ನವದೆಹಲಿ: ಭಾರತೀಯ ರೈಲ್ವೆ ಕ್ಯಾಟರಿಂಗ್ ಮತ್ತು ಪ್ರವಾಸೋದ್ಯಮ ನಿಗಮ (ಐಆರ್ಸಿಟಿಸಿ)ದ ವೆಬ್ ಸೈಟ್ ಮತ್ತು ಮೊಬೈಲ್ ಅಪ್ಲಿಕೇಶನ್ ಗುರುವಾರ ಸ್ಥಗಿತಗೊಂಡಿದ್ದು, ರೈಲು ಟಿಕೆಟ್ ಖರೀದಿಸಲು ಗ್ರಾಹಕರು ಪರದಾಡುವಂತಾಗಿದೆ. ಐಆರ್ಸಿಟಿಸಿಯ ಮೊಬೈಲ್ ಅಪ್ಲಿಕೇಶನ್ ಈ ತಿಂಗಳಲ್ಲಿ ಎರಡನೇ ಬಾರಿಗೆ ಡೌನ್ ಆಗಿದೆ.
ಮೊಬೈಲ್ ಅಪ್ಲಿಕೇಶನ್ ಮತ್ತು ವೆಬ್ ಸೈಟ್ ಡೌನ್ ಆಗಿದ್ದರಿಂದ ತತ್ಕಾಲ್ ಟಿಕೆಟ್ಗಳ ರಿಸರ್ವೇಶನ್ಗೆ ಅಡ್ಡಿಯುಂಟಾಗಿತ್ತು. ಗ್ರಾಹಕರು ಟಿಕೆಟ್ ಬುಕ್ ಮಾಡಲು ವೆಬ್ ಸೈಟ್ಗೆ ಲಾಗ್ ಇನ್ ಮಾಡಿದ ತಕ್ಷಣ, "ಮೇಂಟೆನನ್ಸ್ ನಡೆಯುತ್ತಿರುವುದರಿಂದ ಪ್ರಕ್ರಿಯೆ ಮುಂದುವರಿಸಲು ಸಾಧ್ಯವಾಗುತ್ತಿಲ್ಲ" ಎಂಬ ಸಂದೇಶ ಕಾಣಿಸುತ್ತಿದೆ.
ಐಆರ್ಸಿಟಿಸಿ ಅಪ್ಲಿಕೇಶನ್ ಮತ್ತು ವೆಬ್ಸೈಟ್ ಡೌನ್ ಆಗಿರುವ ಬಗ್ಗೆ ಹಲವಾರು ಬಳಕೆದಾರರು ಸಾಮಾಜಿಕ ಮಾಧ್ಯಮದಲ್ಲಿ ಬರೆದಿದ್ದಾರೆ. "ಬುಕಿಂಗ್ ಆರಂಭವಾದ ಕ್ಷಣದಲ್ಲೇ ಸರ್ವರ್ಗಳು ಕ್ರ್ಯಾಶ್ ಆಗುತ್ತವೆ. ಇದು ನಾನು ನೋಡಿದ ಅತ್ಯಂತ ಕೆಟ್ಟ ವೆಬ್ ಸೈಟ್ ಆಗಿದೆ. ಪದೇ ಪದೆ ದೂರು ನೀಡಿದರೂ ಇದನ್ನು ಏಕೆ ಸರಿಪಡಿಸುತ್ತಿಲ್ಲ?" ಎಂದು ಸಾಮಾಜಿಕ ಮಾಧ್ಯಮ ಎಕ್ಸ್ನಲ್ಲಿ ಬಳಕೆದಾರರೊಬ್ಬರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ವೆಬ್ಸೈಟ್ನ ಸ್ಕ್ರೀನ್ ಶಾಟ್ ಅನ್ನು ಸಹ ಅವರು ಪೋಸ್ಟ್ ಮಾಡಿದ್ದಾರೆ.
"ಬೆಳಿಗ್ಗೆ 10:11 ಗಂಟೆ ಆಗಿದೆ. ಇನ್ನೂ ಐಆರ್ಸಿಟಿಸಿ ಬುಕಿಂಗ್ ಓಪನ್ ಆಗುತ್ತಿಲ್ಲ. ಐಆರ್ಸಿಟಿಸಿಯ ಬಗ್ಗೆ ತನಿಖೆ ನಡೆಯಬೇಕಿದೆ. ಇಲ್ಲೇನೋ ಹಗರಣ ನಡೆಯುತ್ತಿದೆ. ಬುಕಿಂಗ್ ಓಪನ್ ಆಗುವ ಹೊತ್ತಿಗೆ ಎಲ್ಲಾ ಟಿಕೆಟ್ ಮುಗಿದು ಹೋಗಿರುತ್ತವೆ" ಎಂದು ಮತ್ತೊಬ್ಬ ಬಳಕೆದಾರರು ಪೋಸ್ಟ್ ಮಾಡಿದ್ದಾರೆ.
ಐಆರ್ಸಿಟಿಸಿ ವೆಬ್ ಸೈಟ್ ಮತ್ತು ಮೊಬೈಲ್ ಅಪ್ಲಿಕೇಶನ್ ಸುಮಾರು ಒಂದೂವರೆ ಗಂಟೆಗಳ ಕಾಲ ಸ್ಥಗಿತಗೊಂಡ ನಂತರ ಈಗ ಮತ್ತೆ ಎಂದಿನಂತೆ ಕಾರ್ಯನಿರ್ವಹಿಸುತ್ತಿವೆ. ಎಲ್ಲಾ ಸೇವೆಗಳನ್ನು ಸಂಪೂರ್ಣವಾಗಿ ಪುನಃಸ್ಥಾಪಿಸಲಾಗಿದೆ.
ಇದನ್ನೂ ಓದಿ : ಬ್ಯೂಟಿಫುಲ್ ಕೋಳಿಗಳ ಸಾಕಾಣಿಕೆ ಗೊತ್ತೇ? ಇವುಗಳ ಬೆಲೆ ಕೇಳಿದರೆ ದಂಗಾಗುವಿರಿ! - CHICKENS WORTH LAKHS
