ಹೈದರಾಬಾದ್: ಮಾಧ್ಯಮ ಲೋಕದ ದಿಗ್ಗಜ, ಈನಾಡು ಸಮೂಹದ ಅಧ್ಯಕ್ಷ ರಾಮೋಜಿ ರಾವ್ ಅವರು ತಮ್ಮ ಜೀವಿತಾವಧಿಯಲ್ಲಿ ದೊಡ್ಡ ಮಾಧ್ಯಮ ಸಾಮ್ರಾಜ್ಯ ನಿರ್ಮಿಸಿದ್ದಾರೆ. ಸಾವಿರಾರು ಉದ್ಯೋಗಿಗಳು ರಾಮೋಜಿ ಸಮೂಹದ ಮುದ್ರಣ, ಎಲೆಕ್ಟ್ರಾನಿಕ್, ಡಿಜಿಟಲ್ ಮಾಧ್ಯಮ, ಆತಿಥ್ಯ, ಚಲನಚಿತ್ರಗಳು, ಮನರಂಜನೆ ಹಾಗೂ ಎಫ್ಎಂಸಿಜಿ ಸೇರಿದಂತೆ ವಿವಿಧ ವಲಯಗಳಲ್ಲಿ ಕೆಲಸ ಮಾಡುತ್ತಿದ್ದಾರೆ. ಅವರೆಲ್ಲರಿಗೂ ಮಾಧ್ಯಮದ ಮೊಗಲ್ ರಾಮೋಜಿ ರಾವ್ ಜವಾಬ್ದಾರಿಗಳ ಉಯಿಲು ಬರೆದಿದ್ದಾರೆ.
ರಾಮೋಜಿ ರಾವ್ ತಮ್ಮ ಸ್ವಂತ ಮಕ್ಕಳಿಗಿಂತ ಹೆಚ್ಚು ಪ್ರೀತಿಸುವ ತಮ್ಮ ಸಮೂಹ ಸಂಸ್ಥೆಗಳ ಉದ್ಯೋಗಿಗಳಿಗೆ ಅವರು ಬರೆದ ಸ್ಫೂರ್ತಿದಾಯಕ ಉಯಿಲು ಇಲ್ಲಿದೆ.
ಪ್ರತಿಯೊಬ್ಬ ಉದ್ಯೋಗಿಯೂ ಸಮರ್ಥ ಮತ್ತು ಬದ್ಧತೆಯ ಸೈನಿಕನಾಗಿ ಮುನ್ನಡೆಯಬೇಕು. ಸೃಜನಶೀಲತೆಯಿಂದ ಸವಾಲುಗಳನ್ನು ಜಯಿಸಬೇಕು. ನಾನು ಸ್ಥಾಪಿಸಿದ ಸಂಸ್ಥೆಗಳು ಶಾಶ್ವತವಾಗಿ, ದೃಢವಾಗಿ ನಿಲ್ಲಲು ನೀವೇ ಅಡಿಪಾಯ.
ನನ್ನ ಜೀವನದ ಬಾಂದಳದಲ್ಲಿ ಮೋಡಗಳು ಕವಿಯುತ್ತಿವೆ- 'ಅದು ಮಳೆ ಬರುವುದಕ್ಕೋ, ಬಿರುಗಾಳಿ ಬೀಸುವುದಕ್ಕೋ ಅಲ್ಲ. ನನ್ನ ಬದುಕಿನ ಸಂಧ್ಯಾಕಾಲಕ್ಕೆ ಹೊಸ ಬಣ್ಣ ಬಳಿಯಲು' ಎಂದು ವಿಶ್ವಕವಿ ರವೀಂದ್ರನಾಥ್ ಠಾಗೋರ್ ಹೇಳಿದ್ದಾರೆ. ದಶಕಗಳ ಕಾಲ ಸೂರ್ಯನ ಮೊದಲ ಕಿರಣಗಳ ಚೈತನ್ಯದ ಸ್ಫೂರ್ತಿಯನ್ನು ಪ್ರತಿನಿತ್ಯವೂ ನನ್ನ ಹೃದಯಾಂತರಾಳದಲ್ಲಿರಿಸಿ, ಸಪ್ತಾಶ್ವ ರಥರೂಢನ ಕಾಲದ ವೇಗದೊಂದಿಗೆ ಸೃಜನಶೀಲತೆಗೆ ಸಾಣೆ ಹಿಡಿದು, ದಶಕಗಳ ಅಂತರ ತಿಳಿಯದಂತೆಯೇ ನಿರಂತರವಾಗಿ ದಣಿವಿರದಂತೆ ಓಡಿದ ನನಗೀಗ ವಿಶ್ವಕವಿಯ ಈ ಮೇಲಿನ ಮಾತುಗಳು ನೆನಪಿಗೆ ಬರುತ್ತಿವೆ.
