ಕನ್ನಡ ಕಿರುತೆರೆಯ ಅತ್ಯಂತ ಪಾಪ್ಯುಲರ್ ಪ್ರೋಗ್ರಾಮ್ 'ಬಿಗ್ ಬಾಸ್ ಸೀಸನ್ 11' ಅಂತಿಮ ಘಟ್ಟದಲ್ಲಿದೆ. ಮುಂದಿನ ವಾರಾಂತ್ಯ ಗ್ರ್ಯಾಂಡ್ ಫಿನಾಲೆ ನಡೆಯಲಿದ್ದು, ಈ ಮಿಡ್ ವೀಕ್ನಲ್ಲಿ ಓರ್ವರು ಮನೆಯಿಂದ ಹೊರನಡೆಯಬೇಕಿತ್ತು. ಅದರಂತೆ, ಕಳೆದ ಸಂಚಿಕೆಯಲ್ಲಿ ಈ ವಿಷಯನ್ನು ಪ್ರಸ್ತಾಪಿಸಲಾಗಿತ್ತು ಕೂಡಾ. ಆದ್ರೆ ಎಲಿಮಿನೇಷನ್ ಪ್ರಕ್ರಿಯೆಯನ್ನು ಅರ್ಧಕ್ಕೆ ನಿಲ್ಲಿಸಿ, ಸ್ಪರ್ಧಿಗಳೂ ಸೇರಿದಂತೆ ಪ್ರೇಕ್ಷಕರ ಎದೆಬಡಿತ ಹೆಚ್ಚಿಸಿದ್ದರು ಬಿಗ್ ಬಾಸ್.
ಮೋಸದ ಪರಿಣಾಮ ಎಲಿಮಿನೇಷನ್ ಮೇಲೆ: ದಿನದಿಂದ ದಿನಕ್ಕೆ ಆಟದಲ್ಲಿ ಹಲವು ಟ್ವಿಸ್ಟ್ಗಳಾಗುತ್ತಿವೆ. ರೋಚಕತೆಯಿಂದ ಬಿಗ್ ಬಾಸ್ ಮುನ್ನುಗ್ಗುತ್ತಿದ್ದು, ಪ್ರಸ್ತುತ ಅತ್ಯಂತ ಜನಪ್ರಿಯತೆ ಸಂಪಾದಿಸುವ ಧನರಾಜ್ ಆಚಾರ್ ಅವರು ತಪ್ಪಿತಸ್ಥನ ಜಾಗದಲ್ಲಿ ನಿಂತಿದ್ದಾರೆ. ಈ ಹಿಂದೆ ತಿಳಿದೋ ಅಥವಾ ತಿಳಿಯದೆಯೋ ಭವ್ಯಾ ಅವರ ಕೈಯಿಂದ ಮೋಸಗಳಾಗಿದ್ದವು. ಅದನ್ನು ಕಾರ್ಯಕ್ರಮದ ನಿರೂಪಕ ಸುದೀಪ್ ಅವರು ವಾರದ ಕಥೆ ಕಿಚ್ಚನ ಜೊತೆ ಸಂಚಿಕೆಗಳಲ್ಲಿ ಪ್ರಸ್ತಾಪಿಸಿ, ನೀಯತ್ತಿನ ಆಟದ ಬಗ್ಗೆ ಪ್ರತೀ ಸ್ಪರ್ಧಿಗಳಿಗೂ ತಿಳಿ ಹೇಳಿದ್ದರು. ಈ ವಾರದಲ್ಲಿ ನಡೆದ ಟಾಸ್ಕ್ನಲ್ಲಿ ತಿಳಿದೋ ಅಥವಾ ತಿಳಿಯದೆಯೋ ಧನರಾಜ್ ಆಚಾರ್ ಅವರ ಕೈಯಿಂದಲೂ ಮೋಸ ನಡೆದಿದೆ. ಇದರ ಪರಿಣಾಮ ಎಲಿಮಿನೇಷನ್ ಮೇಲೆ ಬಿದ್ದಿದೆ.
''ಬ್ರೇಕ್ ನಂತರ ಮುಂದುವರೆಯುತ್ತಿದೆ ವಾರ ಮಧ್ಯದ ಎಲಿಮಿನೇಷನ್!'' ಬಿಗ್ ಬಾಸ್ ಕನ್ನಡ ಸೀಸನ್ 11, ಸೋಮ-ಶುಕ್ರ ರಾತ್ರಿ 9:30ಕ್ಕೆ ಪ್ರಸಾರ ಎಂಬ ಕ್ಯಾಪ್ಷನ್ನಡಿ ಪ್ರೋಮೋ ಅನಾವರಣಗೊಂಡಿದೆ. ಇದರಲ್ಲಿ ಮಾಡಿದ ತಪ್ಪನ್ನು ಧನರಾಜ್ ಆಚಾರ್ ಒಪ್ಪಿಕೊಂಡಿದ್ದಾರೆ. ಜೊತೆಗೆ, ತಾನು ಮಾಡಿದ ತಪ್ಪಿಗೆ ಶಿಕ್ಷೆ ಎಂಬಂತೆ ತಮ್ಮ ಹೆಸರನ್ನೂ ಸೇರಿಸಿಕೊಂಡು ಎಲಿಮಿನೇಷನ್ ಪ್ರಕ್ರಿಯೆ ಮುಂದುವರಿಸಲು ಬಿಗ್ ಬಾಸ್ ಬಳಿ ಮನವಿ ಮಾಡಿಕೊಂಡಿದ್ದಾರೆ. ಜೊತೆಗೆ, ಕಣ್ಣೀರಿಟ್ಟಿದ್ದಾರೆ. ನಡೆದಿರೋ ಮೋಸಕ್ಕೆ ಶಿಕ್ಷೆ ಎಂಬಂತೆ ಎಲಿಮಿನೇಟ್ ಆಗುತ್ತಾರಾ? ಅನ್ನೋ ಪ್ರಶ್ನೆ ಎದ್ದಿದೆ. ಎಲ್ಲದಕ್ಕೂ ಇಂದಿನ ಸಂಚಿಕೆಯಲ್ಲಿ ಸ್ಪಷ್ಟನೆ ಸಿಗಲಿದೆ.
