ನವದೆಹಲಿ: ಭಾರತದಲ್ಲಿ ಚಿನ್ನದ ಬೇಡಿಕೆಯು ಕಳೆದ ವರ್ಷ ಅಂದರೆ 2023ರಲ್ಲಿ ಶೇ 3ರಷ್ಟು ಕುಸಿತ ಕಂಡಿದೆ. ಭಾರತದಲ್ಲಿ ಈ ಹಿಂದೆಯೆಲ್ಲಾ ಚಿನ್ನದ ಬೇಡಿಕೆ ಸಾಮಾನ್ಯವಾಗಿ 800 ರಿಂದ 900 ಟನ್ಗಳ ಮಧ್ಯೆ ಇರುತ್ತಿತ್ತು. ಆದರೆ, 2023ರಲ್ಲಿ ಭಾರತ ಬಂಗಾರದ ಬೇಡಿಕೆ 747.5 ರಷ್ಟಾಗಿದೆ ಎಂದು ವರ್ಲ್ಡ್ ಗೋಲ್ಡ್ ಕೌನ್ಸಿಲ್ ತಿಳಿಸಿದೆ.
2022ರಲ್ಲಿ ಭಾರತದ ಚಿನ್ನದ ಬೇಡಿಕೆ 774.1 ಆಗಿತ್ತು ಎಂದು ವರದಿಯಲ್ಲಿ ಡಬ್ಲ್ಯೂಜಿಸಿ ತಿಳಿಸಿದೆ. ಭಾರತದಲ್ಲಿ ಗಗಮುಖಿಯಾಗುತ್ತಿರುವ ಬಂಗಾರದ ಬೆಲೆಯು ಈ ಕುಸಿತದಲ್ಲಿ ಸಾಕಷ್ಟು ಪ್ರಭಾವ ಹೊಂದಿದೆ. ಆದಾಗ್ಯೂ ಚಿನ್ನದ ಮೇಲೆ ಗ್ರಾಹಕರ ಒಲವು ಹೆಚ್ಚಿದೆ. ಅಕ್ಟೋಬರ್ ದರ ಪರಿಷ್ಕರಣೆ ಬಳಿಕ ನವರಾತ್ರಿಯಲ್ಲಿ ಗ್ರಾಹಕರ ಚಿನ್ನದ ಕೊಳ್ಳುವಿಕೆ ಹೆಚ್ಚಿದೆ. ಇದಕ್ಕೆ ದೀಪಾವಳಿ ಸೇಲ್ಸ್ ಕೂಡ ಪುಷ್ಠಿ ನೀಡಿದೆ.
ಆದಾಗ್ಯೂ ಚಿನ್ನದ ಬೆಲೆ ಡಿಸೆಂಬರ್ನಲ್ಲಿ ಕುಸಿತ ಕಂಡಿದೆ. 2022ರ ನಾಲ್ಕನೇ ತ್ರೈಮಾಸಿಕಕ್ಕೆ ಹೋಲಿಕೆ ಮಾಡಿದಾಗ 2023ರಲ್ಲಿ ಶೇ 9ರಷ್ಟು ಕುಸಿತ ಕಂಡಿದೆ ಎಂದು ಡಬ್ಲ್ಯೂಜಿಸಿ ಪ್ರಾದೇಶಿಕ ಸಿಇಒ ಸೋಮಸುಂದರಂ ಪಿಆರ್ ತಿಳಿಸಿದ್ದಾರೆ.
2023ರಲ್ಲಿ ಹಳದಿ ಲೋಹದ ಬೆಲೆಯಲ್ಲಿ ಭಾರಿ ಏರಿಕೆ ಕಂಡಿದೆ. ಕಳೆದ ಮೇನಲ್ಲಿ ದೇಶಿಯ ಮಾರುಕಟ್ಟೆಯಲ್ಲಿ ಚಿನ್ನದ ಬೆಲೆ 10 ಗ್ರಾಂಗೆ ಗರಿಷ್ಠ 61.845 ತಲುಪಿತು. ಜಾಗತಿಕ ಮಾರುಕಟ್ಟೆಯಲ್ಲಿ ಔನ್ಸ್ಗೆ 2.083 ಅಮೆರಿಕನ್ ಡಾಲರ್ ಆಗಿತ್ತು. ಈ ಬೆಲೆ ಏರಿಕೆಯ ಟ್ರೆಂಡ್ ನವೆಂಬರ್ನಲ್ಲಿ ಮತ್ತಷ್ಟು ಹೆಚ್ಚಾಗಿದ್ದು, ನವೆಂಬರ್ 16ರಂದು ಚಿನ್ನದ ಬೆಲೆ 10 ಗ್ರಾಂಗೆ 61.914 ರೂ ಇತ್ತು.
