ಬೋನಿ ಕಪೂರ್ ನಿರ್ಮಾಣದ ಮುಂದಿನ ಚಿತ್ರ ಮೈದಾನ್. ಬಿಡುಗಡೆಗೆ ಸಜ್ಜಾಗಿರೋ ಈ ಸಿನಿಮಾದ ಅಧಿಕೃತ ಫೈನಲ್ ಟ್ರೇಲರ್ ಇಂದು ಅನಾವರಣಗೊಂಡಿತು. ಈ ಮೂಲಕ ಸಿನಿಮಾದ ಪ್ರಚಾರವೂ ಪ್ರಾರಂಭವಾಗಿದೆ.
ಸಂದರ್ಶನವೊಂದರಲ್ಲಿ ಬೋನಿ ಕಪೂರ್, ಪುತ್ರ ಅರ್ಜುನ್ ಕಪೂರ್ ಮತ್ತು ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ನಡುವಿನ ಬಿರುಕಿನ ಬಗ್ಗೆ ಮಾತನಾಡಿದ್ದಾರೆ. ಸಲ್ಮಾನ್ ಮತ್ತು ಅರ್ಜುನ್ ನಡುವಿನ ಮೌನದಿಂದಾಗಿ ಸೂಪರ್ ಸ್ಟಾರ್ ಸಲ್ಲು ಜತೆಗಿನ ತಮ್ಮ ಬಾಂಧವ್ಯದಲ್ಲಿ ಯಾವುದೇ ಬದಲಾವಣೆ ಆಗಿಲ್ಲ ಎಂದು ಬೋನಿ ಬಹಿರಂಗಪಡಿಸಿದರು. ಹಲವು ವರ್ಷಗಳಿಂದ ವಿವಿಧ ವಿಚಾರವಾಗಿ ಸಲ್ಮಾನ್ ಮತ್ತು ಅರ್ಜುನ್ ನಡುವೆ ಮನಸ್ತಾಪಗಳಿರುವುದು ನಿಮಗೆ ತಿಳಿದಿರುವ ವಿಚಾರವೇ.
ಡಿಜಿಟಲ್ ಪ್ಲಾಟ್‌ಫಾರ್ಮ್‌ ಒಂದಕ್ಕೆ ನೀಡಿದ ಸಂದರ್ಶನವೊಂದರಲ್ಲಿ, ಅರ್ಜುನ್ ಮತ್ತು ಸಲ್ಮಾನ್ ನಡುವಿನ ಬಿರುಕನ್ನು ಬೋನಿ ಕಪೂರ್ ಖಚಿತಪಡಿಸಿದ್ದಾರೆ. ಮನಸ್ತಾಪಗಳ ಹೊರತಾಗಿಯೂ, ಸಲ್ಮಾನ್ ಜತೆಗಿನ ತಮ್ಮ ಬಾಂಧವ್ಯ ಹಾಗೇ ಉಳಿದಿದೆ ಎಂಬುದನ್ನೂ ಸ್ಪಷ್ಟಪಡಿಸಿದ್ದಾರೆ. ಅಲ್ಲದೇ ಅರ್ಜುನ್‌ನ ವೃತ್ತಿಜೀವನದ ಮೇಲೂ ಸಲ್ಮಾನ್ ಉತ್ತಮ ಪ್ರಭಾವ ಬೀರಿದ್ದಾರೆಂಬುದನ್ನು ಖಚಿತಪಡಿಸಿದರು. ಮಗನ ನಟನಾ ಪ್ರಯಾಣ ರೂಪಿಸುವಲ್ಲಿ ಸಲ್ಮಾನ್ ಅವರ ಪ್ರಮುಖ ಪಾತ್ರವನ್ನು ಈ ಸಂದರ್ಶನದಲ್ಲಿ ಬೋನಿ ನೆನಪಿಸಿಕೊಂಡರು.
ಹಿಂದಿನ ದಿನಗಳನ್ನು ನೆನಪಿಸಿಕೊಂಡ ನಿರ್ಮಾಪಕ, "ನಾನು ಮೋನಾ (ಮೊದಲ ಪತ್ನಿ)ರಿಂದ ಬೇರ್ಪಟ್ಟ ನಂತರ ಮಗ ಅರ್ಜುನ್ ನಟನೆಯನ್ನು ಮುಂದುವರಿಸುತ್ತಾನೆ ಎಂದು ಯೋಚಿಸಿರಲಿಲ್ಲ. ಆ ಸಂದರ್ಭ ಸಲ್ಮಾನ್ ನನಗೆ ಭರವಸೆ ನೀಡಿದರು. ಅರ್ಜುನ್ ನಟನಾಗಬೇಕೆಂದು ಬಯಸಿದ್ದಾನೆಂಬುದು ನನ್ನ ತಲೆಯಲ್ಲಿರಲಿಲ್ಲ. ಆದ್ರೆ ಸಲ್ಮಾನ್ ಈ ವಿಚಾರವನ್ನು ನನ್ನ ಅರಿವಿಗೆ ತಂದರು. ಬೋನಿ ಸರ್, ಅರ್ಜುನ್ ನಟರಾಗುತ್ತಾರೆ. ಅವರಲ್ಲಿ ಆ ಕಲೆ ಇದೆ. ತಮ್ಮನ್ನು ನಟನಾಗಿ ರೂಪಿಸಿಕೊಳ್ಳಲಿದ್ದಾರೆ'' ಎಂದು ತಿಳಿಸಿದರು.
