ಬಸ್ತಿ(ಲಕ್ನೋ,ಯುಪಿ): ಅನಾರೋಗ್ಯಪೀಡಿತ ಪತಿಯನ್ನು ಆಸ್ಪತ್ರೆಗೆ ಕರೆತರುತ್ತಿದ್ದ ಮಹಿಳೆಯ ಮೇಲೆ ಚಲಿಸುತ್ತಿದ್ದ ಆಂಬ್ಯುಲೆನ್ಸ್ನಲ್ಲಿ ದುಷ್ಕರ್ಮಿಗಳು ಅತ್ಯಾಚಾರಕ್ಕೆ ಯತ್ನಿಸಿರುವ ಹೀನ ಕೃತ್ಯ ಆಗಸ್ಟ್ 29ರಂದು ಉತ್ತರ ಪ್ರದೇಶದ ಸಿದ್ಧಾರ್ಥ್ನಗರ್ ಜಿಲ್ಲೆಯ ಕಂಟೊನ್ಮೆಂಟ್ ಪ್ರದೇಶದಲ್ಲಿ ನಡೆದಿದೆ. ಈ ದುಷ್ಕೃತ್ಯಕ್ಕೂ ಮುನ್ನ ಆರೋಪಿಗಳು ಆಕ್ಸಿಜನ್ ನೆರವಿನಲ್ಲಿ ಆಂಬ್ಯುಲೆನ್ಸ್ನಲ್ಲಿದ್ದ ಮಹಿಳೆಯ ಗಂಡನನ್ನು ರಸ್ತೆಯಲ್ಲಿದ್ದ ಕಸದ ತೊಟ್ಟಿಗೆಸೆದು ಮೃಗೀಯ ವರ್ತನೆ ತೋರಿದ್ದಾರೆ. ಸಂತ್ರಸ್ತೆ ಸೆಪ್ಟೆಂಬರ್ 1ರಂದು ಪೊಲೀಸರಿಗೆ ದೂರು ನೀಡಿದ್ದಾರೆ.
ಪ್ರಕರಣದ ಸಂಪೂರ್ಣ ವಿವರ: ಸಿದ್ಧಾರ್ಥ್ನಗರ ಜಿಲ್ಲೆಯ ಬನ್ಸಿ ಕೊಟ್ವಾಲಿ ಮೂಲದ ಮಹಿಳೆಯ ಗಂಡ ಕೆಲವು ದಿನಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದರು. ಕುಟುಂಬಸ್ಥರು ಅವರನ್ನು ಬಸ್ತಿ ಮೆಡಿಕಲ್ ಕಾಲೇಜ್ಗೆ ಚಿಕಿತ್ಸೆಗೆ ಕರೆದೊಯ್ದಿದ್ದರು. ಆದರೆ, ಆರೋಗ್ಯ ತೀರಾ ಹದಗೆಟ್ಟ ಪರಿಣಾಮ ಲಕ್ನೋಗೆ ಕರೆತರಲಾಯಿತು. ಲಕ್ನೋ ಮೆಡಿಕಲ್ ಕಾಲೇಜ್ನಲ್ಲಿ ಹಾಸಿಗೆ ಕೊರತೆಯಿಂದ ಅಲ್ಲಿಂದ ಇಫೆರಿಯಾ ನ್ಯೂರೋಸೈನ್ಸ್ ಮಲ್ಟಿ ಸ್ಪೆಷಾಲಿಟಿ ಆಸ್ಪತ್ರೆಗೆ ದಾಖಲಿಸಿದ್ದರು.
ಎರಡು ದಿನದ ಚಿಕಿತ್ಸೆಗೆ ಮಹಿಳೆ ಸಾಕಷ್ಟು ಹಣ ವ್ಯಯಿಸಿದ್ದರು. ಮುಂದಿನ ಚಿಕಿತ್ಸೆಗೆ ಹಣವಿಲ್ಲದ ಕಾರಣ ಗಂಡನನ್ನು ತನ್ನೂರಿನಲ್ಲಿ ಚಿಕಿತ್ಸೆಗೆ ಕರೆತರಲು ಮಹಿಳೆ ಮುಂದಾಗಿದ್ದರು. ಈ ವೇಳೆ ಆಸ್ಪತ್ರೆಯಲ್ಲಿ ಯಾರೋ ಖಾಸಗಿ ಆಂಬ್ಯುಲೆನ್ಸ್ ಫೋನ್‌ ನಂಬರ್ ನೀಡಿದ್ದು, ಅದರಲ್ಲಿ ಕರೆತರಲು ಮಹಿಳೆ ಮುಂದಾಗಿದ್ದಾರೆ.
