'ವಂಗಾಗೆ ನನ್ನ ಒಂದೇ ಒಂದು ತಪ್ಪು ಕಂಡುಹಿಡಿಯಲು ಆಗಲಿಲ್ಲ': ಜಾವೇದ್ ಅಖ್ತರ್ ವ್ಯಂಗ್ಯ

ಅನಿಮಲ್​ ಸಿನಿಮಾ ಬಗ್ಗೆ ಜಾವೇದ್ ಅಖ್ತರ್ ಹಾಗೂ ಚಿತ್ರದ ನಿರ್ದೇಶಕ ಸಂದೀಪ್ ರೆಡ್ಡಿ ವಂಗಾ ನಡುವಿನ ವಾಗ್ವಾದ ಮುಂದುವರಿದಿದೆ.

ಹಿರಿಯ ಗೀತರಚನೆಕಾರ, ಖ್ಯಾತ ಚಿತ್ರಕಥೆಗಾರ ಜಾವೇದ್ ಅಖ್ತರ್ ಇತ್ತೀಚೆಗೆ ಸಂದೀಪ್ ರೆಡ್ಡಿ ವಂಗಾ ಅವರ ಅನಿಮಲ್ ಸಿನಿಮಾ ಬಗ್ಗೆ ಮಾತನಾಡಿದ್ದರು. ತಮ್ಮ ಟೀಕೆಗಳಿಗೆ ಕಾಮೆಂಟ್​ ಮಾಡಿರುವ ವಂಗಾ ಅವರನ್ನುದ್ದೇಶಿಸಿ ಇದೀಗ ಹಿರಿಯ ಗೀತರಚನೆಕಾರ ಮಾತನಾಡಿದ್ದಾರೆ. ಸಂದೀಪ್ ಅವರನ್ನು ಟೀಕಿಸುತ್ತಿಲ್ಲ, ಆದರೆ ಪ್ರೇಕ್ಷಕರು ಅಂಥ ಚಿತ್ರಗಳಿಗೆ ಹೇಗೆ ಒಲವು ತೋರುತ್ತಿದ್ದಾರೆ ಎಂಬುದರ ಬಗ್ಗೆ ಕಾಳಜಿ ವಹಿಸಿದ್ದಾಗಿ ಅಖ್ತರ್ ಸ್ಪಷ್ಟಪಡಿಸಿದ್ದಾರೆ. ಅಭಿವ್ಯಕ್ತಿ ಸ್ವಾತಂತ್ರ್ಯದಲ್ಲಿ ನಂಬಿಕೆ ಇರಿಸಿರುವುದಾಗಿ ವಿವರಿಸಿದ ಅಖ್ತರ್, ಲಕ್ಷಾಂತರ ವೀಕ್ಷಕರ ಮೇಲೆ ಸಿನಿಮಾ ಪರಿಣಾಮ ಬೀರುವ ಬಗ್ಗೆ ಚಿಂತಿಸುತ್ತಿರುವುದಾಗಿ ತಿಳಿಸಿದರು.

ಇತ್ತೀಚಿನ ಸಂದರ್ಶನವೊಂದರಲ್ಲಿ, ಜಾವೇದ್ ಅಖ್ತರ್ ಅವರಲ್ಲಿ ಅನಿಮಲ್​ ಸಿನಿಮಾ ಬಗ್ಗೆ ಮತ್ತು ಅವರ ಈ ಹಿಂದಿನ ಟೀಕೆಗೆ ನಿರ್ದೇಶಕ ಸಂದೀಪ್ ಅವರ ಪ್ರತಿಕ್ರಿಯೆ ಕೇಳಲಾಯಿತು. ಈ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಅಖ್ತರ್, "ನಾನು ನಿರ್ದೇಶಕರನ್ನು ಟೀಕಿಸಲಿಲ್ಲ. ಪ್ರಜಾಪ್ರಭುತ್ವ ಸಮಾಜದಲ್ಲಿ ಅವರಿಗೆ ಒಂದು 'ಅನಿಮಲ್'​ (ಸಿನಿಮಾ), ಅನೇಕ ಅನಿಮಲ್​ಗಳನ್ನು ಮಾಡುವ ಹಕ್ಕಿದೆ ಎಂದು ನಾನು ಭಾವಿಸುತ್ತೇನೆ" ಎಂದು ಸ್ಪಷ್ಟಪಡಿಸಿದ್ದಾರೆ. "ನನಗೆ ಪ್ರೇಕ್ಷಕರ ಬಗ್ಗೆ ಕಾಳಜಿ ಇತ್ತೇ ಹೊರತು ನಿರ್ದೇಶಕರನ್ನು ಟೀಕಿಸಲಿಲ್ಲ" ಎಂದು ಹೇಳಿದರು. ವಿವಾದಾತ್ಮಕ ಪಾತ್ರಗಳ ಚಿತ್ರಣಕ್ಕೆ ಸಂಬಂಧಿಸಿದಂತೆ, ''ಯಾವುದೇ ಸಿನಿಮಾ ಮಾಡುವ ಹಕ್ಕು ಅವರಿಗಿದೆ'' ಎಂದರು. ಸಂದರ್ಶನದಲ್ಲಿ ಜಾವೇದ್ ಅಖ್ತರ್, ಸಿನಿಮಾಗಳು ವೀಕ್ಷಕರ ಮೇಲೆ ಬೀರುವ ಪರಿಣಾಮದ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ. "ನನ್ನ ಕಾಳಜಿ ಆ ಸಿನಿಮಾವನ್ನು ಎಂಜಾಯ್​ ಮಾಡಿದ ಕೋಟಿಗಟ್ಟಲೆ ಜನರ ಮೇಲಿದೆ" ಎಂದು ಸ್ಪಷ್ಟಪಡಿಸಿದ್ದಾರೆ.