ನನಗೆ ವಯಸ್ಸಾದರೂ 'ಬದಲಾವಣೆಯೇ ನಿತ್ಯ, ಬದಲಾವಣೆಯೇ ಸತ್ಯ' ಎಂದು ಕೂಗುವ ನನ್ನ ಮನಸ್ಸು ಹೊಸ ಆಲೋಚನೆಗಳಿಂದ ತುಂಬಿ ತುಳುಕುತ್ತಲೇ ಇರುತ್ತದೆ. ರಾಮೋಜಿ ಗ್ರೂಪ್ ಕುಟುಂಬದ ಹಿರಿಯನಾಗಿ, ನಿಮ್ಮೆಲ್ಲರನ್ನು ಉದ್ದೇಶಿಸಿ ಈ ಪತ್ರ ಬರೆಯಲು ನನ್ನನ್ನು ಪ್ರೇರೇಪಿಸಿತು. ಇದೊಂದು ರೀತಿಯಲ್ಲಿ ಭವಿಷ್ಯದ ಪ್ರಣಾಳಿಕೆ. ರಾಮೋಜಿ ಗ್ರೂಪ್ ಆಫ್ ಕಂಪನಿಗಳ ಸಿಬ್ಬಂದಿಯಾದ ನಿಮಗೆಲ್ಲರಿಗೂ ದೊಡ್ಡ ಗುರಿಗಳ ಕೈಪಿಡಿ.
ವ್ಯಕ್ತಿಯ ಬಹುಮುಖವೇ ಶಕ್ತಿ. ಎಲ್ಲಾ ರಾಮೋಜಿ ಗ್ರೂಪ್ ಕಂಪನಿಗಳು ನನ್ನ ಆಲೋಚನೆಗಳ ಕೂಸುಗಳಾಗಿದ್ದರೂ, ಅವೆಲ್ಲವೂ ಲಕ್ಷಾಂತರ ಜನರು ಪ್ರೀತಿಸುವ ಶಕ್ತಿಯುತ ಸಂಸ್ಥೆಗಳಾಗಿ ಬೆಳೆದಿವೆ. ಆಯಾ ಸಂಸ್ಥೆಗಳ ಅಭಿವೃದ್ಧಿಯಲ್ಲಿ ನೇರ ಪಾತ್ರ ವಹಿಸಿದ, ವೃತ್ತಿಪರ ಮೌಲ್ಯಗಳಿಗೆ ಮೀಸಲಾಗಿರುವ ಮತ್ತು ಸಮಾಜದಲ್ಲಿ ಮನೆಮಾತಾಗಿರುವ ಅನೇಕ ಉದ್ಯೋಗಿಗಳು ನನಗೆ ಗೊತ್ತು. ರಾಮೋಜಿ ಗ್ರೂಪ್ ಆಫ್ ಕಂಪನಿಗಳಲ್ಲಿ ಕೆಲಸ ಮಾಡುವುದು ಎಷ್ಟು ಗೌರವವೋ, ಅಷ್ಟೇ ಗೌರವ ಸಾಟಿಯಿಲ್ಲದ ಶಿಸ್ತು, ಸಮಯಪಾಲನೆ, ಕೆಲಸದ ದಕ್ಷತೆಗಿದೆ. ಎಲ್ಲಕ್ಕಿಂತ ಮಿಗಿಲಾಗಿ ಸಂಸ್ಥೆಯೊಂದಿಗೆ ಬೇರ್ಪಡಿಸಲಾಗದಂತಹ ಸಂಬಂಧ ಹೊಂದಿರುವ ವಿಶಿಷ್ಟ ಗುಣಗಳ ಸಿಬ್ಬಂದಿಯಿಂದ ಕೂಡಿರುವುದಕ್ಕೆ ನಾನು ಹೆಮ್ಮೆಪಡುತ್ತೇನೆ.