ರೋಗಿಯನ್ನು ರಸ್ತೆಗೆಸೆದು ಕ್ರೌರ್ಯ: ಆಗಸ್ಟ್ 29ರಂದು ಸಿದ್ದಾರ್ಥ್ ನಗರ ಜಿಲ್ಲೆಗೆ ಗಂಡನನ್ನು ಆಂಬ್ಯುಲೆನ್ಸ್ನಲ್ಲಿ ಕರೆತರುತ್ತಿದ್ದರು. ಸ್ವಲ್ಪ ದೂರ ಸಾಗಿದ ಬಳಿಕ ಆಂಬ್ಯುಲೆನ್ಸ್ ಚಾಲಕ ಮತ್ತು ಆತನ ಸಹಚರರು ಮಹಿಳೆಗೆ ಲೈಂಗಿಕ ಕಿರುಕುಳ ನೀಡಲು ಮುಂದಾಗಿದ್ದಾರೆ. ಮಹಿಳೆಗೆ ಚಾಲಕನ ಪಕ್ಕದ ಆಸನದ ಪಕ್ಕದಲ್ಲಿ ಕೂರುವಂತೆ ಪೀಡಿಸಿದ್ದಾರೆ. ಬಳಿಕ ಸಂಚರಿಸುತ್ತಿದ್ದ ಆಂಬ್ಯುಲೆನ್ಸ್‌ನಲ್ಲೇ ಅತ್ಯಾಚಾರಕ್ಕೆ ಯತ್ನಿಸಿದ್ದಾರೆ. ಮಹಿಳೆ ನಿರಂತರವಾಗಿ ಪ್ರತಿರೋಧ ತೋರಿದಾಗ, ಗಂಡನಿಗೆ ನೀಡಿದ್ದ ಆಕ್ಸಿಜನ್ ಮಾಸ್ಕ್ ತೆಗೆದು ನಿರ್ಜನ ಪ್ರದೇಶದಲ್ಲಿದ್ದ ಕಸದ ತೊಟ್ಟಿಗೆ ಬಿಸಾಕಿದ್ದಾರೆ ಎಂದು ಮಹಿಳೆ ದೂರಿನಲ್ಲಿ ವಿವರಿಸಿದ್ದಾರೆ.
ಆಕ್ಸಿಜನ್ ಮಾಸ್ಕ್ ತೆಗೆಯುತ್ತಿದ್ದಂತೆ ಗಂಡನ ಆರೋಗ್ಯ ಮತ್ತಷ್ಟು ಹದಗೆಟ್ಟಿದೆ. ತಕ್ಷಣ ಹಿಂದಿನ ಸೀಟ್‌ನಲ್ಲಿ ಕುಳಿತಿದ್ದ ಮಹಿಳೆ 112ಗೆ ಕರೆ ಮಾಡಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಪೊಲೀಸರು ಆಂಬ್ಯುಲೆನ್ಸ್ ಮೂಲಕ ಅನಾರೋಗ್ಯಪೀಡಿತ ಪತಿಯನ್ನು ಸಿಎಚ್ಸಿ ಹರ್ರಿಯಾಗೆ ದಾಖಲಿಸಿದ್ದಾರೆ. ಇದಾದ ಬಳಿಕ ಗೋರಖ್ಪುರ್ ಮೆಡಿಕಲ್ ಕಾಲೇಜ್ಗೆ ಶಿಫಾರಸು ಮಾಡಿದ್ದಾರೆ. ಆದರೆ, ಅವರು ಚಿಕಿತ್ಸೆ ಫಲಿಸದೆ ಸಾವನ್ನಪ್ಪಿದ್ದಾರೆ.
ಸೆಪ್ಟೆಂಬರ್ 1ರಂದು ಸಂತ್ರಸ್ತ ಮಹಿಳೆ ಲಕ್ನೋನ ಗಾಜಿಪುರ್ ಪೊಲೀಸ್ ಠಾಣೆಯಲ್ಲಿ ಆಂಬ್ಯುಲೆನ್ಸ್ ಚಾಲಕನ ವಿರುದ್ಧ ದೂರು ನೀಡಿದ್ದಾರೆ. ಇದೀಗ ಪೊಲೀಸರು ಘಟನೆಯ ತನಿಖೆ ನಡೆಸುತ್ತಿದ್ದಾರೆ.
ಇದನ್ನೂ ಓದಿ: ಅಮೃತ್ಸರ್ ಸರ್ಕಾರಿ ಆಸ್ಪತ್ರೆಯಲ್ಲೂ ವೈದ್ಯೆಗೆ ಲೈಂಗಿಕ ಕಿರುಕುಳ; ದೂರು ದಾಖಲು
