಬಿಸಿದ್ದು ಮಹೇಂದ್ರ ಸಿಂಗ್ ಧೋನಿ. ಸಿಎಸ್ಕೆ ಇನಿಂಗ್ಸ್ ಮುಕ್ತಾಯಕ್ಕೆ 4 ಎಸೆತ ಬಾಕಿ ಇರುವಾಗ ಕಣಕ್ಕಿಳಿದ ದೋನಿ, ಹಾರ್ದಿಕ್ ಪಾಂಡ್ಯ ಬೌಲಿಂಗ್ನಲ್ಲಿ ಸತತ ಮೂರು ಭರ್ಜರಿ ಸಿಕ್ಸರ್ ಬಾರಿಸಿದರು. ಇದು ಐಪಿಎಲ್ ವೀಕ್ಷಿಸುತ್ತಿದ್ದ ಅಭಿಮಾನಿಗಳನ್ನು ಹುಚ್ಚೆದ್ದು ಕುಣಿಯುವಂತೆ ಮಾಡಿತು. ದೋನಿ ಬ್ಯಾಟಿಂಗ್ ನೋಡಲು ಬಂದಿದ್ದ ಫ್ಯಾನ್ಸ್ಗೆ ನಿರಾಸೆಯಾಗಲಿಲ್ಲ. 4 ಎಸೆತಗಳಲ್ಲಿ 20 ರನ್ ಗಳಿಸಿದರು. ಸ್ಟ್ರೈಕ್ರೇಟ್ 500 ಇತ್ತು.
ಇದನ್ನೂ ಓದಿ: ವಾಂಖೆಡೆಯಲ್ಲಿ ಚೆನ್ನೈ ಅಬ್ಬರ, ಕೊನೆಯ ಓವರ್ನಲ್ಲಿ ಧೋನಿ ಬೆಂಕಿ ಬ್ಯಾಟಿಂಗ್; ಮುಂಬೈಗೆ 207 ರನ್ಗಳ ಗುರಿ - MI VS CSK
