ನವದೆಹಲಿ: ಇಡೀ ದೇಶ 78ನೇ ಸ್ವಾತಂತ್ರ್ಯವ ದಿನದ ಸಂಭ್ರಮ ಆಚರಣೆಯಲ್ಲಿದ್ದು, ಈ ಮಧ್ಯೆ ಆತಂಕದ ಸುದ್ದಿಯೊಂದು ಹೊರಬಿದ್ದಿದೆ. ಶಾಂತಿ ಕದಡುವ ಉದ್ದೇಶದಿಂದ ಅಸ್ಸೋಂ ವಿವಿಧೆಡೆ 19 ಸ್ಥಳಗಳಲ್ಲಿ ಬಾಂಬ್ ಇರಿಸಿದ್ದು, ತಾಂತ್ರಿಕ ಕಾರಣದಿಂದ ಅವು ಸ್ಫೋಟಗೊಂಡಿಲ್ಲ ಎಂದು ನಿಷೇಧಿತ ಸಂಘಟನೆಯಾಗಿರುವ ಯುನೈಟೆಡ್ ಲಿಬರೇಷನ್ ಫ್ರಂಟ್ ಅಸ್ಸೋಂ- ಇಂಡಿಪೆಂಡೆಂಟ್ (ಉಲ್ಫಾ) ಸ್ಫೋಟಕ ಹೇಳಿಕೆ ನೀಡಿದೆ.
ಈ ಸಂಬಂಧ ಹೇಳಿಕೆ ಬಿಡುಗಡೆ ಮಾಡಿರುವ ಮ್ಯಾನ್ಮಾರ್ ಮೂಲದ ಸಂಘಟನೆ, ಇದೇ ವೇಳೆ ಯಾವ ಯಾವ ಸ್ಥಳಗಳಲ್ಲಿ ಬಾಂಬ್ ಇರಿಸಲಾಗಿತ್ತು ಎಂದು ಕೂಡ ತಿಳಿಸಿದ್ದು, ಸ್ಥಳೀಯರಿಗೆ ಅದನ್ನು ನಿಷ್ಕ್ರಿಯಗೊಳಿಸುವಂತೆ ಕೋರಿದೆ. ಅದರಲ್ಲಿ 8 ಬಾಂಬ್ಗಳನ್ನು ಗುವಾಹಟಿಯಲ್ಲಿಯೇ ಇರಿಸಲಾಗಿದೆ ಎಂದು ತಿಳಿಸಿದೆ.
ಈ ಪ್ರಕಟಣೆಯಲ್ಲಿ ನಿಷೇಧಿತ ಸಂಘಟನೆಯ ಎರಡನೇ ಲೆಫ್ಟಿನೆಂಟ್ ಇಶಾನ್ ಅಸೊಂ ಸಹಿ ಇದೆ. ಯುನೈಟೆಡ್ ಲಿಬರೇಷನ್ ಫ್ರಂಟ್ ಅಸ್ಸೋಂ (ಇಂಡಿಪೆಂಡೆಟ್) ಸಂಘಟನೆ ಪರವಾಗಿ ಅಸ್ಸೋಂನ ಸ್ಥಳೀಯರಿಗೆ ನೀಡುವ ಮಾಹಿತಿ ಇದಾಗಿದೆ. ಆಗಸ್ಟ್ 15ರಂದು ಬೆಳಗ್ಗೆ 6 ರಿಂದ ಮಧ್ಯಾಹ್ನ 12ರ ವರೆಗೆ ಹಲವು ಕಡೆ ಭಯೋತ್ಪಾದಕ ದಾಳಿ ನಡೆಸಲು ನಿಗದಿಸಲಾಗಿತ್ತು. ಆದರೆ, ತಾಂತ್ರಿಕ ಕಾರಣದಿಂದ ಇದು ಸಾಧ್ಯವಾಗಿಲ್ಲ. ಈ ಹಿನ್ನೆಲೆ ಸಾರ್ವಜನಿಕರ ಹಿತದೃಷ್ಟಿಯಿಂದ ಈ ಸ್ಥಳಗಳನ್ನು ಸಾರ್ವಜನಿಕಗೊಳಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಜನರು ಬಾಂಬ್ಗಳನ್ನು ಪತ್ತೆ ಮಾಡಿ ಅವುಗಳನ್ನು ನಿಷ್ಕ್ರಿಯಗೊಳಿಸುವಂತೆ ತಿಳಿಸಿದ್ದಾರೆ. ಈ ಸ್ಥಳಗಳಲ್ಲಿ ಬಾಂಬ್ ನಿಷ್ಕ್ರಿಯಗೊಳಿಸುವಂತೆ ಸ್ಥಳದ ಮಾಹಿತಿಯನ್ನು ಹಂಚಿಕೊಳ್ಳಲಾಗಿದೆ. ಇದೇ ವೇಳೆ ಪಾನಿಟೋಲಾ ಜೊತೆಗೆ ತಿನ್ಸುಕಿಯಾದಲ್ಲಿ ಎರಡು ಸ್ಥಳಗಳು, ದಿಬ್ರುಗಢ್‌ನಲ್ಲಿ ಒಂದು ಸ್ಥಳ ಮತ್ತು ಗೋಲಾಘಾಟ್- ಸರುಪಥರ್‌ನ ಎರಡು ಕಡೆದ ಬಾಂಬ್ ಇರಿಸಲಾಗಿದ್ದ ನಿಖರವಾದ ಸ್ಥಳವನ್ನು ಕಂಡುಹಿಡಿಯಲು ಸಾಧ್ಯವಿಲ್ಲ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ಆದಾಗ್ಯೂ, ಈ ಹೇಳಿಕೆ ಎಷ್ಟು ಸತ್ಯ ಎಂಬುದು ಅಧಿಕಾರಿಗಳು ಮತ್ತು ಭದ್ರತಾ ಏಜೆನ್ಸಿ ತನಿಖೆ ನಡೆಸಬೇಕಿದೆ.
ಇದನ್ನೂ ಓದಿ: ಅವರ ತ್ಯಾಗ ಎಂದಿಗೂ ಮರೆಯಲಾಗುವುದಿಲ್ಲ": ಹುತಾತ್ಮ ಕ್ಯಾಪ್ಟನ್ ದೀಪಕ್ ಸಿಂಗ್‌ಗೆ ಸೇನೆಯಿಂದ ಗೌರವ ನಮನ
