ನಿಮ್ಮ ವ್ಯಾಲೆಂಟೈನ್ಸ್​ ಡೇ ಪ್ಲಾನ್​​ ಏನು?: ಕ್ಷಮೆ ಕೇಳಿದ ರಶ್ಮಿಕಾ - ಕಾರಣ?

ಕೆಲಸದ ಒತ್ತಡದಿಂದ ಕೆಲಕಾಲ ಅಭಿಮಾನಿಗಳ ಮುಂದೆ ಬರಲು ಸಾಧ್ಯವಾಗದೇ ಇದ್ದದ್ದಕ್ಕೆ ಕೊಡಗಿನ ಕುವರಿ ರಶ್ಮಿಕಾ ಸೋಷಿಯಲ್​ ಮೀಡಿಯಾದಲ್ಲಿ ಕ್ಷಮೆ ಯಾಚಿಸಿದ್ದಾರೆ.

ಹೈದರಾಬಾದ್​: ಪ್ರಸ್ತುತ ಅಲ್ಲು ಅರ್ಜುನ್​ ಜೊತೆಗೆ ಪುಷ್ಪ 2 ಸಿನಿಮಾದ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿರುವ ನಟಿ ರಶ್ಮಿಕಾ ಮಂದಣ್ಣ ಸಾಮಾಜಿಕ ಜಾಲತಾಣಗಳ ಮೂಲಕ ತಮ್ಮ ಆರೋಗ್ಯದ ಬಗ್ಗೆ ಅಪ್​ಡೇಟ್​ ನೀಡಿದ್ದಾರೆ. ಕಳೆದ ಕೆಲವು ದಿನಗಳಿಂದ ಇನ್​ಸ್ಟಾಗ್ರಾಂಗೆ ಗೈರಾಗಿದ್ದ ರಶ್ಮಿಕಾ ಮಂದಣ್ಣ ಇದೀಗ ತಮ್ಮ ಎರಡು ಫೋಟೋಗಳನ್ನು ಹಂಚಿಕೊಂಡು, ಅಭಿಮಾನಿಗಳಿಗೆ ಸಾಮಾಜಿಕ ಮಾಧ್ಯಮಗಳಲ್ಲಿ ಸಕ್ರಿಯವಾಗಿಲ್ಲದ ಕಾರಣವನ್ನು ಬಹಿರಂಗ ಪಡಿಸಿದ್ದಾರೆ. ಅಭಿಮಾನಿಗಳ ಮುಂದೆ ಬರದೇ ಇರುವುದಕ್ಕೂ ರಶ್ಮಿಕಾ ಕ್ಷಮೆ ಕೇಳಿದ್ದಾರೆ.

ಸಾಮಾಜಿಕ ಜಾಲತಾಣಗಳಾದ ಎಕ್ಸ್​, ಇನ್​ಸ್ಟಾಗ್ರಾಂ, ಹಾಗೂ ಫೇಸ್​ಬುಕ್​ಗಳಲ್ಲಿ ನಟಿ ರಶ್ಮಿಕಾ ಮಂದಣ್ಣ ಎರಡು ಫೋಟೋಗಳನ್ನು ಪೋಸ್ಟ್​ ಮಾಡಿದ್ದಾರೆ. ಸುದೀರ್ಘವಾದ ಪೋಸ್ಟ್​ ಒಂದನ್ನು ಹಂಚಿಕೊಂಡಿರುವ ಕೊಡಗಿನ ಕುವರಿ, ಅಭಿಮಾನಿಗಳು ಎಲ್ಲಿದ್ದೀರಾ? ವ್ಯಾಲೆಂಟೈನ್ಸ್​ ಡೇ ಯೋಜನೆ ಏನು ಎಂದು ಹೇಳಿ ಎಂದು ಪೋಸ್ಟ್​ ಹಾಕಿದ್ದಾರೆ. ಈ ಮೂಲಕ ಅಭಿಮಾನಿಗಳ ಮನ ಗೆಲ್ಲುವಲ್ಲಿ ಯಶಸ್ವಿಯಾಗಿದ್ದಾರೆ.

ಪೋಸ್ಟ್​ನಲ್ಲಿ "ಕೆಲಕಾಲ ನಿಮ್ಮ ಮುಂದೆ ಬರದೇ ಇದ್ದದ್ದಕ್ಕೆ ಕ್ಷಮಿಸಿ. ಅತಿಯಾದ ಕೆಲಸದ ವೇಳಾಪಟ್ಟಿಯಿಂದಾಗಿ ಸ್ವಲ್ಪ ಅಸ್ವಸ್ಥಳಾಗಿದ್ದೇನೆ. ಆದರೆ ನಿಮ್ಮನ್ನೇ ಮಾತನಾಡಿಸಲೆಂದು ಬಂದಿದ್ದೇನೆ. ಅಭಿಮಾನಿಗಳೇ ನಿಮ್ಮನ್ನು ತುಂಬಾ ಮಿಸ್​ ಮಾಡಿಕೊಳ್ಳುತ್ತೇನೆ." ಎಂದು ಟ್ವೀಟ್​​ನಲ್ಲಿ ಹೇಳಿಕೊಂಡಿದ್ದಾರೆ.