ನವದೆಹಲಿ: ಸಗಟು ಬೆಲೆ ಸೂಚ್ಯಂಕ (ಡಬ್ಲ್ಯುಪಿಐ) ಆಧರಿಸಿದ ಭಾರತದ ಹಣದುಬ್ಬರ ದರವು ಫೆಬ್ರವರಿಯಲ್ಲಿ ಶೇಕಡಾ 0.2 ಕ್ಕೆ ಇಳಿದಿದೆ ಎಂದು ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯ ಗುರುವಾರ ಬಿಡುಗಡೆ ಮಾಡಿದ ಅಂಕಿ ಅಂಶಗಳು ತಿಳಿಸಿವೆ. ಡಿಸೆಂಬರ್ನಲ್ಲಿ ಶೇಕಡಾ 0.73 ರಷ್ಟಿದ್ದ ಡಬ್ಲ್ಯುಪಿಐ ಹಣದುಬ್ಬರದ ವಾರ್ಷಿಕ ದರದಲ್ಲಿ ಇದು ಸತತ ಮೂರನೇ ತಿಂಗಳು ಕುಸಿತವಾಗಿದೆ.
ಅಧಿಕೃತ ಅಂಕಿ ಅಂಶಗಳ ಪ್ರಕಾರ, ಫೆಬ್ರವರಿಯಲ್ಲಿ ಇಂಧನ ಮತ್ತು ವಿದ್ಯುತ್ ವಲಯದ ಇಂಧನ ಬೆಲೆಯಲ್ಲಿ ಕುಸಿತ ಕಂಡುಬಂದಿದ್ದು, ಹಣದುಬ್ಬರ ದರವು (-) 1.59 ಪರ್ಸೆಂಟ್ ದರದಲ್ಲಿದೆ. ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯಲ್ಲಿ ಇಳಿಕೆಯಾಗಿರುವುದು ಇದಕ್ಕೆ ಕಾರಣವಾಗಿದೆ. ಅಂತೆಯೇ, ತಯಾರಿಸಿದ ಉತ್ಪನ್ನಗಳ ಬೆಲೆಗಳಲ್ಲಿ ಕೂಡ ಕುಸಿತ ಕಂಡು ಬಂದಿದೆ. ತಯಾರಿಸಿದ ಉತ್ಪನ್ನಗಳ ಹಣದುಬ್ಬರ ದರವು (-) 1.27 ರಷ್ಟಿದೆ.
ಜವಳಿ, ರಾಸಾಯನಿಕ ಮತ್ತು ಕಾಗದದ ಉತ್ಪನ್ನಗಳು ಮತ್ತು ಸಂಸ್ಕರಿಸಿದ ಆಹಾರಗಳ ಬೆಲೆಯಲ್ಲಿ ಈ ತಿಂಗಳಲ್ಲಿ ಕುಸಿತ ಕಂಡುಬಂದಿದೆ. ಆದಾಗ್ಯೂ, ಆಹಾರ ಸರಕುಗಳ ವಿಭಾಗದಲ್ಲಿ ಡಬ್ಲ್ಯುಪಿಐ ಬೆಲೆಗಳಲ್ಲಿ ಶೇಕಡಾ 4 ರಷ್ಟು ಹೆಚ್ಚಳ ಕಂಡುಬಂದಿದೆ. ಫೆಬ್ರವರಿಯಲ್ಲಿ ಹಣದುಬ್ಬರದಲ್ಲಿ ಹೆಚ್ಚಳ ದಾಖಲಿಸಿದ ಇತರ ಸರಕುಗಳಲ್ಲಿ ನೈಸರ್ಗಿಕ ಅನಿಲ, ವಿದ್ಯುತ್, ಯಂತ್ರೋಪಕರಣಗಳು ಮತ್ತು ಉಪಕರಣಗಳು ಮತ್ತು ಮೋಟಾರು ವಾಹನಗಳು, ಟ್ರೈಲರ್ ಗಳು ಮತ್ತು ಸೆಮಿ-ಟ್ರೈಲರ್ ಗಳು ಇತ್ಯಾದಿ ಸೇರಿವೆ.
ಆಹಾರ ಪದಾರ್ಥಗಳ ಹಣದುಬ್ಬರವು ಜನವರಿಯಲ್ಲಿ ಶೇ 19.71ರಷ್ಟಿದ್ದು, ಶೇ 19.78ಕ್ಕೆ ಏರಿಕೆಯಾಗಿದೆ. ಗೋಧಿ ಹಣದುಬ್ಬರ ಶೇ 2.34ರಷ್ಟಿದ್ದರೆ, ಬೇಳೆಕಾಳುಗಳ ಹಣದುಬ್ಬರ ಶೇ 18.48ರಷ್ಟಿದೆ. ಹಾಲಿನ ಹಣದುಬ್ಬರ ಶೇ 5.46ರಷ್ಟಿದ್ದರೆ, ಮೊಟ್ಟೆ, ಮಾಂಸ ಮತ್ತು ಮೀನಿನ ಹಣದುಬ್ಬರ ಶೇ 0.47ರಷ್ಟಿದೆ.
ಆಹಾರೇತರ ವಸ್ತುಗಳ ಪೈಕಿ, ಕಚ್ಚಾ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲದ ಸಗಟು ಹಣದುಬ್ಬರವು ಶೇಕಡಾ 8.24 ರಷ್ಟಿದ್ದರೆ, ಕಚ್ಚಾ ಪೆಟ್ರೋಲಿಯಂ ಹಣದುಬ್ಬರ ಶೇಕಡಾ 16.65 ರಷ್ಟಿದೆ. ಈ ವಾರದ ಆರಂಭದಲ್ಲಿ, ಗ್ರಾಹಕ ಬೆಲೆ ಸೂಚ್ಯಂಕ (ಸಿಪಿಐ) ಆಧರಿಸಿದ ಭಾರತದ ಚಿಲ್ಲರೆ ಹಣದುಬ್ಬರವು ಫೆಬ್ರವರಿ ತಿಂಗಳಲ್ಲಿ ಶೇಕಡಾ 5.09 ರಷ್ಟಿತ್ತು.
ಸಗಟು ಬೆಲೆ ಸೂಚ್ಯಂಕ (ಡಬ್ಲ್ಯುಪಿಐ)ವು ಸಗಟು ಹಂತದಲ್ಲಿ ಸರಕುಗಳ ಬೆಲೆಯನ್ನು ಪ್ರತಿನಿಧಿಸುತ್ತದೆ. ಅಂದರೆ ಸಗಟು ಪ್ರಮಾಣದಲ್ಲಿ ಮಾರಾಟವಾಗುವ ಮತ್ತು ಗ್ರಾಹಕರ ಬದಲಿಗೆ ಸಂಸ್ಥೆಗಳ ನಡುವೆ ವ್ಯಾಪಾರವಾಗುವ ಸರಕುಗಳು ಎಂದರ್ಥ. ಡಬ್ಲ್ಯುಪಿಐ ಅನ್ನು ಕೆಲ ಆರ್ಥಿಕತೆಗಳಲ್ಲಿ ಹಣದುಬ್ಬರದ ಅಳತೆಯಾಗಿ ಬಳಸಲಾಗುತ್ತದೆ.
ಇದನ್ನೂ ಓದಿ : ತಮಿಳುನಾಡಿನಲ್ಲಿ ಟಾಟಾ ಮೋಟರ್ಸ್ 9 ಸಾವಿರ ಕೋಟಿ ರೂ. ಹೂಡಿಕೆ: 5000 ಉದ್ಯೋಗ ಸೃಷ್ಟಿ ಸಾಧ್ಯತೆ