ಇದನ್ನೂ ಓದಿ: 2025ರ ಬಹುನಿರೀಕ್ಷಿತ ಸಿನಿಮಾ: ಸಲ್ಮಾನ್ ಸಿಕಂದರ್ or ಯಶ್ ಟಾಕ್ಸಿಕ್; ಯಾವುದು ನಂ.1?
ಮಿಡ್ ವೀಕ್ ಎಲಿಮಿನೇಷನ್ನಿಂದ ಬಚಾವ್ ಆಗಲು ಟಾಸ್ಕ್ಗಳನ್ನು ನೀಡಲಾಗಿತ್ತು. ಟಾಸ್ಕ್ನಲ್ಲಿ ಧನರಾಜ್ ವಿಜೇತರಾಗಿದ್ದರು. ಆದ್ರೆ ಪಝಲ್ ಗೇಮ್ನಲ್ಲಿ ಧನರಾಜ್ ಕನ್ನಡಿ ನೋಡಿ ಅದರ ಸಹಾಯದಿಂದ ಆಟವನ್ನು ಬೇಗ ಪೂರ್ಣಗೊಳಿಸಿದ್ದರು. ಮೋಸದಾಟವನ್ನು ಸ್ವತಃ ಬಿಗ್ ಬಾಸೇ ಎಲ್ಲಾ ಸ್ಪರ್ಧಿಗಳ ಎದುರು ಬಹಿರಂಗಪಡಿಸಿದ್ದಾರೆ.
ಇದನ್ನೂ ಓದಿ: ನಾನು ತುಳುನಾಡಿನವ, ತುಳು ಸಿನಿಮಾ ಮಾಡುತ್ತಿರುವುದು ಹೆಮ್ಮೆಯ ಕ್ಷಣ: ಜೈ ಶೂಟಿಂಗ್ ಆರಂಭಿಸಿದ ಸುನೀಲ್ ಶೆಟ್ಟಿ
ಪ್ರೋಮೋದಲ್ಲಿ, ನಿನ್ನೆ ತಡರಾತ್ರಿ ಮನೆಯ ಮುಖ್ಯದ್ವಾರವನ್ನು ತೆರೆದು ಹೊರಕಳುಹಿಸದೇ ತಡೆಹಿಡಿಯಲು ಕಾರಣ ಏನೆಂಬುದನ್ನು ಬಿಗ್ ಬಾಸ್ ವಿಡಿಯೋ ಸಮೇತ ಸ್ಪರ್ಧಿಗಳೆದುರು ಇಟ್ಟಿದ್ದಾರೆ. ವಿಡಿಯೋದಲ್ಲಿ ಧನರಾಜ್ ಅವರ ಆಟ ಮತ್ತು ತಮ್ಮ ತಂಡದ ಬಳಿ ಮಾತನಾಡಿದ್ದನ್ನು ಈ ದೃಶ್ಯದಲ್ಲಿ ಕಾಣಬಹುದು. ಶಾಕ್ ಆದ ಧನರಾಜ್, ನನ್ನಿಂದ ಇಷ್ಟು ದೊಡ್ಡ ತಪ್ಪಾಗಿದೆ ಎಂಬುದು ನನಗೆ ಗೊತ್ತಿರಲಿಲ್ಲ ಬಿಗ್ ಬಾಸ್. ಗೆಲುವು ನನ್ನದಲ್ಲ ಅಂತಾ ಅನಿಸ್ತಿದೆ. ನನ್ನನ್ನು ನಾಮಿನೇಟ್ ಮಾಡ್ಕೊಂಡೇ ಪ್ರಕ್ರಿಯೆ ಶುರು ಮಾಡಿ ಬಿಗ್ ಬಾಸ್ ಎಂದು ಮನವಿ ಮಾಡಿದ್ದಾರೆ. ಬಿಗ್ ಬಾಸ್ ಮಾತನಾಡಿ, ಮುಖ್ಯದ್ವಾರದ ಮೂಲಕ ಹೊರ ಹೋಗುತ್ತಿರುವುದು...... ಎಂದು ತಿಳಿಸಿದ್ದಾರೆ. ಪ್ರೋಮೋ ಕೊನೆಗೆ ಧನರಾಜ್ ಅವರನ್ನು ತೋರಿಸಲಾಗಿದ್ದು, ಯಾರು ಹೊರ ನಡೆಯಲಿದ್ದಾರೆ ಎಂಬುದು ಇಂದು ರಾತ್ರಿ ಪ್ರಸಾರ ಕಾಣಲಿರುವ ಸಂಚಿಕೆಯಲ್ಲಿ ತಿಳಿಯಲಿದೆ.
