ಈ ಸಾಲಿನ ಬಹುನಿರೀಕ್ಷಿತ ಚಿತ್ರಗಳಲ್ಲಿ ಒಂದಾದ 'ಮಿಸ್ಟರ್ ಅಂಡ್ ಮಿಸೆಸ್ ಮಾಹಿ'ಯ ಅಧಿಕೃತ ಟ್ರೇಲರ್ ನಾಳೆ ಅನಾವರಣಗೊಳ್ಳಲಿದೆ. ಬಿಡುಗಡೆಗೆ ಸಜ್ಜಾಗಿರುವ ಜಾಹ್ನವಿ ಕಪೂರ್ ಮತ್ತು ರಾಜ್‌ಕುಮಾರ್ ರಾವ್ ಅಭಿನಯದ ಈ ಚಿತ್ರದ ಟ್ರೇಲರ್ ವೀಕ್ಷಿಸಲು ಅಭಿಮಾನಿಗಳು ಕಾತರರಾಗಿದ್ದಾರೆ. ಇದೀಗ ಟ್ರೇಲರ್ ರಿಲೀಸ್ ಡೇಟ್ ಅನೌನ್ಸ್ ಆಗಿದೆ.
ಜಾಹ್ನವಿ, ರಾಜ್‌ಕುಮಾರ್ ಸಿನಿಮಾಗಳು ಚಿತ್ರಮಂದಿರಗಳಲ್ಲಿ ತೆರೆಕಂಡು ಕೆಲ ಸಮಯವಾಗಿದೆ. ಈ ಹಿನ್ನೆಲೆ, ಅಭಿಮಾನಿಗಳು 'ಮಿಸ್ಟರ್ ಅಂಡ್ ಮಿಸೆಸ್ ಮಾಹಿ' ವೀಕ್ಷಿಸುವ ಕಾತರದಲ್ಲಿದ್ದಾರೆ. ಸಿನಿಮಾ ಸುತ್ತಲಿನ ಉತ್ಸಾಹದ ನಡುವೆ ಚಿತ್ರನಿರ್ಮಾಪಕರು ಟ್ರೇಲರ್ ಅನಾವರಣದ ದಿನಾಂಕವನ್ನು ಘೋಷಿಸಿದ್ದಾರೆ. ಚಿತ್ರತಂಡ ಸಾಮಾಜಿಕ ಮಾಧ್ಯಮದಲ್ಲಿಂದು ಚಿತ್ರದ ಹೊಸ ಪೋಸ್ಟರ್ ಬಿಡುಗಡೆ ಮಾಡಿ, ಟ್ರೇಲರ್ ಬಿಡುಗಡೆ ದಿನಾಂಕ ಪ್ರಕಟಿಸಿದೆ. ಮೇ 12ರ ಭಾನುವಾರ ಟ್ರೇಲರ್ ಅನಾವರಣಗೊಳ್ಳಲಿದೆ.
ಖ್ಯಾತ ನಿರ್ಮಾಪಕ ಕರಣ್ ಜೋಹರ್ ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ನಲ್ಲಿ ಹೊಸ ಪೋಸ್ಟರ್ ಹಂಚಿಕೊಳ್ಳುವ ಮೂಲಕ ಟ್ರೇಲರ್ ಬಿಡುಗಡೆ ದಿನಾಂಕವನ್ನು ಘೋಷಿಸಿದರು. ಪೋಸ್ಟರ್ನಲ್ಲಿ ಮುಖ್ಯಭೂಮಿಕೆಯಲ್ಲಿರುವ ಜಾಹ್ನವಿ ಮತ್ತು ರಾಜ್‌ಕುಮಾರ್ ಕ್ರಿಕೆಟ್ ತಂಡದ ಔಟ್ಫಿಟ್ ಧರಿಸಿದ್ದು, ಒಬ್ಬರನ್ನೊಬ್ಬರು ಪರಸ್ಪರ ಪ್ರೀತಿಯಿಂದ ನೋಡುತ್ತಿದ್ದಾರೆ. ಪೋಸ್ಟರ್ನಲ್ಲಿ ಇಬ್ಬರ ಕೆಮಿಸ್ಟ್ರಿ ವರ್ಕ್ಔಟ್ ಆಗಿದೆ. ಅಲ್ಲದೇ ಫೋಟೋದಲ್ಲಿ "ಎ ಗೂಗ್ಲಿ ಆಫ್ ಎ ಲವ್ ಸ್ಟೋರಿ" ಎಂದು ಬರೆಯಲಾಗಿದ್ದು, ಸಿನಿಮಾ ಸುತ್ತಲಿನ ಕುತೂಹಲ ಹೆಚ್ಚಿಸಿದೆ.