ಕಳೆದ ಅಕ್ಟೋಬರ್ನಿಂದ ಡಿಸೆಂಬರ್ವರೆಗಿನ ತ್ರೈಮಾಸಿಕದಲ್ಲಿ ಚಿನ್ನದ ಬೇಡಿಕೆ ಶೇ 4ರಷ್ಟು ಕುಸಿದಿದೆ. ಆಭರಣದ ಬೇಡಿಕೆ ಕಡಿಮೆಯಾಗಿದ್ದರೂ ಹೂಡಿಕೆ ಉದ್ದೇಶದಿಂದ ಚಿನ್ನದ ನಾಣ್ಯ ಮತ್ತು ಬಾರ್ಗಳ ಮಾರಾಟ ಹೆಚ್ಚಿದೆ. ಈ ವರ್ಷ ಅಂದರೆ 2024ರಲ್ಲಿ ಪ್ರಸ್ತುತ ಸಕಾರಾತ್ಮಕ ಆರ್ಥಿಕ ಪರಿಸ್ಥಿತಿಯು ಚಿನ್ನದ ಬೇಡಿಕೆಗೆ ಪ್ರಯೋಜನ ನೀಡಬಹುದು. ಚಿನ್ನದ ಬೆಲೆಯು ಕಳೆದ ವರ್ಷದಂತೆ ಏರಿಕೆ ಹಾದಿ ಮುಂದುವರೆಸದೇ ಹೋದಲ್ಲಿ ಬೇಡಿಕೆ 800 ರಿಂದ 900 ಟನ್ ಆಗಬಹುದು ಎಂಬ ಲೆಕ್ಕಾಚಾರವನ್ನು ಹಾಕಲಾಗಿದೆ.
2019 ರಿಂದ ಚಿನ್ನದ ಬೇಡಿಕೆ ದರ 700 ರಿಂದ 800 ಟನ್ ನಡುವೆ ನಿಂತಿರಲು ಕಾರಣ ನಿರಂತರ ಬೆಲೆ ಏರಿಕೆ, ಆಮದು ಸುಂಕ ಏರಿಕೆ ಮತ್ತು ಷೇರು ಮಾರುಕಟ್ಟೆಯಾಗಿದೆ. ಭಾರತಕ್ಕೆ ಸ್ವಿಜರ್ಲೆಂಡ್ ಮತ್ತು ಯುನೈಡೆಟ್ ಅರಬ್ ಎಮಿರೇಟ್ಸ್ ಹೆಚ್ಚು ಬಂಗಾರ ಪೂರೈಸುವ ದೇಶಗಳಾಗಿದೆ.
ವರದಿಯಲ್ಲಿ ಗಮನಿಸಿದಂತೆ ಜಾಗತಿಕ ಆಭರಣ ಮಾರುಕಟ್ಟೆಯು ದಾಖಲೆಯ ಬೆಲೆ ಏರಿಕೆ ನಡುವೆ ಗಮನಾರ್ಹವಾಗಿ ಸ್ಥಿತಿಸ್ಥಾಪಕವಾಗಿದೆ. ಏಕೆಂದರೆ, ವರ್ಷದಿಂದ ವರ್ಷಕ್ಕೆ ಬೇಡಿಕೆ 3 ಟನ್ಗಳಷ್ಟು ಹೆಚ್ಚಿದೆ ಇದರಲ್ಲಿ ಚೀನಾವೂ ಪ್ರಮುಖ ಪಾತ್ರವನ್ನು ಹೊಂದಿದ್ದು, ಇಲ್ಲಿ ಬಂಗಾರದ ಬೇಡಿಕೆ ಶೇ 17ರಷ್ಟು ಹೆಚ್ಚಿಸಿಕೊಳ್ಳುವ ಮೂಲಕ ಭಾರತದ ಶೇ 9ರಷ್ಟು ಇಳಿಕೆಯನ್ನು ಸರಿದೂಗಿಸಿದೆ.
ಇದನ್ನೂ ಓದಿ: ಚಿನ್ನ, ಬೆಳ್ಳಿ ಆಮದು ಸುಂಕ ಶೇ 15ಕ್ಕೆ ಏರಿಕೆ