ಕಠಿಣ ಪರಿಶ್ರಮ ವ್ಯರ್ಥವಲ್ಲ - ಇದು ನಾನು ದಶಕಗಳಿಂದ ನಿಷ್ಠೆಯಿಂದ ಪಾಲಿಸಿಕೊಂಡಿರುವ ವ್ಯಾಪಾರ ತತ್ವ!. ಆದ್ದರಿಂದ ನನ್ನ ಎಲ್ಲ ಸಂಸ್ಥೆಗಳು ಸಾರ್ವಜನಿಕ ಹಿತಾಸಕ್ತಿಯಿಂದ ಕೂಡಿವೆ. ಜೊತೆಗೆ ವ್ಯಾಪಕವಾದ ಮಾನವ ಸಂಪನ್ಮೂಲ ಬಳಕೆ ಮತ್ತು ಕೆಲಸದ ಮಾನದಂಡಗಳೊಂದಿಗೆ ಉನ್ನತ ಮೌಲ್ಯಗಳಿಗೆ ಶಿಖರವಾಗಿದೆ. ದಶಕಗಳಿಂದ ನನ್ನ ಬೆನ್ನಿಗೆ ನಿಂತು ನನ್ನ ಮಹತ್ವಾಕಾಂಕ್ಷೆಯನ್ನು ಸಾಧಿಸಲು ಸಹಾಯ ಮಾಡಿದ ಎಲ್ಲ ಸಿಬ್ಬಂದಿಗೆ ಧನ್ಯವಾದಗಳು!
ಮಾಡುವ ಯಾವುದೇ ಕೆಲಸ ಅಥವಾ ಕೈಗೆತ್ತಿಕೊಂಡ ಯೋಜನೆ ಅನನ್ಯವಾಗಿರಬೇಕು. ದ್ವಿತೀಯ ಸ್ಥಾನಕ್ಕೆ ತೃಪ್ತಿಪಡಬಾರದು ಎಂಬುದು ನನ್ನ ಜೀವನದ ನಿಲುವು. ಆ ಆಕಾಂಕ್ಷೆಯಿಂದಲೇ ಎರಡು ಕಡೆಯಿಂದ ಬದುಕಿನ ದೀವಟಿಗೆಯನ್ನು ಬೆಳಗಿಸಿ ಮಾರ್ಗದರ್ಶಿಯಿಂದ ಈಟಿವಿ ಭಾರತದವರೆಗೆ ಎಲ್ಲವನ್ನೂ ಅತ್ಯುತ್ತಮವಾಗಿಸಲಾಗಿದೆ. ನಾನು ಕಟ್ಟಿದ ಸಂಸ್ಥೆಗಳು ಮತ್ತು ವ್ಯವಸ್ಥೆಗಳು ಶಾಶ್ವತವಾಗಿ ಉಳಿಯಲಿ ಎಂಬುದು ನನ್ನ ಆಶಯ.
ಸಾವಿರಾರು ಜನರಿಗೆ ನೇರವಾಗಿ ಉದ್ಯೋಗ ಕಲ್ಪಿಸಿರುವ ಮತ್ತು ಪರೋಕ್ಷವಾಗಿ ಸಾವಿರಾರು ಜನ ತಮ್ಮ ಜೀವನೋಪಾಯ ಕಟ್ಟಿಕೊಳ್ಳಲು ಆಸರೆಯಾಗಿರುವ ರಾಮೋಜಿ ಸಮೂಹದ ಕಂಪನಿಗಳ ಭವಿಷ್ಯಕ್ಕಾಗಿ ಸಮರ್ಥ ನಿರ್ವಹಣಾ ವ್ಯವಸ್ಥೆ ಮತ್ತು ಅಡಿಪಾಯವನ್ನು ಹಾಕಿದ್ದೇನೆ. ನನ್ನ ನಂತರವೂ ನೀವೆಲ್ಲರೂ ನಿಮ್ಮ ಕಾರ್ಯಗಳಿಗೆ ಬದ್ಧರಾಗಿರಿ. ಈ ಉದಾತ್ತ ಸಂಪ್ರದಾಯಗಳು ಶಾಶ್ವತವಾಗಿ ಮುಂದುವರಿಯಲಿ ಮತ್ತು ರಾಮೋಜಿ ಸಂಸ್ಥೆಗಳ ಕೀರ್ತಿ ಹೆಚ್ಚಾಗಲಿ.