ಟ್ರೇಲರ್ ನಾಳೆ ಮಧ್ಯಾಹ್ನ 2:40ಕ್ಕೆ ಮೊದಲು ಸ್ಟಾರ್ ಸ್ಪೋರ್ಟ್ಸ್‌ನಲ್ಲಿ ಪ್ರತ್ಯೇಕವಾಗಿ ಬಿಡುಗಡೆಯಾಗಲಿದೆ. ನಂತರ 3:40ಕ್ಕೆ ಯೂಟ್ಯೂಬ್ನಲ್ಲಿ ಅನಾವರಣಗೊಳ್ಳಲಿದೆ. ಸುದ್ದಿ ತಿಳಿಸಿದ ಕರಣ್ ಜೋಹರ್, "ಏಕ್ ಸಪ್ನಾ, ದೋ ದಿಲ್. ಪ್ರೀತಿ, ಕನಸುಗಳುಳ್ಳ ಹೊಸ ಇನ್ನಿಂಗ್ಸ್ ಇಮ್ಪರ್ಫೆಕ್ಟ್ಲಿಪರ್ಫೆಕ್ಟ್ ಪಾರ್ಟ್ನರ್ಶಿಪ್ನ ಸಂದೇಶ ನೀಡಲು ಸಜ್ಜಾಗಿದೆ. ಮಿಸ್ಟರ್ ಆ್ಯಂಡ್ ಮಿಸೆಸ್ ಮಾಹಿ ಟ್ರೇಲರ್ ನಾಳೆ ಬಿಡುಗಡೆ ಆಗಲಿದೆ. ಸಿನಿಮಾ ಇದೇ ಮೇ. 31ರಂದು ಚಿತ್ರಮಂದಿರ ಪ್ರವೇಶಿಸಲಿದೆ" ಎಂದು ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ: ಅಮೆರಿಕದಲ್ಲಿ 'ಗೋಟ್' ಚಿತ್ರೀಕರಣ: ಎಸ್ಎಸ್ಎಲ್ಸಿ, ಪಿಯುಸಿ ಟಾಪರ್ಸ್ ಭೇಟಿಯಾಗಲಿದ್ದಾರೆ ವಿಜಯ್ - Vijay
ಚಿತ್ರದಲ್ಲಿ ಮಹೇಂದ್ರ ಸಿಂಗ್ ಧೋನಿ ಪಾತ್ರವನ್ನು ರಾಜ್‌ಕುಮಾರ್ ರಾವ್ ನಿರ್ವಹಿಸಿದ್ದರೆ, ಜಾಹ್ನವಿ ಕಪೂರ್ ಮಹಿಮಾ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. 2020ರಲ್ಲಿ 'ಗುಂಜನ್ ಸಕ್ಸೇನಾ - ದಿ ಕಾರ್ಗಿಲ್ ಗರ್ಲ್' ಚಿತ್ರದ ಮೂಲಕ ಚಿತ್ರಂಗ ಪ್ರವೇಶಿಸಿದ ಶರಣ್ ಶರ್ಮಾ ಈ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ಧಡಕ್, ರೂಹಿ ಮತ್ತು ಮಿಲಿ ನಂತರ ಚಿತ್ರಮಂದಿರದಲ್ಲಿ ಬಿಡುಗಡೆ ಆಗುತ್ತಿರುವ ಜಾಹ್ನವಿ ಅವರ ನಾಲ್ಕನೇ ಚಿತ್ರ. ನಟಿಯ ಪೊಲಿಟಿಕಲ್ ಥ್ರಿಲ್ಲರ್ ಉಲಜ್ಹ್ ಮತ್ತು ಜೂನಿಯರ್ ಎನ್‌ಟಿಆರ್, ಸೈಫ್ ಅಲಿ ಖಾನ್ ಜೊತೆಗಿನ ಪ್ಯಾನ್-ಇಂಡಿಯಾ ಪ್ರಾಜೆಕ್ಟ್ ದೇವರ ಸೇರಿದಂತೆ ಇನ್ನೆರಡು ಚಿತ್ರಗಳು ಬಿಡುಗಡೆಗೆ ಎದುರು ನೋಡುತ್ತಿದೆ. ರಾಜ್‌ಕುಮಾರ್ ರಾವ್ ಸ್ತ್ರೀ 2 ಮತ್ತು ವಿಕ್ಕಿ ವಿದ್ಯಾ ಕಾ ವೋ ವಾಲಾ ವಿಡಿಯೋ ಸೇರಿದಂತೆ ಕೆಲ ಪ್ರಾಜೆಕ್ಟ್ಗಳನ್ನು ಹೊಂದಿದ್ದಾರೆ. ಇವೆರಡೂ ಕೂಡ 2024ರಲ್ಲೇ ಬಿಡುಗಡೆಯಾಗಲಿದೆ.