ಇದನ್ನೂ ಓದಿ: ಅಪ್ಪು ನಿರ್ವಹಿಸಿದ ಪಾತ್ರಗಳೆಲ್ಲವೂ ವಿಭಿನ್ನ: ತೆರೆ ಮೇಲೆ ನಕ್ಷತ್ರದಂತೆ ಮಿಂಚಿ ಮರೆಯಾದ ನಟ

"ಅವರು ನನ್ನ ಟೀಕೆಗಳಿಗೆ ಪ್ರತಿಕ್ರಿಯಿಸಿದಾಗ ನನಗೆ ಗೌರವ ಸಿಕ್ಕ ಅನುಭವವಾಯಿತು. ನನ್ನ ವೃತ್ತಿಜೀವನದ 53 ವರ್ಷಗಳಲ್ಲಿ ಅವರಿಗೆ ನನ್ನ ಒಂದು ಚಿತ್ರ, ಒಂದು ಚಿತ್ರಕಥೆ, ಒಂದು ದೃಶ್ಯ, ಒಂದು ಸಂಭಾಷಣೆ, ಒಂದು ಹಾಡು ಸಿಗಲಿಲ್ಲ. ಹಾಗಾಗಿ ನನ್ನ ಮಗನ ಕಚೇರಿಗೆ ಹೋಗಿ ಕಂಟೆಂಟ್​ ಹುಡುಕಬೇಕಾಯಿತು. ಫರ್ಹಾನ್ ನಟಿಸದ, ನಿರ್ದೇಶಿಸದ ಅಥವಾ ಬರೆಯದ ಟಿವಿ ಸೀರಿಯಲ್​ಗಳನ್ನು ಹುಡುಕಿದರು. ಮಗನ ಕಂಪನಿ ಅದನ್ನು ನಿರ್ಮಿಸಿತ್ತು" ಎಂಬುದನ್ನು ಒತ್ತಿ ಹೇಳಿದರು. ತಮ್ಮ ಸುದೀರ್ಘ ವೃತ್ತಿಜೀವನದಲ್ಲಿ ಯಾವುದೇ ದೋಷವನ್ನು ಕಂಡುಹಿಡಿಯಲು ಸಾಧ್ಯವಾಗಲಿಲ್ಲ. ಎಂತಹ ಅವಮಾನ" ಎಂದು ಜಾವೇದ್​ ಅಖ್ತರ್ ತಿಳಿಸಿದ್ದಾರೆ.

ಇದನ್ನೂ ಓದಿ: ಕನ್ನಡಿಗರ 'ಪರಮಾತ್ಮ'ನ ಜನ್ಮದಿನ: ಅಭಿಮಾನಿಗಳ ಮನದಲ್ಲಿ ಅಚ್ಚಳಿಯದೇ ಉಳಿದ ಅಪ್ಪು

ಅನಿಮಲ್‌ ಚಿತ್ರದಲ್ಲಿ ಶೂ ನೆಕ್ಕುವ ದೃಶ್ಯದ ವಿವಾದದ ಬಗ್ಗೆ ಜಾವೇದ್ ಅಖ್ತರ್ ಈ ಹಿಂದೆ ಹೇಳಿಕೆ ನೀಡಿದ್ದರು. ''ಇದು ಯುವ ನಿರ್ದೇಶಕರಿಗೆ ಪರೀಕ್ಷಾ ಸಮಯ. ಎಲ್ಲರೂ ಶ್ಲಾಘಿಸುವಂತಹ ಪಾತ್ರಗಳನ್ನು ರಚಿಸಬೇಕಿದೆ'' ಎಂಬರ್ಥದಲ್ಲಿ ಹೇಳಿಕೆಗಳನ್ನು ನೀಡಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ್ದ ವಂಗಾ, "ಮಿರ್ಜಾಪುರ ಶೋ ನಿರ್ಮಿಸುವಾಗ ಇದೇ ವಿಷಯವನ್ನು ಫರ್ಹಾನ್ ಅಖ್ತರ್‌ಗೆ ಏಕೆ ಹೇಳಲಿಲ್ಲ?" ಎಂದು ಕೇಳಿದ್ದರು. ಈ ಸರಣಿಯು ನಿಂದನೆಗಳಿಂದ ಕೂಡಿತ್ತು. ನಾನು ಇಡೀ ಕಾರ್ಯಕ್ರಮವನ್ನು ವೀಕ್ಷಿಸಿಲ್ಲ ಎಂಬುದಾಗಿಯೂ ವಂಗಾ ತಿಳಿಸಿದ್ದರು.

ಮಿರ್ಜಾಪುರ ಶೋ ನಿರ್ಮಾಪಕರ ಪೈಕಿ ಜಾವೇದ್​ ಅಖ್ತರ್ ಪುತ್ರ ಫರ್ಹಾನ್​ ಅಖ್ತರ್ ಕೂಡ ಸೇರಿದ್ದಾರೆ ಎಂಬುದು ಇಲ್ಲಿ ಗಮನಿಸಬೇಕಾದ ಸಂಗತಿ.