ಮಾಹಿತಿ, ವಿಜ್ಞಾನ, ಮನರಂಜನೆ, ಅಭಿವೃದ್ಧಿ- ಇವು ಯಾವುದೇ ರಾಷ್ಟ್ರದ ಭವಿಷ್ಯವನ್ನು ಉಜ್ವಲಗೊಳಿಸುವ ನಾಲ್ಕು ಪ್ರಮುಖ ಕ್ಷೇತ್ರಗಳಾಗಿವೆ. ರಾಮೋಜಿ ಗ್ರೂಪ್ ಕಂಪನಿಗಳು ಈ ನಾಲ್ಕು ಆಧಾರ ಸ್ತಂಭಗಳ ಮೇಲೆ ನಿಂತಿವೆ ಮತ್ತು ಸಾರ್ವಜನಿಕ ಸೇವೆಯಲ್ಲಿ ನಿರಂತರವಾಗಿ ನಿರತವಾಗಿವೆ. ಸಾರ್ವಜನಿಕರ ವಿಶ್ವಾಸ ಸದಾ ನಮ್ಮೊಂದಿಗಿದೆ.
ನಿರ್ಭಯ ಪತ್ರಿಕೋದ್ಯಮದಲ್ಲಿ ಈನಾಡು ವಿಜಯದ ಪಯಣ. 'ಉಷೋದಯ' ಮತ್ತು ಇತರ ಪಬ್ಲಿಕೇಶನ್‌ಗಳು ವಿಶ್ವವ್ಯಾಪಿಯಾಗಿವೆ. ರಾಜ್ಯದ ಗಡಿಗಳನ್ನು ಮೀರಿ ವಿಸ್ತರಿಸಿರುವ 'ಮಾರ್ಗದರ್ಶಿ' ಕೋಟ್ಯಂತರ ಹೂಡಿಕೆದಾರರಿಗೆ ಅಕ್ಷರಶಃ ಚಿನ್ನದಂತೆ. ದೇಶಾದ್ಯಂತ ಪ್ರಸಾರವಾಗುತ್ತಿರುವ 'ಈಟಿವಿ' ಮತ್ತು 'ಈಟಿವಿ ಭಾರತ್' ನೆಟ್ವರ್ಕ್ ನಮ್ಮ ಶಕ್ತಿ. ತೆಲುಗು ರುಚಿಯ ರಾಯಭಾರಿಯಾಗಿ ಪ್ರಿಯಾ ಆಹಾರ ಉತ್ಪನ್ನಗಳ ಸ್ಥಾನವು ಉತ್ತುಂಗದಲ್ಲಿದೆ. ರಾಮೋಜಿ ಫಿಲ್ಮ್ ಸಿಟಿ ದೇಶದ ಹೆಮ್ಮೆ.
ಎಲ್ಲ ವಿಜಯಗಳಲ್ಲಿ ನೀವು ನನ್ನ ಸೈನ್ಯ. 'ರಾಮೋಜಿಗೆ ಇರುವ ಮತ್ತೊಂದು ಹೆಸರು ಶಿಸ್ತು. ರಾಮೋಜಿ ಗ್ರೂಪ್‌ನ ದಿಗ್ವಿಜಯ ನಿರಂತರ. ರಾಮೋಜಿ ಗ್ರೂಪ್ ಆಫ್ ಕಂಪನಿಗಳು ಅಚಲ ನಂಬಿಕೆಗೆ ಶಿರೋನಾಮೆ. ಸಮರ್ಥ ಮತ್ತು ಬದ್ಧತೆಯ ಸೈನಿಕನಾಗಿ ನಡೆಯಿಡಬೇಕು. ಸೃಜನಶೀಲ ಶಕ್ತಿಯಿಂದ ಸವಾಲುಗಳನ್ನು ಜಯಿಸಿ. ಈ ಜವಾಬ್ದಾರಿಗಳ ಉಯಿಲನ್ನು ನಾನು ಬರೆಯುತ್ತಿದ್ದು, ಇದನ್ನು ಎತ್ತಿಹಿಡಿಯುವ ಕರ್ತವ್ಯವನ್ನು ನಿಮಗೆ ವಹಿಸುತ್ತಿದ್ದೇನೆ.
- ರಾಮೋಜಿ ರಾವ್
